Esiceli 44
44
1Popele apo alimbwesesye pansila yakumulyaŋgo waposonde uwakumulenda uswetelele ulolele kumutulesuŵa; lomba paliiselwe-ko. 2Peŋka ŵaYawe ŵalilaŵile kuli neŵo ati, Pamulyaŋgo uyu pakalukwiselwe-ko, tekuti pakesulwe-ko, kaŵili papo'muntu ukenjilako, pakuti ŵaYawe, Lesa wakuIsilaeli, ŵali ŵainjila-ko; pakuti pali fyefyo pakalukwiselwe-ko. 3Sombi icileme, co cikekala-mo ati cileme, mukulukulye' fyakulya pamenso aŵaYawe; cikenjilamo pansila yakucansense icakumulyaŋgo, nekulukufuma-mo pansila yakopeloʼko.
4Popele apo alimfisisye pansila yakumulyaŋgo uwakunofu pamenso pananda; peŋka nalilolele, lomba kuŵona, uŵuleme bwaŵaYawe bwaliiswile iŋanda yaŵaYawe; eli niŋgawa pansi ubwifuneme. 5Popele apo ŵaYawe ŵalilaŵile kuli neŵo ati, Wemwana wamuntunsi, teko'mutima, uŵone nakumenso oŵe, umfwe nakumatwi oŵe fyonse'fyo ifi ndukulaŵila kuli weŵo ifyakusololola konse ukwakunanda yaŵaYawe, nefyakumafunde akuko onse; uteke umutima pamwinjililo uwakunanda pamo nemifumino yonse iyakumulenda uswetelele. 6Popele ukalaŵile kuŵakwalucila, ekuwananda yakuIsilaeli ati: ŴaSikulu Yawe ŵalukulaŵile'fi ati: Mwewananda yakuIsilaeli, filikumene kuli mweŵo ifyafipakaŵi fyenu fyonse, 7pakweŵa'ti mwainjisya aŵenafyalo awakuwule'cisilamu icakumutima neŵakuŵule'cisilamu icakumunefu, ati ŵekale mumulenda wanji uswetelele, mukuupusyanya, enanda yanji, paku posa siŋkwa wanji, nemafuta nemilopa; lomba ŵo ŵapulaisya ukulayana kwanji, mukulunda-po pafipakaŵi fyenu fyonse. 8Kaŵili tamwalamine ifintu fyanji ifiswetelele; sombi mwaliliikalicile mweŵene aŵakulama ukuŵula kwanji mumulenda wanji uswetelele.
9ŴaSikulu Yawe ŵalukulaŵile'fi ati, Papo'mwinafyalo uwakuŵulo'kusilimuka mumutima newakuŵulo'kusilimuka mumunefu, uŋgenjila mumulenda wanji uswetelele, uwapaŵenafyalo ŵonse aŵali pakati paŵana ŵakwe Isilaeli. 10Sombi aŵena-Lefai aŵafumine ukutali kuli neŵo, pakupasuka aŵaIsilaeli, aŵapasucile pali neŵo ukulukulonda ifiŵumbwaŵumbwa fyaŵo, ŵo eŵakapinta umulandu wakusendamakwaŵo. 11Naŋgawa nifyefyo ŵakalukuli ŵapyunjisi mumulenda wanji uswetelele, ili ŵali naŵucilolo kumilyaŋgo iyakunanda, nekulukupyuŋga namuŋanda: ŵo ŵakepaya umulambu wakoca, newakuŵepaila aŵantu; naŵo ŵakemakana pamenso aŵo mukuŵapyunjila. 12Pakuti ŵalukuŵapyunjila pamenso afiŵumbwaŵumbwa fyaŵo, nekuŵa cicicilo cakusendama kuŵananda yakuIsilaeli; pakuti pali fyefyo naŵasuntwila ukuŵoko kwanji; ŵakalukupinta umulandu wakusendama kwaŵo; efilukulaŵila ŵaSikulu Yawe. 13Lomba tekuti ŵakapalamine kuli neŵo ukulukuncitila uŵupapatilisi, neli kupalamina kufintu fyanji ifiswetelele fyonse, kufintu ifyo ifiswetelele lukoso swete, tau; sombi ŵakalukupinta insoni syaŵo nefipakaŵi fyaŵo ifyo ŵacitile. 14Naŋgawa nifyefyo ŋkawekalika ati ŵakalukulama iŋanda, pamilimo yakuko yonse, napali fyefyo fyonse ifikacitwamo'mo.
15Sombi aŵo-ŵapapatilisi aŵena-Lefai, aŵana ŵakwe Sadoko, aŵalukulama umulenda wanji uswetelele pakupasuka kuli neŵo aŵana ŵakwe Isilaeli, ŵo eŵakapalamina kuli neŵo mukumpyunjila; ka ŵili ŵo ŵakemakana pamenso anji mukumposela amafuta nemilopa, efilukulaŵila ŵaSikulu Yawe. 16Ŵo wakenjila namumulenda wanji uswetelele, nekupalamina kwitebulu lyanji mukumpyunjila, nekulukulama ukuwula kwanji.
17Pakaŵa ati, pakwinjila ŵo mumilyaŋgo iyakuluŵansa ulwamukati, ŵakafwala ifyakufwala fyansalu; tekuti pafike pali ŵo amasako ambele le, pakulukupyuŋga ŵo mumilyaŋgo yakuluŵansa lwamukati namukati lukoso. 18Kaŵili ŵakalukuli netwapamitwi utwansalu, naŵakaputula ŵansalu pamunda syaŵo; tekuti ŵafwale icakuleŋgesya ukutukuta. 19Popele pakufuma ŵo ukuya kuluŵansa lwaposonde ekuluŵansa lwaposonde ukuya kuŵantu, ŵakafule ifyakufwala fyaŵo ifyo ŵapyuŋga nafyo, ŵafiŵike mufipinda ifiswetelele, eli ŵaŋgafwala ifyakufwala fimbi, ŵekesa mukuswesya aŵantu kufyakufwala fyaŵo. 20Kaŵili taŵakameta kumitwi yaŵo, neli kusumina ati imisisi yaŵo italimpe; ŵakacese lukoso kumitwi yaŵo. 21Kaŵili papo' mupapatilisi uŋganwa imfaina, pakwinjila napaluŵansa lwamukati. 22Tekuti ŵope aŵakasi ŵamukamfwilwe neli ŵakukanwa kuŵalume; sombi ŵakope aŵanakasi aŵaswetele aŵapaŵana ŵaŋanda yakuIsilaeli, kani niŵamukamfwilwe aŵafwililwe aŵapapatilisi. 23Popele ŵakasambisye aŵantu ŵanji ukulekana ukuli pakati pafiswetelele nefyansiku syonse, wateŋgesye ati ŵesiŵe ukulekanya ifitafiswetelele nefiswetelele. 24Kaŵili pakupicisya aŵantu, ŵakemakane ukulukusololola; ŵakapiniko'mulandu koti kusololola kwanji; kaŵili ŵakalukulama amafunde anji nekufunda kwanji pafitenje fyanji fyonse ifyansicilwe; naŵo kaŵili ŵakacindike ŵasabata ŵanji. 25Tekuti ŵakafike kuŵantu aŵafwile ŵonse ukulukuliŵifya; sombi pakuti pali ŵawisiŵo neli niŵanyinaŵo, neli ŵana aŵalalume neli ŵanakasi, neli ŵakwaŵo, neli niŋkasi syaŵo isitasikwete-ŵalume, pakuti pali ŵaŵo ŵaŋgesiŵa ukuliŵifya. 26Popele, pakweŵa ati uwakuŵe'fyo waswesiwa, wakamupendele insiku sisanu nasiŵili. 27Lomba pakasuŵa ako akenjila mumulenda uswetelele, paluŵansa lwamukati, mukupyuŋga mumulenda uswetelele, akapose umulambu wapafyakuŵifya; efilukulaŵila ŵaSikulu Yawe. 28Kaŵili ŵakaŵa neŵupyani: Neŵo nineŵupyani bwaŵo. Tekuti mukaŵapele icamaŵoni kuIsilaeli: Neŵo nineŵuŵoni bwaŵo. 29Ŵo ŵakalukulya umulambu wawuŋga, nemulambu wapafyakuŵifya, nemulambu wapamulandu; ifintu fyonse ifiposelwe kuli ŵaLesa muIsilaeli fikalukuli fyaŵo. 30Kaŵili ifyakutaŋga fyamitulu yonse iyafintu fyonse, nemilambu yonse iyafintu fyonse, pamilambu yenu yonse lukoso, fikalukuli fyaŵapapatilisi. Mukamupele kaŵili umupapatilisi ifyakutaŋga pawusuŋga bwenu, mukuleŋgesya ati isyuko liikale pananda yoŵe. 31Aŵapapatilisi tekuti ŵalye fyonse ifyakulifwila neli fyakusantalwa, kani cuni kani ninama.
Currently Selected:
Esiceli 44: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
