Ifyakutaŋga 34
34
1Popele Dina, umwana wakwe Lea umwanakasi, uyo amufyalile Yakobi, walifumine mukuŵona aŵanakasi aŵamucalo ico. 2Lomba Syekemi, umwana wakwe Kamoli umuYifi, imfumu iya mucalo, walimubwene; eli aŋgamu poka nekulala nakwe, nekumuleŋgesyo'mupufyo. 3Popele umutima wakwe walimwikatilile Dina, umwana wakwe Yakobi, naye kaamutemwesya moye, nekulaŵile'fyaŵutende kuli moye. 4Peŋka Syekemi kaalaŵila kuli Kamoli wisi ati: Mumpokele uyu-moye, muupe. 5Lomba Yakobi waliumfwile ati amuŵifya Dina umwana wanji; kaŵili aŵana ŵakwe aŵalalume ŵali neŋombe syakwe mwiŵala: popele Yakobi waliikele celele, ili tawaŋgesa.
6Popele apo Kamoli, wisi Syekemi, walifumine ukulukuya kuli Yakobi mukwamba la nakwe. 7Popele aŵana ŵakwe Yakobi aŵalalume ŵaliinjile ukufuma kwiŵala pakucumfwa: lomba ŵali nensoni aŵo-ŵantu, ŵalikalipile makosa, pakuti alicitile ifyakutumpa mwIsilaeli paku lala nemwana wakwe Yakobi umwanakasi; icintu ici tacaelelwe ukucita. 8Popele apo Kamoli walukwambala naŵo, nekulaŵila ati: Umutima wamwana wanji Syekemi ulukumufuŋga umwana wenu umwanakasi: ndukumukombeteleni ati mumupele, ope. 9Kaŵili kamulukuupansyanya nafweŵo; mutupele aŵana ŵenu aŵanakasi, mupoke kaŵili neŵana ŵesu aŵanakasi. 10Eli mukalukwikele nafweŵo: kaŵili icalo cikalukuli pamenso enu; mulukwikele-mo nekulukusitulula nekufuŵulwila-mo amaŵoni. 11Syekemi naye walilaŵile kuli ŵawisi moye nakuŵakwaŵo ati: Ŋgandukuŵono'luse pamenso enu, lomba nakumupeleni copele'co ici mwakumbula. 12Mundombele icupo icikulu makosa nempese, lomba nakupela koti nifyefyo ifi mwalaŵila kuli neŵo; sombi muŋgufisye moye.
13Peŋka aŵana ŵakwe Yakobi awalalume ŵaliŵaasucile Syekemi naKamoli wisi nekutumpaika, nekulaŵila, pakuti alimuŵifisye Dina iŋkasi yaŵo, 14nekulaŵila kuli ŵo ati: Tatwisi ukucite'fyo, ukwipele'ŋkasi yesu kumuntu utakopwelwe'cisilamu, pakuti ifyo fyakutupufya. 15Twakumusumineni paceŵo ici ceŋka: kani mukaŵe koti nififi ifi tuli fweŵo, ati mwewalalume mwense mukakopolwe; 16eli tukamupeleni aŵana ŵesu aŵanakasi, nekuŵapoka aŵana ŵenu aŵanakasi, nekulukwikele namweŵo, nafweŵo eli tukaaluka mukoka umo. 17Sombi kani tesi mutumfwe, kani tesi mukopolwe; lomba twakupinto'mwana wesu umwanakasi, twakulukuya.
18Lomba amasiwi aŵo alitemwesye Kamoli naSyekemi, umwana wakwe Kamoli. 19Kaŵili umusaŋkwa uyo taakokwele ukucite'fyo, pakuti alimutemucile umwana wakwe Yakobi umwanakasi: naye wali neŵuleme uŵucilile napawamuŋanda yaŵawisi ŵonse. 20Popele Kamoli naSyekemi umwana wakwe ŵaliisile kumusiko uwamumusi, nekwambala neŵantu aŵamumusi, nekulaŵila ati: 21Aŵa-ŵantu ŵali neŵutende pali fweŵo; pakuti pali fyefyo ŋgaŵalukwikele mucalo nekulukusitulwila-mo; pakuti ŵoneni, icalo cikulu, cilikumene ukwikala-mo ŵo; ŋgatupoke aŵana ŵaŵo aŵanakasi, tuŵope, ŋgatuŵapele nafweŵo aŵana ŵesu aŵanakasi. 22Aŵo-ŵantu ŵakusumino'kwikala nafweŵo ati twaluke mukoka umo, paceŵo ici cimo ceŋka, kani fweŵalalume fwense tukopolwe icisilamu, koti nifyefyo ifi ŵakopwelwe aŵene. 23Iŋombe syaŵo nemaŵoni aŵo nenama syaŵo syonse, kansi tasikaaluka syesu? Ŋgatuŵasumine lukoso, eli ŵakulukwikala nafweŵo. 24Lomba ŵonse aŵalukufuma mu musiko uwa mu musi wakwe ŵalikuticile Kamoli naSyekemi; popele aŵalalume ŵonse ŵalikopwelwe, ŵonse aŵalukufuma mumusiko uwamumusi wakwe.
25Popele apo pakasuŵa kaŵusitatu, pakusomenwa ŵo, lomba aŵana ŵakwe Yakobi ŵaŵili, Simyoni naLcfai, indume syakwe Dina, ŵoŵilo ŵaliŵulile impoko syaŵo, nekuswalamucila pamusi, nekuŵepayala aŵalalume ŵonse. 26Kaŵili ŵaliŵepeye Kamoli naSyekemi, umwana wakwe, kumpoko, nekumufumya Dina muŋanda yakwe Syekemi; lomba kaŵakumbuluka. 27Popele aŵana ŵakwe Yakobi ŵaliisile kuŵafwile nekutape'fyamumusi, pakuti ŵaliiŵifisye iŋkasi yaŵo. 28Walitapile amataŋga aŵo ambelele neaŋombe nemboŋgolo syaŵo nafyefyo ifyali mumusi, nafyefyo ifyali mwiŵala; 29nemaŵoni aŵo onse, netwana twaŵo tonse neŵakasi ŵaŵo, ŵaliŵekete nekuŵatapa, efyonse lukoso ifyali muŋanda.
30Peŋka Yakobi walilaŵile kuli Simyoni na Lefai ati: Mŵaŋkatasya, mwanuncisya pakati paŵalukwikala mucalo, pakati paŵaKanani neŵaPelisi: lomba, pakuti ndikumene aŵace ukupenda, ŵakaŵuŋgana mukumbucila nekumpama; eli ŋkonalwa, neŵo necikoto canji. 31Naŵo ati: Kansi aŋgaicite' ŋkasi yesu koti mwanakasi umucencemesi?
Currently Selected:
Ifyakutaŋga 34: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
