Ifyakutaŋga 30
30
1Popele, ili abwene Laceli ati nsilukumufyalila-po Yakobi aŵana neli umo, Laceli alimucitile icikani umukwaŵo; popele alilaŵile kuli Yakobi ati: Ŋgamumpele-po aŵana niŋgesa kufwa. 2Popele ukufitwa kwakwe Yakobi kwaliŵucile kuli Laceli, naye ati: Kani ndukwikala neŵo pamupunda waŵaLesa, ukukanya aŵana munda? 3Naye ati: Ŵoneni umusya wanji Bilya, mwinjile muli ye; ati akafyalile pamakufi anji, naneŵo ati ŋkapoke aŵana kuli ye. 4Popele alimupele Bilya umusya wakwe ati ope: popele Yakobi aliinjile muli ye. 5Popele apo Bilya waliimitile, nekumufyalila Yakobi umwana umwalalume. 6Eli aŋgalawila Laceli ati: ŴaLesa ŵasololola naneŵo, kaŵili ŵaumfwe'siwi lyanji, nekumpela-po umwana umwalalume; pakuti pali fyefyo alimwilicile isina lyakwe ati niDani. 7Kaŵili buya, umusya wakwe Laceli, waliimitile liŵili, nekumufyalila-po Yakobi nemwana waŵuŵaŵili. 8Popele Laceli walilaŵile ati: Nalwa nemukwasu nekusuŋkana ukwamakosa, nacilo'kulwa. Lomba alimwilicile isina lyakwe ati niNafitali.
9Popele apo Lea, ili abwene ati naleko'kufyala, alipintile Silipa, umusya wakwe, nekumupela Yakobi ati ope. 10Popele Silipa, umusya wakwe Lea, walimufyalile Yakobi umwana umwalalume. 11Popele Lea ati: Lisyuko! Naye alimwilicile isina lyakwe ati niGadi. 12Kaŵili Silipa, umusya wakwe Lea, alimufyalile Yakobi nemwana waŵuŵaŵili. 13Popele Lea ati: Ndisyucile! pakuti aŵana aŵanakasi ŵakalukunjeŵa ati usyucile. Naye alimwilicile isina lyakwe ati niAsila.
14Popele Lubeni aliile pampindi yakuloŋgela tiligu, nekuŵona nikuli ŵadudayi mwiŵala, nekuŵaletela ŵanyina ŵaLea. Popele Laceli walilaŵile kuli Lea ati: Ndukukukombetela ati umpele-po ifyaŵadudayi ŵamwana woŵe. 15Naye alilaŵile kuli ye ati: Kani ceŵo icice ati wampokololo'mulume wanji? Lomba ulukufwayo'kupokolola naŵadudayi ŵamwana wanji naŵo? Popele Laceli walilaŵile ati: Pakuti pali fye fyo akulala naweŵo uŵusiku bwalelo pakuti pali ŵadudayi ŵamwana woŵe. 16Popele iciŋgulo Yakobi waliisile ukufuma kwiŵala; popele Lea walifumine mukumucinsya, nekulaŵila ati: Mwakwinjila muli neŵo; pakuti icine namwapuleni naŵadudayi ŵamwana wanji. Naye alilele nakwe uŵusiku uŵo. 17Popele apo ŵaLesa ŵalimumfwile Lea, naye aliimitile, nekumufyalila Yakobi umwana umwalalume uwaŵuŵasanu. 18Lomba Lea ati: ŴaLesa ŵampela ukulambulwa kwanji, pakuti nalimupele umulume wanji umusya wanji: naye alimwilicile isina lyakwe ati nilsaka. 19Kaŵili Lea kaemita liŵili, kaamufyalila Yakobi naumbi umwana uwakukoŵeka-mo. 20Naye Lea ati: ŴaLesa ŵampele'cupo iciweme; pano umulume wanji akalukwikele naneŵo, pakuti namufyalila aŵana aŵalalume ŵasanu naumo: naye alimwilicile isina lyakwe ati niSebuluni. 21Popele pantanjile walifyele umwana umwanakasi nekumwilika isina lyakwe ati niDina.
22Peŋka ŵaLesa ŵalimulaŋgulucile Laceli, naŵo ŵaLesa ŵalimumfwile, nekumwiswila munda. 23Naye waliimitile, nekufyalo'mwana umwalalume: nekulaŵila ati: ŴaLesa ŵamfumisya umupufyo wanji. 24Naye walimwilicile isina lyakwe ati niJosefi, nekulaŵila ati: ŴaYawe ŵakandundile-poumwana umwalalume naumbi.
25Popele apo, ili amufyele Josefi Laceli, lomba Yakobi walilaŵile kuli Labani ati: Ntumeni, ŋkaye kwanji nemwine kwesu kucalo. 26Mumpele aŵakasi ŵanji neŵana ŵanji aŵo namupyunjilileni, ŋgandukuya: pakuti muliisi ukupyuŋga kwanji uko namupyunjileni.
27Popele Labani alilaŵile kuli ye ati: Kani ŵukumo ndisanjile uluse pamenso oŵe, wikale; pakuti ndibwene ati ŵaYawe ŵalinsyucisye pakuti pali weŵo. 28Naye ati: Umbule ifi ulukufwayo'kulambulwa; nakukupela.
29Naye Yakobi walilaŵile kuli ye ati: Mulifiisi ifyo mupyunjileni, nafyefyo ifi siikele naneŵo inama syenu. 30Pakuti mwali nafyo ifice fyeŋka, ili nsiŋgesa; ifyo fyafula, fyaŵa liŵumba; kaŵili ŵaYawe ŵamusyucisyeni monse umo umu naalulucila: lomba pano, ŋkaŵapyunjila lisa newamuŋanda yanji nemwine?
31Naye Labani ati: Nakukupele'ndo? Sombi Yakobi ati: Tesi mumpele-po neli kantu. Kani mwakuncitile'fi, nakulukwembela liŵili itaŋga lyenu, nekulukulilama. 32Nakupitila petaŋga lyenu lyonse lelo, ili mfumyamo mulya syonse inama isili nefisemba nemaŵala; namumbelele nakufumyamo isifitile syonse; namumbusi nakufumya-mo isili nefisemba nemaŵala; isyo sikalukuli kulambulwa kwanji. 33Fyopele'fyo ukuluŋgama kwanji kukalukundaŵilila pantanjile, ili mukesa mukwambala ifyakulambulwa kwanji ukuli pamenso enu. Syonse'syo isitasikwetefisemba neli maŵala mumbusi, nasyesyo isitasifitile mumbelele, isyakubwenekela kuli neŵo, sikebwa ati syakwibwa.
34Popele apo Labani ati: Ŵona, ŋgafiŵe koti lisiwi lyoŵe.
35Naye akasuŵa ako alifumisye ŵapepe aŵali nemaŵalasi asiŋgulucile nemaŵala, naŵanyina-mbusi ŵonse aŵali nefisemba nemaŵala, ŵonse aŵali nekutuŵa pali ŵo, nesifitile syonse mumbelele, nekusipela namuminwe yaŵana ŵakwe aŵalalume; 36naye walikumanisye umusinso uwakwenda insiku sitatu pakati pali ŵo naYakobi: naye Yakobi walukwembela amataŋga akwe Labani asyele-po.
37Popele Yakobi waliŵulile ifiti ifyalibine ifiŵisi nefyamiti yasyakedi neyaalimono, nekutala-mo ifisemba ifituŵile, nekuŵona ukutuŵa ukwali mufiti. 38Popele alifiimicile ifiti ifyo atalile apasiŋkamene pamataŋga mumifolwa mumaŋkuwala akunwina-mo, apo alukwisa amataŋga mukunwa; nao aliimitile pakwisa mukunwa. 39Lomba amataŋga aliimitile pamenso afiti, nao amataŋga alifyele aŵana aŵali nemaŵalasi asiŋgulucile, nefisemba, nemaŵala. 40Popele apo Yakobi walilekenye utwana, nekwalula amenso amataŋga ati alole kuli syesyo isyali nemaŵalasi asiŋgulucile, nakuli syesyo syonse isifitile isyamwitaŋga lyakwe Labani; naye waliŵicile pambi amaŵumba akwe umwine, taaŵicile kwitaŋga lyakwe Labani. 41Popele apo lomba, ili syaimitile isyamwitaŋga isyamakosa eli atekele Yakobi ifiti pamenso etaŋga mumifolwa, ati ŋgaliimite pakati pafiti; 42sombi ili lyanacile itaŋga, taafiinjisye; fyopele'fyo isinacile syali syakwe Labani, nesikosele nasyo syali syakwe Yakobi. 43Lombo'yomuntu walifulile ukwakuti, waliŵele nemataŋga akulu neŵapyunjisi aŵanakasi neŵalalume, neŋgamela nemboŋgolo.
Currently Selected:
Ifyakutaŋga 30: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
