Ifyakutaŋga 31
31
1Popele apo aliumfwile amasiwi aŵana ŵakwe Labani ati: Yakobi apokolola fyonse ifyali fyaŵawisifwe; kaŵili kuli fyefyo ifyali fyaŵawisifwe aliŵele neŵuleme uŵu ŵonse. 2Lomba Yakobi walibwene pamenso pakwe Labani, kusaŋga tapamuwele-po bwino koti kale.
3Peŋka'po ŵaYawe ŵalilaŵile kuli Yakobi ati: Ukabwelele kucalo caŵawisinwe nakuŵakwaŵenu; lomba ŋkalukuli naweŵo.
4Popele Yakobi walitumine umuntu mukwita Laceli naLea ati iseni kwiŵala kwitaŋga lyanji, 5nekulaŵila kuli ŵo ati: Ndukuŵona ŵawisinwe pamenso ati tapambele-po bwino koti kale; sombi ŵaLesa ŵaŵatata ŵalukwikala naneŵo. 6Kaŵili muliisi ati nawapyunjila ŵawisinwe nemakosa anji onse. 7Sombi ŵawisinwe ŵantumpaika, ŵaliŋgalwilile ukulambula impindi ikumi; sombi ŵaLesa taŵasumine ati ŵansomesye. 8Kani ŵalaŵile ati: Isili nefisemba sikalukuli kulambulwa koŵe; lomba kansi isyetaŋga lyonse nekufyala isyafisemba: kaŵili kani ŵalaŵile ati: Isili nemaŵalasi asiŋgulucile esikalukuli kulambulwa koŵe; lomba kansi isyetaŋga lyonse nekufyale'syamaŵalasi asiŋgulucile, 9Fyopele'fyo ŵalipokolwele ŵaLesa inama syaŵawisinwe, nekumpela neŵo. 10Popele paliŵele ati pampindi yakwimite'taŋga, naliceŵucile nekuŵona pamuloto, lomba ŵapepe aŵalukunina petaŋga ŵali nemaŵalasi asiŋgulucile, nefisemba, nefincelencense. 11Popele apo iŋkalamba yaŵaLesa yalilaŵile kuli neŵo pamuloto ati: Yakobi! Naneŵo kandawila ati: Nineŵo ŋkuno. 12Nayo ati: Ceŵuka pano, uŵone, ŵapepe ŵonse aŵalukunina petaŋga ŵali nemaŵalasi asiŋgulucile, nefisemba, nefincelencense: pakuti naŵona fyonse'fyo ifi alukukucita Labani. 13Neŵo eneŵaLesa ŵakuBeteli, uko wasufisye ulupanda, uko walayene naneŵo nekulapa; pano wime, ukafume-mo mucalo umu, ukabwelele kucalo ico wafyalilwe-mo.
14Popele Laceli naLea ŵalimwasucile ati: Kani pacisyele kuli fweŵo muŋanda yaŵawisifwe ukwaŵana neli ŵupyani? 15Kansi tatweŵelwe kuli ŵo koti ŵensu? Pakuti ŵalituulile, ŵalilile lukoso kaŵili indalama syesu. 16Pakuti amaŵoni onse ayo ŵapokolwele ŵaLesa ukwafumya kuli ŵawisifwe esu neaŵana ŵesu: popele lomba, fyonse'fyo ifi ŵamuŵulileni ŵaLesa, kamuficita!
17Popele apo Yakobi waliimine, nekuŵekalika aŵana ŵakwe aŵalalume neŵakasi ŵakwe paŋgamela; 18nekupinta nenama syakwe syonse, nemaŵoni akwe onse ayo anoŋkele, inama isyo aŵele nasyo, isyo anoŋkele kuPadanalama, mukuya kuli ŵalsaci ŵawisi kucalo caKanani. 19Lomba Labani kale aile mukuŵeye'mbelele syakwe; popele Laceli waliiŵile ŵatelafi ŵaŵawisi. 20Popele apo Yakobi walioŋgolokele apakuŵulo'kwisiŵa Labani umuSilya, pakuti taamuŵulile ati ndukufyuka. 21Fyopele'fyo alifyucile pamo nafyo fyonse'fyo ifi ali nafyo, nekwima, nekwaŵuke'nika, nekusiŋkamana ukulukuya kulupili lwaGilyadi.
22Lomba pakasuŵa kaŵusitatu, ŵalimuŵulile Labani ati: Yakobi alifyucile, 23Popele alipintile neŵakwaŵo, nekumulonda palwendo lwansiku sisanu nasiŵili; eli aŋgakumana nakwe kulupili lwaGilyadi. 24Peŋka ŵaLesa ŵaliisile kuli Labani umuSilya pamuloto uwaŵusiku, nekulaŵila kuli ye ati: Kocenjela wemwine wikesa kulaŵila kuli Yakobi neli fiweme neli fiŵipile. 25Popele apo Labani walikumene nakwe Yakobi. Lomba Yakobi kale apopele isema lyakwe palupili; naLabani naye pamo neŵakwaŵo ŵalipopele palupili lwaGilyadi.
26Popele Labani walilaŵile kuli Yakobi ati: Mbawacite'ndo, pakuti walioŋgolokele apakuŵulo'kwisiŵa neŵo, nekuŵapinta aŵana ŵanji aŵanakasi koti ŵakutapwa kumpoko? 27Mbanindo wafyucile kumfiso, nekunoŋgolokela; nekuŵulo'kumbula ati ŋgaŋkutume ukulukusaŋgalala nekulukwimba nekulisya ukwapakawoma napabwesela? 28Mbanindo tawansuminine ukuŵafyonta-po aŵana ŵanji aŵalalume neŵanakasi? Kansi watumpa! 29Ndi nemakosa akukusomesya: sombi ŵaLesa ŵaŵawiso ŵalilaŵile naneŵo mailo uŵusiku, ati: Kocenjela wemwine wikesa kulaŵila kuli Yakobi neli fiweme neli fiŵipile. 30Lomba ŵukumo ulukufwayo'kuya, pakuti ulukwifuŋgo'kwakuti iŋanda yaŵawiso; sombi mbanindo wiŵile ŵalesa ŵanji?
31Popele apo Yakobi waliasucile, nekulaŵila kuli Labani ati: Nipakuti nalukutina: pakuti kandaŵila'ti: Mwiŋgesa kumpokolola nemakosa aŵana ŵenu aŵanakasi. 32Uyo uyu mwakuŵona ati ali naŵalesa wenu, tosi ekale nemweo ye; pamenso aŵakwaŵesu kamuŵone'fyenu ifili kuli neŵo, mukafipoke mweŵene. Pakuti Yakobi taaisiŵile ati Laceli aliŵeŵile.
33Popele apo Labani waliinjile mwisema lyakwe Yakobi, namwisema lyakwe Lea, namwisema lyaŵasyakasi ŵoŵilo; sombi taaŵabwene. Peŋka kaafuma mwisema lyakwe Lea, kaenjila mwisema lyakwe Laceli. 34Lomba Laceli kale aŵulile ŵatelafi, nekuŵaŵika mufyakusamika ifyaŋgamela, nekwikala-po. Popele Labani walipampantile ponse ponse mwisema, sombi taaŵabwene. 35Naye Laceli walilaŵile kuli ŵawisi ati: Ŵckafitwa ŵasikulu ŵanji ati tesi njime pamenso penu, pakuti ukwisiŵila kwaŵanaka si kuli pali neŵo. Naye walukufwaya-fwaya, sombi taasanjile ŵatelafi.
36Popele apo Yakobi walifitilwe, nekumupatila Labani: naye Yakobi walimwasucile Labani, nekulaŵila ati: Mbasyani umulandu wanji? Mbokuwifya kwanji kuli syani, ati mwanondaisya mweŵo? 37Naŋgawa ati mwapampantila ponse pafintu fyanji, mbamwaŵona findo ifyamaŵoni enu amuŋanda yenu? Fiŵikeni apa pamenso aŵakwaŵesu neaŵakwaŵenu, ŋgawasololole nafweŵo fweŵilo. 38Imyake'yi amakumi aŵili nalukwikala nenu; ŵanambelele naŵanyina-mbusi ŵenu taŵapulumwisye, nembelele isyalalume nasyo isyamwitaŋga lyenu nsinalile. 39Iyo iyasantawilwe kufilwani nsinaletele kuli mweŵo; nalifutile umulandu waiyo neŵo; mwaliifwaile kuminwe yanji, naŋgawa ati kasuŵa yaiŵilwe, naŋgawa ati ŵusiku. 40Naliikele fyopele'fyo; pakasuŵa icilaka calinjipeye, napawusiku candwa ecanjipeye; kaŵili utulo twanji twaliŵutucile ukufuma pamenso anji. 41Iyi-myaka amakumi aŵili nalukwikala muŋanda yenu; nalimupyunjilileni imyaka ikumi naine pakuti paŵana ŵenu aŵanakasi ŵoŵilo, naimbi imyaka isanu naumo pakuti petaŋga lyenu: lomba mwaliŋgalwilile ukulambula impindi ikumi. 42Ŋgataŵaikele naneŵo ŵaLesa ŵaŵatata, ŵaLesa ŵaŵaAblaamu, ekutonda kwawalsaci, ŋgamulintumine ŵukumo minwe lukoso icine. ŴaLesa ŵalibwene ukupeŋga kwanji nekupyuŋga kwaminwe yanji, nekumukanyeni uŵusiku bwamailo.
43Popele Labani waliasucile nekulaŵila kuli Yakobi ati: Aŵana aŵanakasi ŵana ŵanji, utwana twana twanji, amataŋga mataŋga anji, kaŵili fyonse'fyo ifi ulukuŵona fya nji: lomba mbacite syani lelo aŵa-ŵana ŵanji aŵanakasi netwana twaŵo utu ŵafyele? 44Isa lomba pano, ŋgatulayane fweŵilo naweŵo; ŋgakwikale fyaŵumboni pali neŵo naweŵo.
45Popele Yakobi waliŵulile ibwe nekuliimika koti lupanda. 46Kaŵili Yakobi walilaŵile kuŵakwaŵo ati: Loŋgeni amabwe! Naŵo ŵaliŵulile amabwe, nekucito'mupili: naŵo kaŵalya pamupili apo. 47Popele Labani walipelicile ati niYegala-sakaduta; sombi Yakobi ye walipelicile ati niGalidi.
48Popele apo Labani ati: Uyu-mupili waŵumboni pali neŵo naweŵo akasuŵa kalelo. Pakuti pali fyefyo isina lyapapo lyaliilicilwe ati niGalidi: 49nakawili ati niMisipa, pakuti alilaŵile ati: Ŵa Yawe ŋgawalukulaŋga-laŋga pali newo naweŵo pakulukulekene fweŵilo. 50Kani ukaŵapensye aŵana ŵanji aŵanakasi, kani ukope naŵambi aŵanakasi aŵa taŵali aŵana ŵanji aŵa, tapakalukuli-po umuntu uwakwikala nafweŵo; ŵona ŵaLesa emboni pali neŵo naweŵo. 51Kaŵili Labani walilaŵile kuli Yakobi ati: Ŵono'mupili uyu, uŵone nelupanda ulu, ulu naimicila pakati pali neŵo naweŵo. 52Uyumupili ŋgauwe niŵumboni, nelupanda ulu nalo ŋgaluwe niŵumboni ati newo tesi ŋkaawuke uyu-mupili ukufika kuli weŵo, nakaŵili ati weŵo tesi ukaaŵuke uyu-mupili nalulu-Iupanda mukwisa kuli neŵo, mukuŵifya. 53ŴaLesa ŵakwe Ablaamu, eŵaLesa ŵakwe Nako, ŵaLesa ŵakwe wisiŵo, ŋgaŵasololole nafweŵo. Peŋka Yakobi walilayene ukukulapa ukutonda kwaŵawisi ŵalsaci.
54Popele Yakobi wali posele umulambu uwakwipaya palupili, nekuŵeta aŵakwaŵo ati ŵalye ifyakulya; naŵo ŵalilile ifyakulya nekulukwikele uŵusiku ŵonse palupili. 55Lombo'lucelocelo Labani waliimine, nekufyonta-po paŵana ŵakwe aŵalalume neŵanakasi nekuwasyucisya; popele Labani kaakumbuluka, kaabwelela kwaŵo.
Currently Selected:
Ifyakutaŋga 31: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
