Esiceli 46
46
1ŴaSikulu Yawe ŵalukulaŵile'fi ati: Pamulyaŋgo uwakuluŵansa lwamukati ulolele kumutulesuŵa pakulukwiselwe-ko pansiku syamilimo isyo syosanu nakamo; sombi pakasuŵa kasabata pakesulwa-ko, napakasuŵa kamwensi wamaseŋgo napo pakesulwa-ko. 2Popele icileme cikenjila pansila yakucansense icakumulyaŋgo poso nde, nekwimakana kuciti cakumulyaŋgo: peŋka aŵapapatilisi ŵakaansika umulambu wacico uwakoca nemilambu yacico iyaŵutende; eli cikacindika kucibwambilo capamulyaŋgo; telyo cikafuma; sombi pamulyaŋgo tekuti pakesalwe-ko, ili taciŋgafika iciŋgulo. 3Popele aŵantu aŵapacalo ŵo ŵakacindika kuciŵi cakumulyaŋgo uyo pamenso aŵaYawe pali ŵasabata napamyensi yamaseŋgo. 4Lomba umulambu wakoca, uyo icileme cikaŵaposela ŵaYawe pakasuŵa kasabata, ukakumane aŵana ŵambelele ŵasanu naumo aŵakuŵule'fisemba, pamo nembelele iyalalume iyakuŵule'fisemba; 5kaŵili umulambu wawuŋga ukalukuli niefa pakuti pambelele iyalalume, nemulambu wawuŋga uwapaŵana ŵambelele nawo ukalukuli koti nifyefyo ifi ciisi ukuposa, pamo nacini wamafuta pali efa, ŵaefa ŵonse. 6Kaŵili pakasuŵa kamwensi wamaseŋgo umulambu ukakumane umusune waŋombe umwana uwakuŵule'fisemba, neŵana ŵambelele ŵasanu naumo, nembelele iyalalume; syonse sikaŵule'fisemba. 7Lomba cikaansika umulambu wawuŋga, efa umo pamusune, naefa umo pambelele iyalalume, napaŵana ŵambelele koti nifyefyo ifi ciisi, pamo nacini wamafuta pali efa, ŵaefa ŵonse.
8Popele, pakwinjila icileme, cikenjila pansila yakucansense icakumulyaŋgo, nekufuma-mo kaŵili pansila yakuko. 9Sombi pakwisa aŵantu ŵakucalo pamenso aŵaYawe pafitenje ifyansicilwe, uyo uwakwinjila pansila yakumulyaŋgo uwakunofu mukucindika, ye akafuma pansila yakumulyaŋgo uwakusaufu; kaŵili uyo uwakwinjila pansila yakumulyaŋgo uwakusaufu ye akafuma pansila yakumulyaŋgo uwakunofu; tekuti akabwele pansila yakumulyaŋgo uyo uyu wainjile-mo; sombi ye akasiŋkamane lukoso siŋkamane. 10Kaŵili pakwinjila ŵo, lomba icileme cikenjile pakati pali ŵo; napakufuma ŵo, ŵonse ŵakafume pamo. 11Kaŵili pafitenje napampindi isyansicilwe, umulambu wawuŋga ukalukuli niefa pakuti pamusune waŋombe, naefa pakuti pambelele iyalalume; pakuti paŵana ŵambelele ukalukuli koti nifyefyo ifi ciisi ukuposa, pamo nacini wamafuta pali efa, ŵaefa ŵonse. 12Lomba pakwansika icileme umulambu koti mutima, kani mulambu wakoca, kani milambu yaŵutende iyakuŵaposela ŵaYawe koti mutima, umbi umuntu aŋgaciiswila-ko kumulyaŋgo ulolele kumutulesuŵa; eli ciŋgaansika umulambu wacico uwakoca nemilambu yacico iyaŵutende, koti nifyefyo ifi cicita pakasuŵa kasabata; eli ciŋgafuma; peŋka, pakweŵa ati cafuma, umbi umuntu aŋgesala-ko kumulyaŋgo.
13Kaŵili ukalukwansika insiku nansiku umwana wambelele uwapamwaka wakutaŋga uwakuŵule'fisemba ati mulambu wakuŵocela ŵaYawe; ukalukwansika incelo syonse. 14Kaŵili ukalukwansika incelo syonse umulambu waŵuŋga pamo nawo, icakwesya cimo pali fisanu nacimo icaefa, necakwesya cimo pali fitatu icacini wamafuta, mukutontosya uŵuŋga uŵupelekele bwino; umulambu waŵuŋga uwakuli ŵaYawe insiku syonse kukusololola ukwamuyayaya. 15Fyopele'fyo efi ŵaŋgaansika umwana wambelele, nemulambu waŵuŋga, nemafuta, incelo syonse, ati mulambu wakoca uwakulukuyayaya.
16ŴaSikulu Yawe ŵalukulaŵile'fi ati: Kani icileme cimupele impese umbi wapaŵana ŵacico aŵalalume, yo ŵupyani bwakwe; ikalukuli yaŵana ŵacico; yo eŵuŵoni bwaŵo ubwakupyana. 17Sombi kani cimupele umbi wapaŵapyunjisi ŵacico impese yaŵupyani bwacico, ikalukuli yakwe ukufika umwaka wakukakuluka; eli ikabwelele kucileme. Sombi uŵupyani bwacico ŵukalukuli bwakuŵana ŵacico aŵalalume. 18Nakaŵili icileme tekuti cipokolole icapaŵupyani bwaŵantu, ukuŵataŋkula ŵafume mucaŵuŵoni caŵo; cikaŵapele aŵana ŵacico uŵupyani ubwapacaŵuŵoni cacico icine; aŵantu ŵanji ŵekesa mukupalaŋgana ukufuma ŵonse umo umo mucaŵuŵoni cakwe.
19Popele apo alinyinjisye mumwinjililo, uwali kumbali yamulyaŋgo, ukumfisya mufipinda ifiswetelele ifyakuŵapapatilisi, ifyalolele kunofu; lomba kusaŋga nikuntu kunuma kumbonsi. 20Naye walilaŵile kuli neŵo ati, Apa epantu apo aŵapapatilisi ŵakepika-po umulambu wapamulandu nemulambu wapafyakuŵifya, nekusalula-po umulambu waŵuŋga; ŵeŋgesa mukufifumisya paluŵansa lwaposonde nekuŵaswesya aŵantu.
21Popele apo alimfumisye ukumfisya kuluŵansa lwaposonde, nekumpisya pamakoŋko onane akuluŵansa; lomba kusaŋga nikuluŵansa pamakoŋko onse akuluŵansa. 22Pamakoŋko onane akuluŵansa pali imansa isisiŋgulucilwe syalikumene uŵutali bwamakubita amakumi ane, nebwipi bwamakubita amakumi atatu; isyo syonane isyali pamakoŋko syaliliŋgene ukwesiwa. 23Kaŵili pali ndandanda pali syo apasiŋgulucile, apasiŋgulucile syo syonane; palicitilwe nepakwipicila-mo pansi pali ŵandandanda apasiŋgulucile. 24Peŋka alilaŵile kuli neŵo ati, Aya emaŋanda akwipicila-mo, umo aŵapyunjisi ŵakuŋanda ŵakepicilamo umulambu wawantu.
Currently Selected:
Esiceli 46: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
