Ifyakutaŋga 33
33
1Popele Yakobi walipempucile nekuceŵuka, lomba kuŵona nikuli Eso alukwisa pamo neŵantu imyanda ine. Popele kaawaawanisisya Lea naLaceli neŵasyakasi ŵoŵilo ukuŵapelaika aŵana. 2Peŋka kaatanjisya aŵasyakasi neŵana ŵaŵo, lomba panuma paŵo nekutuma Lea neŵana ŵakwe, lomba panuma lukoso Laceli na Iosefi. 3Naye umwine Yakobi waliaŵucile ukuŵatanjilila, nekwinamisya pansi impindi sisanu nasiŵili, ili taaŋgapalamina ku mukwaŵo. 4Popele Eso waliŵutucile mukumucinsya, nekumukumbata, nekuwila pamukosi wakwe, nekufyonta-po: naŵo kaŵalila neminsosi. 5Popele Eso waliceŵucile nekuŵona aŵanakasi neŵana; nekulaŵila ati: Mbaaŵa niŵani aŵa muli naŵo? Kumfwa ati: Ŵana aŵa ŵampele ŵaLesa nemuntu wenu koti luse lwaŵo. 6Peŋka kaŵapalamina aŵasyakasi pamo neŵana ŵaŵo, naŵo kaŵenamisya. 7Popele Lea naye neŵana ŵakwe kaŵapalamina, kaŵenamisya; pantanjile kaŵapalamina Josefi naLaceli, naŵo kaŵenamisya.
8Kumfwa Eso ati: Mbamulukucite' ndo pakutume'ŵumba lyonse'lyo na saŋga? Naye Yakobi ati: Ati ŋgambone uluse pamenso paŵasikulu ŵanji. 9Kumfwa Eso ati: Ndi nefyakukumana, mweŵakwasu, ifyo ifi muli nafyo ŋgafiikale fyenu. 10Popele Yakobi ati: Tau, ndukumukombeteleni ati, kani ŵukumo ndibwene uluse pamenso enu, mupoke impese yanji kuminwe yanji; pakuti namuŵoneni pamenso koti nifyefyo ifi aŋgawono'muntu pamenso paŵaLesa, kaŵili mwantemwa. 11Ndukumukombeteleni ati mupokelele impese yanji iletelwe kuli mweŵo; pakuti ŵaLesa ŵancite'ŋkumbu isikulu, nakaŵili pakuti ndi nafyo ifyakukumana. Naye kaakakatila; naye Eso kaapoka.
12Naye ati: Ŋgatulukuya; neŵo nakukutanjilila. 13Kumfwa Yakobi kaalaŵila kuli ye ati: Ŵasikulu ŵanji ŵaliisi ati aŵana ŵalinacile, nakaŵili ati amataŋga ambelele neaŋombe, andi nao, alukonsya aŵana; lomba kani ŵakaatamfisyo'kwakuti akasuŵa kamo, amataŋga onse akafwa. 14Ndukumukombeteleni, mweŵasikulu ŵanji, ati mulukuntanjilila nemuntu wenu: eli nakulukwenda bwino bwino, koti kwenda kwanama isili pamenso anji, nakoti kwenda kwaŵana, ili nsiŋgafika kuli ŵasikulu ŵanji kuSeyili. 15Peŋka Eso ati: Pano ŋgandukukusila ŵambi aŵantu aŵa ndi naŵo. Kumfwa ati: Mbaŵando? Ŋgandukusaŋgo'luse pamenso aŵasikulu ŵanji. 16Popele apo Eso walibwelele akokasuŵa mukulukuya kuSeyili.
17Naye Yakobi aliile kuSukoti, nekuliiŵacila iŋanda, nekusompa nemitanda iyaŋombe syakwe; pakuti pali fyefyo isina lyapapo liliilicilwe ati niSukoti.
18Popele apo Yakobi walificile uŵutende kumusi waSyekemi, uwamucalo caKanani, ili afumine kuPadanalama; nekwikala pamenso pamusi. 19Popele aliulile iŵala, ilyo apopele-po isema lyakwe, kuminwe yaŵana ŵaŵaKamoli, ŵawisi Syekemi, nekupose'ndalama umwanda. 20Popele aliŵunjile apo amabwe aconto, nekupelika ati niEleloye-isilaeli.
Currently Selected:
Ifyakutaŋga 33: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
