Esiceli 43
43
1Panuma pali fyefyo alimfisisye kumulyaŋgo, ekumulyaŋgo ulolele kumutulesuŵa; 2lomba kuŵona, uŵuleme bwaŵaLesa ŵakuIsilaeli bwaliisile ukufuma kunsila yakumutulesuŵa; isiwi lyaŵo lyalipalile isiwi lyamenda aenji; necalo capansi nekusasamuka kuŵuleme bwaŵo. 3Lomba fyali koti mekalilo akuŵona uko nabwene, ekoti kuŵona uko nabwene ili naisile mukonala umusi; kaŵili ifyakuŵona fyalipalile ukuŵona uko nabwene kunika yaCebala; eli niŋgawa ubwifuneme. 4Peŋka uŵuleme bwaŵaYawe bwaliinjile muŋanda pansila yakumulyaŋgo ulolele kumutulesuŵa. 5Peŋka umupasi walinsuntwile nekumfisya napaluŵansa lwapakati; lomba kuŵona, uŵuleme bwaŵaYawe bwaliiswile iŋanda. 6Popele naliumfwile umbi alukulaŵila kuli neŵo ili ali muŋanda; lomba nikumuntu aliimakene muceni canji. 7Naye walilaŵile kuli neŵo ati:
Wemwana wamuntunsi, apa nipamupunda weteŵe lyanji, epantu pamukati kamakasa anji, apo ŋkalukwikalilila pakati paŵana ŵakwe Isilaeli insiku syamuyayaya. Popele awananda yakuIsilaeli tekuti ŵakalukuŵifya liŵili isina lyanji iliswetelele, ŵo nemfumu syaŵo, kuŵucencemesi bwaŵo nakufitumbi fyamfumu syaŵo pantu paŵo apasuntucile; 8pakuŵika icibwambilo caŵo muceni cacibwambilo canji, neciti caŵo icakumulyaŋgo muceni caciti canji; lomba pali iciŵumba lukoso pakati pali neŵo naŵo aŵene. Kaŵili ŵaliŵifisye isina lyanji iliswetelele kufipakaŵi fyaŵo ifyo ŵacitile; pakuti pali fyefyo naŵasilisya lukoso muŵukali bwanji. 9Pano ŋgaŵafumye ukutali kuli neŵo uŵucencemesi bwaŵo nefitumbi fyamfumu syaŵo, eli ŋkalukwikala pakati pali ŵo insiku syamuyayaya.
10Weŵo, wemwana wamuntunsi, kobwenesye iŋanda kuwananda ŵakuIsilaeli, ati ŋgaŵaŵe nensoni pakuti pakusendama kwaŵo; ŵesye icamekalilo cakuko. 11Peŋka, kani ŵo ŵaŵa nensoni pakuti pali fyefyo fyonse ifi ŵacitile, ukaŵesiŵisye amekalilo ananda neŵelo lyaiyo, nemifumino yaiyo, neminjililo yaiyo, nekucitwa konse ukwakuko, nefyakusololola fyonse ifyakuko, nemekalilo onse akuko, nemafunde onse akuko, ukafilembe pamenso aŵo; ati ŋgaŵalame amekalilo onse akuko, nefyakusololola fyonse ifyakuko, ukulukuficita.
12Ili efunde Iyakunanda: peulu palupili, umupaka wonse wakuko apasiŋgulucile ukalukuswetelele lukoso swete. Ŵona-ko, ili efunde lyakunanda.
13Kaŵili ifi efyakwesya ifyaconto pamakubita (ikubita ili lyalikumene ikubita neŵukulu bwacipanta peulu): pansi pakakumana ikubita, nebwipi bwakuko likubita, nemukombelo wakuko kumpelo yakuko apasiŋgulucile nekukumana koti kwesya kwacipanta; lomba ico cikalukuli capansi icakuconto. 14Popele ukufuma pansi lukoso ukufika kuntekelo yapansi kukakumana amakubita aŵili, nebwipi bwakuko likubita limo; kaŵili ukufuma kuntekelo inini ukufika kuntekelo ikulu kukakumana amakubita ane, nebwipi bwakuko likubita. 15Kaŵili iconto capeulu cikakumana amakubita ane; nakaŵili ukufuma kwisiko lyakuconto nekuya peulu kukalukuli-po amaseŋgo ane. 16Lomba isiko lyakuconto likakumana uŵutali bwamakubita ikumi naaŵili, nebwipi bwamakubita ikumi naaŵili; imbali syonane ili siliŋgene, 17Ka ŵili intekelo ikakumana uŵutali bwamakubita ikumi naane, nebwipi bwamakubita ikumi naane, pambali syaiyo syonane; nemukombelo apasiŋgulucile nawo ukakumana iyafu Iyekubita; necapansi cakuko apasiŋgulucile naco cikakumana ikubita; kaŵili ifitantilo fyakuko fikalola kumutulesuŵa.
18Popele apo alilaŵile kuli neŵo ati: Wemwana wamuntunsi, ŵaSikulu Yawe ŵalukulaŵile'fi ati: Uku ekusololola ukwakuconto pakasuŵa ako ŵakacicita, mukuposela-po imilambu yakoca, namukusansila-po imilopa. 19Aŵapapatilisi aŵena-Lefai aŵapaŵana ŵakwe Sadoko, aŵali apepi pali neŵo mukumpyunjila, ukaŵapele umusune umwana ati mulambu wapafyakuŵifya, efilukulaŵila ŵaSikulu Yawe. 20Peŋka ukaŵule pamilopa yakuko, nekwiŵika pamaseŋgo akuko onane, napamakoŋko ona ne akuntekelo, napamukombelo apasiŋgulucile; fyopele'fyo ukaciswesye, ucicitile icakulamwina. 21Kaŵili ukaŵule umusune waŋombe uwamulambu wapafyakuŵifya, lomba ye akamoce pantu pananda apaansicilwe, pesonde lyamulenda uswetelele. 22Popele pakasuŵa kaŵusiŵili ukapose pepe uwakuŵule'cisemba mulambu wapafyakuŵifya; eli ŵaŋgaciswesya iconto fyopele'fyo ifi ŵaciswesesye kumusune waŋombe, 23Pakusila weŵo ukuciswesya, ukapose umusune umwana uwakuŵule'cisemba, nembelele iyalalume iyapetaŋga iyakuŵule'cisemba. 24Popele ukasipalamisye pamenso aŵaYawe, peŋka aŵapapatilisi ŵakasanse pali syo umucele, ŵasipose mulambu wakoca uwakuli ŵaYawe. 25Insiku sisanu nasiŵili ukalukwansika insiku nansiku imbusi yamulambu Ilwapafyakuŵifya; kaŵili ŵakaansike umusune umwana pamo nembelele iyalalume iyapetaŋga, iyakuŵule'cisemba. 26Insiku sisanu nasiŵili ŵakalukucitila iconto ukulamwina, nekulukuciswesya; fyopele'fyo ŵaŋgakumanya ifyakuko. 27Popele, pakukonsya ŵo insiku, pakaŵa ati, pakasuŵa kaŵusisanu nasitatu napantanjile, aŵapapatilisi ŵakaposela paconto imilambu yenu iyakoca nemilambu yenu iyaŵutende; popele naneŵo eli ŋkamupokeleleni, efilukulaŵila ŵaSikulu Yawe.
Currently Selected:
Esiceli 43: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
