Esiceli 41
41
1Popele apo alimfisisye lwitempuli, nekwesya ifiti, ubwipi bwamakubita asanu nalimo kuluŵali lumo, nebwipi bwamakubita asanu nalimo kuluŵali lumbi, ekwesya kwabwipi bwesema. 2Kaŵili ubwipi bwamwinjililo bwalikumene amakubita ikumi; nasyo imbali syakumwinjililo syalikumene amakubita asanu kuluŵali lumo nemakubita asanu kuluŵali lumbi. Peŋka kaesya uŵutali bwakuko ubwamakubita amakumi ane, nebwipi bwamakubita amakumi aŵili. 3Popele apo aliinjile mukati, nekwesya ifiti fyonse ifyakumwinjililo cimo cimo, makubita aŵili, nemwinjililo uwine makubita asanu nalimo, nebwipi bwamwinjililo makubita asanu naaŵili. 4Kaŵili aliesesye uŵutali bwakuko, bwali makubita amakumi aŵili, nebwipi makubita amakumi aŵili, pamenso etempuli. Peŋka kaalaŵila kuli neŵo ati: Apa epantu apaswetelele lukoso.
5Popele apo aliesesye iciŵumba cananda, makubita asanu nalimo; nebwipi bwaŵandandanda ŵafipinda, makubita ane apasiŋgulucile iŋanda ponse ponse. 6Lomba pali ŵandandanda ŵafipinda ŵatatu, umbi peulu pauŵyakwe; ndandanda umo wali nefipinda amakumi atatu; lomba fyo fyali kuciŵumba cakunanda, icaiŵacilwe ifipinde'fyo ifisiŋgulucile, ati fiikate-ko, fiŋgenjila muciŵumba cakunanda. 7Kaŵili ŵandandanda ŵafipinda ŵalikulile pakunina peulu pakusiŋguluka; pakuti ukusiŋguluka kwananda kwaliile peulu ponse ponse; pakuti pali fyefyo iŋanda yalikulile mubwipi pakuya peulu; fyopele'fyo umuntu aŋganina peulu ukufuma pansi mucipinda capakati. 8Nalibwene kaŵili ati iŋanda yali necakwiŵaka icisuntucile ponse ponse; ifyakwiŵacila pansi ifyakuli ŵandandanda ŵafipinda fyalikumene itete iliŵuluŵulu ilyamakubita akulu asanu nalimo. 9Umutika waciŵumba, icakuli ŵandandanda ŵafipinda walikumene posonde amakubita asanu; lomba ifyakusyala-po emupunda waŵandandanda ŵafipinda aŵakuŋanda, 10Kaŵili pakati pafipinda pali ubwipi bwamakubita amakumi apasiŋgulucile iŋanda ponse ponse. 11Kaŵili imilyaŋgo yakuli ŵandandanda ŵafipinda yalilolele pantu apasyele-po, umulyaŋgo umo ukulola kunofu, nemulyaŋgo umbi nawo ukulola kusaufu; kaŵili ubwipi bwapantu apasyele-po bwalikumene amakubita asanu apasiŋgulucile.
12Lomba icakwiŵaka icali pamenso apantu apalekene kuluŵali lwakumbonsi cali nebwipi bwamakubita amakumi asanu naaŵili; kaŵili iciŵumba cacakwiŵaka cali nemutika wamakubita asanu apasiŋgulucile, neŵutali bwakuko nekukumana amakubita amakumi asanu naane. 13Fyopele'fyo aliesesye iŋanda, uŵutali bwamakubita umwanda umo; napantu apalekene, necakwiŵaka pamo nefiŵumba fyakuko, uŵutali bwamakubita umwanda umo; 14pamo nebwipi bwapamenso pananda, nebwapantu apalekene, ukuya kumutulesuŵa, makubita umwanda umo.
15Kaŵili aliesesye uŵutali bwacakwiŵaka pamenso apantu apalekene, apali panuma yacico, pamo nensila syapeulu isyakuko kuluŵali lumo nakuluŵali lumbi nalo, makubita umwanda umo; netempuli lyamukati, nefyansense ifyakuluŵansa; 16nefibwambilo, netumbeluka utwiselwe, nensila syapeulu apasiŋgulucile pali ŵandandanda ŵakuko ŵotatu, apasiŋkamene necibwambilo, nemitenje yamatabwa apasiŋgulucile, nematabwa kumpelo ukufuma pansi ukufika kutumbeluka; sombi utumbeluka twalifimbilwe-po. 17Peulu pamilyaŋgo iyakunanda yamukati naposonde, napaciŵumba conse apasiŋgulucile mukati naposonde, pali nekwesiwa. 18Lomba palicitilwe naŵakelubi nemalala; ilala lyali pakati pali ŵakelubi ŵaŵili; kaŵili ŵakelubi ŵonse umo umo ŵali napamenso paŵili; 19ifyo, amenso amuntu alilolele kwilala kuluŵali lumo, nemenso amupempela ŵaŋkalamu nekulola kwilala kuluŵali lumbi; fyalicitilwe ifyo monse muŋanda apasiŋgulucile. 20Ukufuma pansi ukufika peulu pamulyaŋgo palicitilwe ŵakelubi nemalala; fyopele'fyo eciŵumba icakwitempuli. 21Ifyeti mpuli, ifiti ifyakumulyaŋgo fyalilolele pane; ifyapamenso pamulenda uswetelele, amekalilo apapo alipalene nemekalilo etempuli. 22Iconto calicitilwe kumatabwa, uŵutali bwakwiulu bwalikumene amakubita atatu, neŵutali bwacico naŵo makubita aŵili; lomba amakoŋko akuko neŵutali bwakuko nefiŵumba fyakuko fyali fyamatabwa. Popele alilaŵile kuli neŵo ati: Ili litebulu ilili pamenso aŵaYawe. 23Lomba itempuli nemulenda uswetelele fyali nemilyaŋgo iŵili. 24Lomba imilyaŋgo yoŵilo umo umo yali nefiŵi fiŵili, ifiŵi ifyakwaluka; ifiŵi fiŵili kumulyaŋgo umo, nafyo ifiŵi fiŵili kumulyaŋgo umbi nawo. 25Lomba palicitilwe pali fyo, pafiŵi ifyakwitempuli, ŵakelubi nemalala, koti nifyefyo ifyacitilwe pafiŵumba; kaŵili pali amatabwa aciti amutika pamenso pacansense posonde. 26Kaŵili pali utumbeluka utwiselwe nemalala paluŵali lumo napaluŵali lumbi nalo, pambali syacansense; ifyo efyali ŵandandanda ŵafipinda ifyakunanda, nematabwa amutika.
Currently Selected:
Esiceli 41: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
