Ifyakutaŋga 35
35
1Popele apo ŵaLesa ŵalilaŵile kuli Yakobi ati: Ima, uye kuBeteli, ukalukwikele uko; kaŵili ukaŵunjile apo amabwe aconto ukuŵacindika ŵaLesa, aŵabwenekele kuli weŵo, ili wafyucile ukufuma pamenso akwe Eso umukwanu. 2Popele Yakobi walilaŵile kuŵamucikoto cakwe nakuli ŵaŵo ŵonse aŵo ali naŵo, ati: Fumyeni ŵalesa aŵo aŵensu aŵali pakati penu, mulukuliswesya nekufwala ifyakufwala fimbi. 3Ŋgatwime, tukaye kuBeteli; ŋkawunjila-po amabwe aconto ukuŵacindika ŵaLesa, awaŋgasucile pakasuŵa akakupeŋga kwanji, aŵali naneŵo pansila iyo naendele-mo. 4Naŵo ŵalimupele Yakobi ŵalesa aŵensu ŵonse aŵo aŵali muminwe yaŵo, pamo nensela isyakumatwi aŵo; popele Yakobi walififisile munsi yamweloni uwali kuSyekemi. 5Peŋka kaŵenda: lomba pamisi iyawasiŋgulucile pali umwenso ukwakuti, kaŵili aŵali-mo taŵaŵatamfisye aŵana ŵakwe Yakobi.
6Fyopele'fyo Yakobi walificile kuLusu, umusi uwa mucalo caKanani (wopele eBeteli), Yakobi umwine pamo neŵantu ŵonse aŵo ali naŵo. 7Popele aliŵunjile apo amabwe aconto, nekupelika apo ati niEli-beteli; pakuti nipapo epabwenekele ŵaLesa kuli ye, ili afyucile pamenso amukwaŵo.
8Popele apo Debola, umulelesi wakwe Libeka, walifwile, naye ŵalimusicile pansi yamweloni kunsi yaBeteli; lomba apo paliilicilwe isina lyapapo ati niAliloni-bacuti.
9Kaŵili ŵaLesa ŵalibwenekele liŵili kuli Yakobi, ili afumine kuPadanalama, nekumusyucisya. 10Popele ŵaLesa ŵalilaŵile kuli ye ati: Isina lyoŵe niweYakobi: isina lyoŵe tesi likelikwe pano ati niweYakobi, sombi isina lyoŵe likalukuli niweIsilaeli: eli aŋgamwilike'sina lyakwe ati niIsilaeli. 11Popele ŵaLesa ŵalilaŵile kuli ye ati: Neŵo nineŵaLesa aŵamakosa onse! Ukafyalisye, ukafunuke; icikoto caŵantu neŵumba lyafikoto fyaŵantu likatulila muli weŵo; kaŵili imfumu sikafuma kuluŵunda loŵe; 12nakaŵili icalo, ico naŵapele Ablaamu nalsaci, ŋkakupela weŵo, neŵana ŵoŵe panuma poŵe naŵo ŋkaŵapele' calo ico.
13Peŋka ŵaLesa ŵaliimine ukufuma pali ye apo ŵalukwambala nakwe. 14Popele apo Yakobi waliimicile ulupanda apo apa ŵalukwambala nakwe, ulupa nda lwamabwe: kaŵili aliitile-po umulambu wakunwa, nemafuta kaŵili kaetila-po. 15Popele Yakobi walipelicile apo, apa ŵalukwambala nakwe ŵaLesa, ati ni Beteli.
16Naŵo kaŵenda ukufuma kuBeteli; popele pacisyele umusinso uwakufika kuEfilata, lomba Laceli alukupotwa, nako ukupotwa kwakwe kwalikatesye. 17Popele apo, ili acipotwo'kukatesye, lombe'cimbela calilaŵile kuli ye ati: Witina; pakuti pano wakuŵa nemwana umbi umwalalume. 18Popele apo lomba, pakulukukumbuluko'mupasi wakwe (pakuti walifwile), alimwilicile ati niBenoni: sombi ŵawisi ŵalimwilicile ati niBenjamini. 19Popele Laceli walifwile, nekusikwa pansila iyakuya kuEfilata (wopele eBetelemi). 20Peŋka Yakobi waliimicile ulu pa nda lwamabwe pacilende cakwe: Iopele elupanda lwakucilende cakwe Laceli nakukasuŵa kalelo.
21Popele apo Isilaeli waliendele, nekupope'sema lyakwe pesilya lyananda itali iyakuEdeli.
22Popele lomba, ili aciikele Isilaeli mucalo ico, Lubeni waliile nekulala nakwe Bilya umwanakasi waŵawisi: kaŵili Isilaeli waliumfwile'fyo.
Lomba aŵana ŵakwe Yakobi aŵalalume wali ikumi naŵaŵili: 23aŵana ŵakwe Lea, Lubeni, umwana wakwe Yakobi umuŵele, naSimyoni, naLefai, na Juda, nalsaka, naSebuluni; 24neŵana wakwe Laceli, Josefi naBenjamini; 25neŵana ŵakwe Bilya, umusyakasi wakwe Laceli, Dani naNafitali; 26neŵana ŵakwe Silipa, umusyakasi wakwe Lea, Gadi naAsyali; aŵo eŵana ŵakwe Yakobi aŵalalume aŵafyalilwe kuli ye kuPadanalama.
27Popele Yakobi walificile kuli ŵalsaci ŵawisi kuMamile, pamusi wakwe Aliba (wopele eEbiloni), apalukwikala ŵaAblaamu naŵaIsaci. 28Lombe'nsiku syaŵalsaci syalikumene imyaka umwanda umo nemakumi asanu naatatu. 29Eli ŵaŋgapupulo'mupasi waŵo ŵalsaci, nekufwa, nekuwuŋganisiwa kuŵantu ŵaŵo, ŵali ŵacekulu aŵakumene imyaka iyinji; popele Eso na Yakobi aŵana ŵaŵo ŵaliŵasicile.
Currently Selected:
Ifyakutaŋga 35: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
