Ifyakutaŋga 29
29
1Popele apo Yakobi waliile ulwendo lwakwe, nekufika kucalo caŵana aŵakumutulesuŵa. 2Popele aliceŵele, lomba kusaŋga nikumukalo mumpaŋga: kaŵili kuŵona nikumataŋga ambelele atatu aluele apo; pakuti nimumukalo uyo emo ŵalukwatapila amataŋga amenda: nakaŵili ibwe ilyapakanwa kamukalo lyali likulu. 3Kaŵili amataŋga onse aliwuŋganine apo: lomba ŵalukwalamuna-ko ibwe ukulifumya pakanwa kamukalo, nekulukusitapile'mbelele amenda, nekubwelesya-po liŵili ibwe pakanwa kamukalo pantu paliko. 4Popele Yakobi walilaŵile kuli ŵo ati: Mweŵakwasu, muli ŵakwisa? Naŵo ati: Tuli ŵakuKalani. 5Naye alilaŵile kuli ŵo ati: Kani mulimwisiŵile Labani umwana wakwe Nako? Naŵo ati: Tulimwisi. 6Naye alilaŵile kuli ŵo ati: Kani kuli uŵutende kuli ye? Kumfwa naŵo ati: Pali uŵutende; lomba ŵona, Laceli, umwana wakwe umwanakasi, alukwisa nembelele. 7Naye ati: Ŵoneni, akasuŵa kacili peulu, kaŵili taiŋgafika impindi yakuŵuŋganina inama: kamusitapile'mbelele amenda, lomba muye, muka siembele. 8Naŵo ati: Tatwisi ukucite' fyo, ili taaŋgawuŋgana amataŋga onse neŵantu nekwalamuna-ko ibwe ukulifumya pakanwa kamukalo; ilyo tusitapila imbelele amenda.
9Popele, lomba acambala naŵo, Laeeli waliisile nembelele syaŵawisi; pakuti ye mwembesi. 10Popele apo Yakobi, ili abwene Laceli, umwana umwanakasi uwakwe Labani mwinsyo wakwe, pamo nembelele syakwe Labani mwinsyo wakwe, eli apalamine, nekwalamuna-ko ibwe ukulifumya pakanwa kamukalo, nekulitapila amenda itaŋga lyakwe Labani mwinsyo wakwe. 11Popele apo Yakobi walimufyontelepo Laceli, nekulukulila neminsosi. 12Naye Yakobi walimuŵulile Laeeli ati: Neŵo enemukwaŵo ŵawiso, enemwana wakwe Libeka; naye umwanakasi waliŵutucile nekuŵaŵula ŵawisi. 13Popele apo lomba Labani, ili aumfwile iceŵo cakwe Yakobi umwana ŵaŋkasi yakwe, aliŵutucile mukumucinsya, nekumukumbata, nekumufyontapo, nekumufisya nakunanda kwakwe. Naye Yakobi walimuŵulile Labani iceŵo conse. 14Popele Labani walilaŵile kuli ye ati: Cine weŵo niwemafupa anji ewemunefu wanji! Popele apo aliikele nakwe umwensi uŵuluŵulu.
15Popele Labani walilawile kuli Yakobi ati: Pakuti uli mukwasu, kani ulukumpyunjila uwakuŵulo'kulambulwa? Umbule, ukulambulwa koŵe kukalukuli syani? 16Lomba Labani wali neŵana ŵaŵili aŵanakasi: isina lyamukulu-ŵantu niLea, nesina lyamwanice-ŵantu nalyo niLaceli. 17Kaŵili amenso akwe Lea alinacile; sombi Laceli wali waŵulombe waliweme. 18Lomba Yakobi walimutemenwe Laceli; naye ati: Ŋkalukumupyunjileni imyaka isanu naiŵili mukupoka Laceli umwana wenu umwanice-ŵantu. 19Popele Labani ati: Filiŋgelelwe ukumupela kuli weŵo, ukucila napakumupela kuli umbi umuntu: ulukwikele naneŵo. 20Lomba Yakobi eli aŋgapyunjile'myaka isanu naiŵili mukupoka Laceli; nayo imyaka yalibwenekele kuli ye koti ninsiku isice, pakuti pakutemwo'ko ukwali nako kuli ye.
21Popele apo Yakobi walilaŵile kuli Labani ati: Mpeleni umukasi wanji, pakuti insiku syanji syakumana, ati nyinjile muli ye. 22Popele Labani waliwuŋgenye aŵantu ŵonse aŵapapo, nekucite'citenje icakulya. 23Popele apo iciŋgulo alipintile Lea umwana wakwe, nekumuletela Yakobi; naye aliinjile muli ye. 24Kaŵili Labani wali pele Silipa umusya wakwe kuli Lea umwana wakwe, ati aŵe musyakasi wakwe. 25Popele apo ulucelo kusaŋga nikuli Lea: eli aŋgalawila Yakobi kuli Labani ati: Mbefi mwancita findo? Kansi nsinalimupyunjilileni ati ŋkapoke Laceli? Mbanindo lomba muntumpaicile? 26Popele Labani ati: Taŵacite'fi kuno kwesu ukuposo'mwanice-ŵantu ili tawaŋgaposo'muwele, 27Ukakumanisye umuluŋgu wawuyu, eli tukakupela naumbi naye kaŵili pakuti pamilimo iyo ukalukumpyunjila naimbi imyake'sanu naiŵili. 28Popele apo Yakobi alicitile'fyo, nekukumanisyo'muluŋgu wakwe Lea: popele Labani eli aŋgamupela Laceli umwana wakwe, ati ope. 29Popele Labani walipele Bilya umusya wakwe kuli Laceli umwana wakwe, ati awe musyakasi wakwe. 30Naye Yakobi aliinjile namuli Laceli, kaŵili alitemenwe Laceli ukucila napakumutemwa Lea; popele apo alimupyunjilile naimbi imyaka isanu naiŵili.
31Popele apo ŵaYawe ŵalibwene ati Lea alipufiwe, naŵo ŵalimwiswile munda; sombi Laceli wali ninumba. 32Popele Lea waliimitile, nekufyalo'mwana umwalalume, nekumwilike'sina lyakwe ati niLubeni; pakuti ye ati: Pakuti ŵaYawe ŵalitontomekele pakupeŋga kwanji; pakuti ŵukumo umulume wanji eli akuntemwa. 33Naye aliimitile liŵili, nekufyalo'mwalalume; nekulaŵila ati: Pakuti ŵaYawe ŵaliumfwile ati ndipufiwe, eli ŵampela nawuyu naye: popele alimwilicile isina lyakwe ati niSimyoni. 34Naye aliimitile nalitatu, nekufyalo'mwalalume; nekulaŵila ati: Pano ino-mpindi umulume wanji akakumaŋkana naneŵo, pakuti namufyalila aŵana ŵatatu aŵalalume: pakuti pali fyefyo isina lyakwe lyaliilicilwe ati niLefai. 35Popele apo aliimitile naline, nekufyalo'mwalalume: nekulaŵila ati: Iyi-mpindi nakulukuŵacindika ŵaYawe; pakuti pali fyefyo alimwilicile isina lyakwe ati niJuda; eli aŋgaleko'kufyala.
Currently Selected:
Ifyakutaŋga 29: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
