Ifyakutaŋga 32
32
1Naye Yakobi waliile palwendo lwakwe, lombe'ŋkalamba syaŵaLesa syalikumene nakwe. 2Popele, pakusiŵona, Yakobi walilaŵile ati: Ili liŵumba lyawa Lesa! Naye walipelicile apo ati niMakanayimi.
3Popele apo Yakobi walitanjisye aŵantu ukuŵatuma kuli Eso umukwaŵo kucalo caSeyili, kwiŵala lyaEdomi. 4Popele aliŵafundile ati: Mukalaŵile kuli sikulu wanji Eso ati: Umuntu wenu Yakobi walaŵile'fi ati: Nalukwikele naLabani nekulukusyele uko ukufika kumpindi yaŵukumo; 5kaŵili ndi neŋombe nemboŋgolo nemataŋga, pamo neŵapyunjisi aŵalalume neŵanakasi; lomba nditumine aŵantu mukuŵaŵula ŵasikulu ŵanji, ati ŋgaŋkaluwone uluse pamenso enu.
6Popele apo iŋkalambe'syo syalibwelele kuli Yakobi, nekulaŵila ati: Twalificile kuli ŵaEso awakwanu, lomba kaŵili ŵalukwisa mukumucinsyeni, ŵalukwenda pamo newantu imyanda ine.
7Popele Yakobi waliŵele nekutina nekumfwe'nsoni isyakuti, naye kaalekanya aŵantu aŵo ali naŵo, pamo nemataŋga ambelele neaŋombe, nekwaalula maŵumba aŵili; 8nekulaŵila ati: Kani afike Eso kwiŵumba limo nekulipama, lomba limbi ilyakusyala-po lyakupuluka.
9Kaŵili Yakobi ati: MweŵaLesa ŵaŵatata Ablaamu, mweŵaLesa ŵaŵatata lsaci, mweŵaYawe, mwemwalaŵile kuli neŵo ati: 10Bwelela kwenu nakuŵakwaŵenu, eli ŋkakucite'fiweme: neŵo nsielelwe iŋkumbu neli sinini lukoso neli niŵucine ŵonse, uŵo mwandanjisye nemuntu wenu, pakuti naliaŵucile uyuJodeni neŋkoli yanji; lomba ŵukumo ndiŵele maŵumba awili. 11Ndukumukombeteleni ati mumpulusye kuminwe yamukwasu, kuminwe yakwe Eso: pakuti ndukumutina, eŋgafika mukumpama pamo neŵana nawanyinawo. 12Kawili mwalilaŵile ati: Icine ŋkalukukucite'fiweme, nekwalula aŵana ŵoŵe koti miseŋga iyapacisiŵa, iyi taisi ukupendeka pakuti pabwinji.
13Popele apo aliikele apo uŵusiku uwo; nekuŵula-po pali fyefyo ifi ali nafyo, mukumupesela Eso umukwawo, 14ŵanyina-mbusi imyanda iŵili naŵapepe amakumi awili, naŵanyina-mbelele imyanda iŵili nembelele isyalalume amakumi aŵili, 15neŋgamela isyakukama'mandili amakumi atatu pamo netwana twasiko, nempwisi amakumi ane neŵacende ŵaŋombe ikumi, naŵanvina-mboŋgolo amakumi aŵili nemitule ikumi. 16Peŋka kaasipela muminwe yaŵantu wakwe, amataŋga onse limo limo; nekulaŵila kuŵantu ŵakwe ati: Muntanjilile ukwaŵuka, mukasye imipunda pakati napakati pamataŋga, amataŋga alukulekene. 17Popele alimuŵulile uwakutaŋga lukoso ati: Pakukumana naweŵo ŵaEso aŵakwasu, nekukwipusya ati: Mbawakwe nani weŵo? Mbolukuya kulipi? Mbasyakwe nani isi isili pamenso oŵe? 18Eli uŋgalawila ati: Syakwe Yakobi umuntu wenu; nimpese iyakuŵapesela ŵaEso ŵasikulu ŵanji; kaŵili ŵoneni, naye umwine ali panuma pesu. 19Kaŵili alimuŵulile newaŵuŵaŵili newaŵuŵatatu, naŵo ŵonse aŵo aŵalukulonda amataŋga, ati: Mukalukulaŵila kuli ŵaEso koti nifyefyo pakuwasaŋga: 20kaŵili mukalaŵile ati: Kaŵili ŵoneni, Yakobi umuntu wenu ali panuma pesu. Pakuti ye ati: Ŋkaŵatekenesya kumpese iyi ilukuntanjilila, popele pantanjile ŋkaŵaŵona pamenso; cipale ŵakampokelela. 21Fvopele'fyo impese yaliaŵucile ukumutanjilila: naye umwine waliikele mwiŵumba uwo-wusiku.
22Popele apo aliimine uŵo-ŵusiku nekupinta neŵakasi ŵakwe ŵoŵilo neŵasya ŵakwe ŵoŵilo, neŵana ŵakwe aŵo ikumi naumo, nekwaŵuka pamwaŵa waYaboko. 23Naye aliŵapintile nekuŵaaŵusya pakanika, nekwaŵusya nafyefyo ifi ali nafyo.
24Popele Yakobi umwine walisyele eŋka: lomba walukusuŋkana nakwe umuntu ukufika kukuca kwalucelo, 25Lombo'yo-muntu, pakuŵona ati nsilukucila'makosa pali ye, alitintile-po pakasolo kakwe; popele pakasolo kakwe Yakobi palitifucile, ili alukusuŋkana nakwe. 26Naye umuntu ati: Ndeke, pakuti ŵulukutwala mukuco'lucelo. Naye ati: Tesi mulekeni, apakuŵulo'kunsyucisya mweŵo. 27Popele uyomuntu kaalaŵila kuli ye ati: Mbesina lyoŵe niwe nani? 28Naye ati: NineYakobi. Kumfwa ati: Isina lyoŵe tesi likelikwe nafimbi ati niweYakobi, sombi likelikwa ati niweIsilaeli: pakuti walwa naŵaLesa neŵantu, wacila'makosa. 29Popele Yakobi walimwipwisye ati: Ndukumukombeteleni ati mumbule isina lyenu. Kumfwa ati: Mbanindo ulukunjipusisya isina lyanji? Naye alimusyucisye apo. 30Peŋka Yakobi walipelicile apo ati niPenyeli; pakuti ye ati: Ndiŵabwene ŵaLesa pamenso, kaŵili umweo wanji ulilaminwe.
31Popele akasuŵa kaliimine pali ye, ili apitile paPenweli, naye aliŵeyucile pakasolo kakwe. 32Pakuti pali fye fyo aŵana ŵakwe Isilaeli taŵalya umusipa uwafuŋganine, uli pakasolo, ukufika nakukasuŵa kalelo: pakuti aliti ntile-po pakasolo kakwe Yakobi pamusipa uwafuŋganine.
Currently Selected:
Ifyakutaŋga 32: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
