Esiceli 47
47
1Popele apo alimbwesesye kumulyaŋgo wakuŋanda; lomba kuŵona nikumenda alukufuma-mo munsi yacibwambilo cakuŋanda kumutulesuŵa, pakuti pamenso paŋanda palilolele kumutulesuŵa; lomba amenda alukufumamo munsi, kulwine lwaŋanda, kusaufu ukwakuconto. 2Popele alimfumisye pansila yakumulyaŋgo kunofu, nekuntanjilila pansila posonde ukuya kumulyaŋgo waposonde lukoso, pansila yakumulyaŋgo ulolele kumutulesuŵa; lomba kuŵona nikumenda alukukuŋka kulwine. 3Pakuya umuntu kumutulesuŵa nemwando muminwe, aliesesye amakubita isausande limo, nekumpisya mumenda, amenda akufika kutupokoso. 4Nakaŵili aliesesye naambi isausande limo, nekumpisya mumenda, amenda akufika kumakufi. Nakaŵili aliesesye naambi nao isausande limo, nekumpisya-mo mumenda akufika kuluŵunda. 5Panuma pali fyefyo aliesesye naambi isausande limo; lomba ninika yakuŵulo'kupita-mo neŵo; pakuti amenda kansi afuŵatila-mo, amenda akusambila-mo; ninika yakuŵulo' kupita-mo neli muntu.
6Popele alilaŵile kuli neŵo ati, Wemwana wamuntunsi, kani wafiŵona? Telyo aŋgandeta nekumbwelesya kumumba yanika. 7Lomba, ili nabwelele, kansi kusaŋga pamumba yanika nikumiti iyinji pambali syoŵilo. 8Peŋka alilaŵile kuli neŵo ati: Aya-menda alukufumina kuntu kwakumutulesuŵa, akakuncila kumpanta, nekuya nakucisiŵa; nimucisiŵa emo akenjila amenda ayo afumisiwe; eli akaposiwa amenda. 9Lomba pakaŵa ati ifilaŵi fyonse ifyakufulila-mo, ponse apakufika inika, fikaŵa nemweo; eli pakaŵa necikoto camasaŵi icikulu ukwakuti; pakuti aya-menda afika-po, peŋka amenda amucisiŵa akaposiwa, nefintu fyonse nafyo nekuŵa nemweo monso'mo umwakufika inika. 10Kaŵili pakaŵa ati aŵakwikasye'saŵi ŵakemakana muceni caiyo. Ukufuma kuEnigedi ukufika nakuEni-ejilayimi kukalukuli nipantu apakutandabwila utombe. Amasaŵi akuko akalukuli koti mikoka yaako, koti masaŵi akucisiŵa icikulu, akuti ubwinji. 11Sombi amalelu akuko nemanene akuko, tekuti akaposiwe; akaposwa lukoso ati alule. 12Kaŵili paceni canika, pamumba yakuko pambali syoŵilo, pakamena imiti yonse iyakulya, iyo amaŵula aiyo taakoma-po, nefisepo fyaiyo nekuŵulo'kulekapo. Ikaleŋgesyo'kwikate'fisepo fyaŵukumo imyensi yonse, pakuti amenda akuko alafuma kumulenda uswetelele; kaŵili ifisepo fyakuko efyakulya, nemaŵula akuko efyakuposya.
13ŴaSikulu Yawe ŵalukulaŵile'fi ati: Uyu eukalukuli mupaka, uyo uyu mukacaŵa-ko icalo ati ŵupyani koti fikoto fyaŵaIsilaeli ifyo ikumi nafiŵili; Josefi naye akaŵa nefyakwaŵa. 14Popele mukacipyana, mwense pamo; ifyakuli co nalisuntwile ukuŵoko kwanji ati ŋkacipela kuli ŵawisinwe; lomba ici-calo cakamuŵeleni ati ŵupyani. 15Peŋka umupaka wakucalo ukalukuli niwuyu: kunofu, ukufuma kucisiŵa icikulu, pansila yakuYetiloni, ukufika kukwinjilila kwakuSedada; 16naAmati, naBelotaci, naSibilayimi, uli pakati pamupaka wakuDamasiko nemupaka wakuAmati; naKasali-katikoni, uli kumupaka wakuKaulani. 17Kaŵili umupaka uwakufuma kucisiŵa ukalukuli kuKasali-enoni, kumupaka wakuDamasiko; lomba kunofu nekuya-ko'ko nikumupaka wakuAmati. Uko ekunofu. 18Kaŵili kumutulesuŵa, pakati paKaulani naDamasiko naGilyadi necalo cakuIsilaeli, kukalukuli-po Jodeni; mukalukwesya ukufuma kumupaka wakunofu ukufika nakucisiŵa cakumutulesuŵa. Uko ekumutulesuŵa. 19Lomba kusaufu nekuyako'ko kukafuma kuTama, ukuficilila kumenda akuMeliboti-kadesi, kukanika akalukuya kucisiŵa icikulu. Uko ekusaufu nako'ko. 20Kaŵili kumbonsi kukalukuli-po icisiŵa icikulu, ukufuma kumupaka wakusaufu, ukuficilila ukusiŋkamene nekwinjilila kwakuAmati. Uko ekumbonsi. 21Fyopele'fyo efi mukalyaŵila ici-calo, koti fikoto fyaŵaIsilaeli.
22Popele pakaŵa ati mukacaŵa kufipa ati ŵupyani bwakuli mweŵo nakuŵenafyalo aŵakwikalekala pakati pali mweŵo, aŵakafyala aŵana pakati pali mweŵo; lomba ŵo ŵakamuŵeleni koti ŵana aŵakufyalwa kwenu pakati paŵana ŵakwe Isilaeli; ŵo ŵakaŵa neŵupyani pamo namweŵo pakati pafikoto fyaŵaIsilaeli. 23Lomba pakaŵa ati monse mufikoto umwakwikalekala umwinafyalo, mopelo'mo emo mukamupyanike, efilukulaŵila ŵaSikulu Yawe.
Currently Selected:
Esiceli 47: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
