Ifyakufuma 8
8
1Popele apo ŵaYawe ŵalilaŵile kuli Mose ati: Injila kuli Falo, ulaŵile kuli ye ati: ŴaYawe ŵalaŵile'fi ati: Ŵalekeni aŵantu ŵanji, ati ŵakampyunjile, 2Lomba kani mukane ukuŵaleka, ŵoneni, nakupame'calo cenu pamipaka yonse kuli ŵaŵombwe; 3popele ŵakufulila munika ŵaŵombwe, aŵakutuntucila mukwinjila muŋanda yenu, namucipinda cenu icakulalila-mo, napaŵulo bwenu, namuŋanda syaŵapyunjisi ŵenu, napaŵantu ŵenu, namufyakwipicila-mo fyenu, namumaŋkuwala enu akukasila-mo; 4kaŵili ŵaŵombwe ŵakufumina pali mweŵo, napaŵantu ŵenu, napaŵapyunjisi ŵenu ŵonse.
5Popele apo ŵaYawe ŵalilaŵile kuli Mose ati: Laŵila kuli Aloni ati: Tambiko'kuŵoko koŵe nekasako koŵe peulu pamanika, napatunika, napamasiŵa, ukaŵatuntusisye ŵaŵombwe pacalo caIjipiti. 6Peŋka Aleni kaatambiko'kuŵoko kwakwe peulu pamenda amucalo caIjipiti; popele ŵaŵombwe kaŵafuma, kaŵaputa ponse pacalo caIjipiti.
7Popele neŵalaye kaŵacita koti nifyopele'fyo kubwaŋga bwaŵo; kaŵatuntusisya ŵaŵombwe pacalo ca Ijipiti.
8Popele apo Falo waliŵetile Mose naAloni, nekulaŵila ati: Mumpapatilile kuli ŵaYawe ati ŵafumye fiŵombwe kuli neŵo nakuŵantu ŵanji; eli ŋkawaleka aŵantu ati ŵakepaye imilambu iyakuli ŵaYawe. 9Popele Mose walilaŵile kuli Falo ati: Munjikalile neŵuleme: mbaisampindi mupapatilileni nekuŵapapatilila aŵapyunjisi ŵenu neŵantu ŵenu, ati ŵakepaiwe ŵaŵombwe ukuŵafumya kuli mweŵo namumananda enu, ŵalukusyala munika mweŋka? Kumfwa ati: Nimailo. 10Kumfwa Mose ati: Ŋgafikaŵe koti masiwi enu; ati mukesiŵe ati tapali-po upalene naŵaYawe Lesa wesu. 11Popele ŵaŵombwe ŵakafuma kuli mweŵo, nakumananda enu, nakuwapyunjisi ŵenu, nakuŵantu ŵenu; ŵakalukusyala munika mweŋka.
12Lomba Mose naAloni kaŵafuma-po pali Falo: popele Mose walililile kuli ŵaYawe ifyakuli ŵaŵombwe aŵo ŵaletele pali Falo. 13Popele apo ŵaYawe ŵalicitile koti lisiwi lyakwe Mose; lomba fiŵombwe fyalifwilile mumananda, namumansa, namumaŵala. 14Popele ŵalifiolele pamipili; lomba necalo kacinuŋka, 15Sombi Falo, ili abwene ati pali ukutusya, alikosesye umutima wakwe, taaŵomfwile; koti nifyefyo ifi ŵalaŵile ŵaYawe.
16Popele apo ŵaYawe ŵalilaŵile kuli Mose ati: Ulaŵile kuli Aloni ati: Tambika'kasako koŵe, upame pefukutu lya pansi, ati lyaluke ninda monse mucalo caIjipiti. 17Naŵo ŵalicitile'fyo; lomba Aloni walitambicile ukuŵoko kwakwe nekasako kakwe, nekupama pefukutu lyapansi, popele paliŵele nenda paŵantu napanama; ifukutu lyapansi lyonse lyalialucile ninda monse mucalo caIjipiti. 18Kaŵili aŵalaye ŵalicitile'fyo kubwaŋga bwaŵo mukulete'nda, sombi taŵaisiŵile ukukucita: lomba pali nenda paŵantu napanama. 19Popele apo aŵalaye ŵalilaŵile kuli Falo ati: Uyu munwe waŵaLesa. Sombi umutima wakwe Falo walikosele, taaŵomfwilisye; koti nifyefyo ifi ŵalaŵile ŵaYawe.
20Popele apo ŵaYawe ŵalilaŵile kuli Mose ati: Ukacelele ulucelocelo, ukemakane pamenso akwe Falo; ŵona, akafuma mukuya kumenda; ukalaŵile kuli ye ati: ŴaYawe ŵalaŵile'fi ati: Ŵalekeni aŵantu ŵanji ati ŵakampyunjile. 21Sombi kani tesi muŵaleke, ŵoneni, ŋkatuma ŵalunsi aŵenji makosa pali mweŵo, napaŵapyunjisi ŵenu, napaŵantu ŵenu, namumananda enu; popele amananda aŵaIjipiti akesula ŵalunsi aŵakuti ubwinji, napa nsi kaŵili apo ŵali pakakumana lukoso ŵalunsi. 22Popele akasuŵa ako ŋkapinika-ko icalo caGosyeni, umulukwikala aŵantu ŵanji, liŋgekala-mo iŵumba lyaŵalunsi neli limo; ati mukesiŵe ati neŵo nineŵaYawe pakati pacalo. 23Popele ŋkaŵiko'mupaka pakati paŵantu ŵanji neŵantu ŵenu; akesiŵilo ako kakalukuli mailo. 24Cine ŵacitile'fyo ŵaYawe; popele palinyemucile filunsi ifyakuti ubwinji muŋanda yakwe Falo, namumananda aŵapyunjisi ŵakwe; kaŵili monse mucalo caIjipiti icalo caliŵolele pakuti pakunyemuka kwaŵalunsi.
25Popele apo Falo waliŵetile Mose naAloni, nekulaŵila ati: Kamuyeni, mukaŵepaile ŵaLesa ŵenu imilambu mucalo. 26Kumfwa Mose ati: Tafyelelwe ukucite'fyo; pakuti tukepaye'milambu iyacipakaŵi caŵaIjipiti iyakuli ŵaYawe Lesa wesu; ŵoneni, kansi tukepaye imilambu iyacipakaŵi caŵaIjipiti pamenso aŵo, naŵo nekuŵulo'kutuposa amabwe? 27Tukendo'lwendo lwansiku sitatu mumpaŋga, nekuŵepaile'milambu ŵaYawe Lesa wesu, koti nifyefyo ifi ŵakatufunda. 28Kumfwa Falo ati: Ŋkamulekeni ati mukaŵepaile ŵaYawe Lesa wenu mumpaŋga: sombi tesi mukaye ukutali: mumpapatilile. 29Popele Mose ati: Ŵoneni ndukufuma kuli mweŵo, lomba nakupapatila ŵaYawe ati filunsi ŋgafikafume-po pali ŵaFalo, napaŵapyunjisi ŵaŵo, napaŵantu ŵaŵo, mailo: sombi ŵaFalo ŵekatumpaika liŵili, ukuwulo'kusumina ati ŵaye aŵantu mukuŵepaila ŵaYawe imilambu.
30Popele apo Mose walifumine pali Falo, nekuŵapapatila ŵaYawe. 31Popele ŵaYawe ŵalicitile koti lisiwi lyakwe Mose; nekufumya filunsi kuli Falo nakuŵapyunjisi ŵakwe nakuŵantu ŵakwe. 32Sombi Falo walikosesye umutima wakwe nayeyo-mpindi kaŵili, taaŵalekele aŵantu.
Currently Selected:
Ifyakufuma 8: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
