Ifyakufuma 9
9
1Popele apo ŵaYawe ŵalilaŵile kuli Mose ati: Injila kuli Falo, umuŵule ati: ŴaYawe Lesa waŵaEbeya ŵalaŵile'fi ati: Ŵaleke aŵantu ŵanji ati ŵakampyunjile. 2Pakuti kani ukane ukuŵaleka nekulukuŵekatilila lukoso, 3ŵona, ukuwoko kwaŵaYawe kuli panama isyapacembelelo, napali ŵakafwalo, napamboŋgolo, napaŋgamela, napamataŋga aŋombe neambelele; pakalukuli akaŋkolomwena akalemene mako sa. 4Kaŵili ŵaYawe ŵakacito'mupaka pakati panama syaŵaIsilaeli nenama syakuIjipiti; lomba tapakafwa-po neli kantu pali fyo fyonse ifyakuŵa-Isilaeli. 5Popele ŵaYawe ŵalilaile impindi iyansicilwe ati: Mailo ŵaYawe ŵakacite'fyo mucalo. 6Popele icine ŵaYawe ŵalicitile'fyo ŋgamailo, peŋka kasifwa inama syonse isyamucalo caIjipiti; sombi panama syaŵaIsilaeli tapafwile-po neli imo. 7Popele Falo walitumine aŵantu; lomba, kuŵona, tapafwile-po neli imo panama syaŵaIsilaeli. Sombi umutima wakwe Falo wali necitala; taasumine ati ŵaye aŵantu.
8Popele apo ŵaYawe ŵalilaŵile kuli Mose nakuli Aloni ati: Kamuneni mumapi amatoi apesiko; popele Mose ŋgaapupile mwiulu pamenso akwe Falo. 9Lomba akaaluka likuŋgu linini linini ponse pacalo caIjipiti; kaŵili akaŵa mapute alukufimba nemafina paŵantu napanama, monse mucalo caIjipiti. 10Popele apo ŵalikamwine amatoi apesiko, nekwimakana pamenso akwe Falo; popele Mose waliapupile mwi ulu; eli aŋgaaluka mapute alukufimba nemafina paŵantu napanama. 11Lomba neŵalaye taŵaisiŵile ukwimakana pamenso akwe Mose pakuti pamapute; pakuti amapute ali paŵalaye napaŵaIjipiti ŵonse. 12Popele ŵaYawe ŵalikosesye umutima wakwe Falo, naye taaŵomfwile; koti nifyefyo ifi ŵalaŵile ŵaYawe kuli Mose.
13Popele apo ŵaYawe ŵalilaŵile kuli Mose ati: Ukacelele ulucelocelo, ukemaka ne pamenso akwe Falo, ukalaŵile kuli ye ati: ŴaYawe Lesa waŵaEbeya ŵalaŵile'fi ati: Ŵalekeni aŵantu ŵanji, ati ŵakampyunjile. 14Pakuti inompindi nakutume'fincinsya fyanji fyonse pamutima wenu, napaŵapyunjisi ŵenu, napaŵantu ŵenu; ati mukesiwe ati ponse pacalo capansi tapali-po upalene naneŵo neli umo. 15Kaŵili ŵukumo niŋgatambiko'kuwoko kwanji, niŋgamupameni mweŵo nekuŵapama aŵantu ŵenu kumwalo, namweŵo eli muŋgapinikwa ukumufumyeni pacalo: 16sombi icine nipakuti pali fifi mwimicileni, ati mulanjisyeni uŵukulu bwanji, nakaŵili ati isina lyanji likalukutulisiwa monse mucalo capansi. 17Kani mucilisuntula ukulwa neŵantu ŵanji, mwikasumina ati ŵaye? 18Ŵoneni, mailo pampindi ino ŋkalokesye'mvula yamabwe akukatasyo'kwakuti, akuŵe'fyo lomba taaŋgawa mucalo caIjipiti ukufuma pampindi iyo caleŋgelwe ukufika nakuli ŵuŵuno-ŵukumo. 19Pano lomba mutume aŵantu, musiinjisisye bwaŋgu inama syenu nafyo fyonse'fyo ifi muli nafyo mwiŵala; pakuti aŵantu ŵonse nenama syonse isikasaŋgwa mwiŵala, isyakuwulo'kuletwa kumusi, imfula yama bwe ikasiloka, nasyo sikafwa.
20Popele aŵantu ŵakwe Falo, uyo uwatinine isi wi lyaŵaYawe, waliŵapulwisye aŵapyunjisi ŵakwe nenama syakwe ukuŵenjisisya mumananda: 21kaŵili Ilyo utaatondele isiwi lyaŵa Yawe waliwasile aŵapyunjisi ŵakwe neŋombe syakwe mwiŵala.
22Popele apo ŵaYawe ŵalilaŵile kuli Mose ati: Tambiko'kuŵoko koŵe kwiulu, ati paloke imfula yama bwe ponse pacalo caIjipiti, napaŵantu napanama, napambuto syonse isyamumaŵala, monse mucalo caIjipiti. 23Peŋka Mose ka atambika akasako kakwe kwiulu; naŵo ŵaYawe nekutuma ukululuma nemfula yamabwe, kaŵili umulilo nekuŵyatacila pansi pacalo; popele ŵa Yawe ŵalilokesye iyamabwe pacalo caIjipiti. 24Fyopele' fyo pali iyamabwe, nemulilo upataŋkene nemabwe, akukatasyo'kwakuti, akuŵe'fyo lomba taaŵele monse mucalo caIjipiti ukufuma kumpindi iyo ŵaŵele mukoka waŵantu aŵaIjipiti. 25Popele amabwe alipamine fyonse ifyamumaŵala, neŵantu nenama, monse mucalo caIjipiti; kaŵili amabwe alipamine imbuto syonse isyamumaŵala, nekukonale'miti yonse iyamumaŵala. 26Sombi mucalo caGosyeni mweŋka, umwali aŵaIsilaeli, tapali-po imfula yamabwe neli panini.
27Popele Falo walitumine aŵantu, nekuŵeta Mose naAloni, nekulaŵila kuli ŵo ati: Naŵifya iyi-mpindi; ŵaYawe ewaluŋgeme, sombi neŵo neŵantu ŵanji tuli ŵakuŵifya. 28Mupapatile kuli ŵaYawe; pakuti kwaŵa ukululuma nemfula yamabwe iyakukumana; popele ŋkamulekeni, tekuti mukalukusyala pano. 29Kumfwa Mose walaŵila kuli ye ati: Impindi yopele'yo iyi nakufuma mumusi, nakutambicisya amaŵoko anji kuli ŵaYawe; ukululuma kwakucileka, kaŵili tesi pakulukuli naimbi imfula yamabwe; ati mwisiŵe ati icalo capa nsi caŵaYawe. 30Sombi mweŵo neŵantu ŵenu, ndiisi ati tesi muŵatonde ŵaYawe Lesa ŵukumo.
31Popele imiku sa nemabali alipaminwe; pakuti amabali kale aikete nemitwi, nemikusa nayo kale yaikete. 32Sombi tiligu nemasaka taapaminwe: pakuti lomba taaiŋgamena.
33Popele apo Mose walifumine mumusi ukumusya Falo, nekutambicisya' maŵoko akwe kuli ŵa Yawe; lomba ukululuma nemfula yama bwe nekucileka, nemfula kaŵili tayalokele pacalo. 34Popele apo Falo, ili abwene ati imfula neyamabwe nekululuma kwacileka, alicilile ukuŵifya, nekukosyo'mutima wakwe, umwine neŵantu ŵakwe. 35Lombo'mutima wakwe Falo walikosele, taasumine ati aŵaIsilaeli ŵaye; koti nifyefyo ifi ŵalaŵile ŵaYawe mukanwa kakwe Mose.
Currently Selected:
Ifyakufuma 9: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
