Ifyakutaŋga 37
37
1Popele apo Yakobi waliikele mucalo ico icalukwikalekala-mo ŵawisi, mucalo caKanani.
2Ifi efitentekwa fyakwe Yakobi.
Josefi, ili alele pano pesonde imyaka ikumi naisanu naiŵili, lomba walukwembela itaŋga pamo neŵakwaŵo; kaŵili ye wali mwanice lukoso pakweŵa aŵana ŵakwe Bilya neŵana ŵakwe Silipa, aŵakasi ŵaŵawisi; popele Josefi waliŵaŵulile ŵawisiŵo ifyampupo syaŵo isiŵipile. 3Lomba Isilaeli walimutemenwe Josefi ukucila napakuŵatemwa aŵana ŵakwe ŵambi ŵonse, pakuti ye wali mwana waŵucekulu bwakwe: kaŵili walimupasilile umwinjila uwamisaŋgo. 4Popele aŵakwaŵo ŵalibwene ati ŵawisifwe ŵalukumutemwa ukucila napakututemwa fweŵakwaŵo fwense; peŋka ŵalimufitilwe, taŵaisiŵile ukulaŵila nakwe uŵutende.
5Popele Josefi walilotele umuloto, nekuŵaŵula aŵakwaŵo; naŵo kaŵamufitilwa ukwakuti. 6Naye walilaŵile kuli ŵo ati: Ndukumukombeteleni ati mumfwe ifyamuloto uyu nalota; 7pakuti ŵoneni, twalukukake'mipo yatiligu mwiŵala, popele lomba umu po wanji kawima, kawimakana kaŵili; peŋka ŵoneni, imipo yenu kaisiŋguluka, kaiinamisya mukucindiko'mupo wanji. 8Popele aŵakwaŵo ŵalilaŵile kuli ye ati: Ulu! niweŵo uŋgatwikalika fweŵo icine kansi? Kansi uŋgatukomeka lomba? Naŵo kaŵamufitilwa ukwakuti pakuti pamiloto yakwe, napakuti pamasiwi akwe. 9Naye Josefi walilotele naumbi umoloto, nekuŵaŵula aŵakwaŵo, nekulaŵila ati: Ŵoneni, nalota naumbi umoloto; popele lomba akasuŵa nemwensi netuwaŋgawaŋga ikumi nakamo twalilambile kuli neŵo. 10Kaŵili waliŵaŵulileʼco ŵawisi neŵakwaŵo; peŋka ŵawisi ka ŵamukanya, kaŵalaŵila kuli ye ati: Cindo ici-ciloto ici walota? Kani cine ati fwense naŵanoko neŵakwanu tukesa mukwinamisya pansi ukukucindika? 11Popele aŵakwaŵo ŵalukumucite'cikani; sombi ŵawisi ŵo ŵalukulama amasiwi ayo mumutima.
12Popele apo aŵakwaŵo ŵaliile mukwembelela kuSyekemi itaŋga lyaŵawisiŵo. 13Popele ŵaIsilaeli ŵalilaŵile kuli Josefi ati: Aŵakwanu kansi taŵalalyembelela kuSyekemi itaŋga? Isa, ŋkutume kuli ŵo. Naye Josefi kaalaŵila kuli ŵo ati: Nineŵo ŋkuno, 14Naŵo kaŵalaŵila kuli ye ati: Koya pano, ukaŵone kani ŵalukwikala bwino aŵakwanu, netaŋga kani lilukwikala bwino; ukabwele, ukambule. Fyopele' fyo ŵalimutumine ukumufumya mumukolo waEbiloni, naye kaafika kuSyekemi.
15Popele umbi umuntu walimubwene alukwenda-enda mufyembelelo: Iombo'yomuntu walimwipwisye ati: Ulukufwayafwaye'ndo? 16Naye ati: Ndukuŵafwaya-fwaya aŵakwasu: ndukukukombetela ati umbule apo apa ŵalukwembelela, 17Popele uyo-muntu walilaŵile ati: Ŵalifumine-po napapano, pakuti naliumfwile ŵalukulaŵila ati: Ŋgatuye kuDotani. Peŋka Josefi kaaŵalonda'ŵakwaŵo, nekuwasaŋga ŵali muDotani, 18Naŵo ŵalimubwene ukutali; lomba ili taaŋgapalamina nakuli ŵo, ŵalifundene mukumwipaya. 19Lomba ŵalukuŵulansyanya ati: Woneni, alukwisa ulya uwakulota. 20Twendeni lomba, ŋgatumwipaye, tumupose mumbi mucilindi, eli tukalaŵila ati: Cilwani camulile! Tukaŵone-po ifi ikaŵa imiloto yakwe. 21Sombi Lubeni walifyumfwile'fyo, nekumupulusya muminwe yaŵo; nekulaŵila ati: Twimwipaya! 22Popele Lubeni walilaŵile kuli ŵo ati: Mwilukupokomosye'milopa neli panini; mumupose muno mucilindi icili pampaŋga, sombi iminwe yenu iŵa nemulandu pali ye. Alilaŵile'fyo ati ŋgamupulusye muminwe yaŵo, mukumubwesesya kuli ŵawisi.
23Popele apo, ili aisile Josefi kuŵakwaŵo, lomba ŵalimufulile Josefi umwinjila wakwe, umwinjilo'yo uwamisaŋgo uyo afwite; 24nekumupoka, nekumuposa namucilindi: Iombe'cilindi ico caliumine, tamwali amenda. 25Peŋka ŵaliikele mukulukulye'fyakulya. Lomba ŵaliceŵucile nekuŵona kansi nikumuloŋgo waŵalsimeli aŵalwendo aŵatulile kuGilyadi, ŵali neŋgamela syaŵo isyapintile ifinuncile bwino nefinanana ifyamusamu nafimola, ŵalukufitwala kuIjipiti. 26Popele Juda walilaŵile kuŵakwaŵo ati: Mbatukasyuka syani kani tumwipaye umukwasu nekufise'milopa yakwe? 27Twendeni tumuule amaŵoni kuŵalsimeli, iminwe yesu iŵa nemulandu pali ye; pakuti mukwasu, munefu untu umo nafweŵo. Popele aŵakwaŵo ŵalimumfwilisye. 28Popele kwalipitile aŵaMidyani aŵolisi; lomba ŵalimwimisye nekumwaŵula-mo Josefi mucilindi, nekumuula Josefi kuŵalsimeli indalama amakumi aŵili. Aŵo naŵo ŵalimutwite Josefi kucalo caIjipiti.
29Popele apo Lubeni walibwelele kucilindi; lomba kuŵona Josefi taa-mo mucilindi; naye Lubeni nekulipandawila ifyakufwala fyakwe. 30Popele alibwelele kuŵakwaŵo, nekulaŵila ati: Umwanice taa-po, neŵo kwisa nakuya?
31Popele waliwulile umwinjila wakwe Josefi, nekwipaya pepe, nekuufwafwasyo'mwinjila mumilopa; 32popele ŵalitumine umwinjilo'yo uwamisaŋgo, nekuufisya kuli ŵawisiŵo; nekulaŵila ati: Twaŵone'ci: pano mwisiŵe kani mwinjila wamwana wenu kani tewo. 33Naŵo ŵawisiŵo ŵaliwisiŵile, nekulaŵila ati: Mwinjila wamwana wanji; icilwani camulya; icine cine Josefi wasantalwa. 34Popele ŵa Yakobi ŵalilipandawilile ifyakufwala fyaŵo, nekufwala necikundulu paluŵunda, nekumulilo'mwana waŵo insiku isinji. 35Popele aŵana ŵaŵo ŵonse aŵalalume neŵanakasi ŵaliimine ŵati ŵakaŵasaŋgalasye; sombi ŵalikene ukusaŋgalasiwa; naŵo ati: Pakuti ŋkenda ili ndila ukufika nakuSyeoli kumwana wanji. Popele ŵawisi ŵalimulilile.
36Popele aŵaMidyani ŵalimuulile Josefi mucalo caIjipiti kuli Potifa, icilolo cakwe Falo cimbi, icilolo caŵalukumulama Falo.
Currently Selected:
Ifyakutaŋga 37: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
