Ifyakufuma 10
10
1Popele apo ŵaYawe ŵalilaŵile kuli Mose ati: Injila kuli Falo; pakuti nakosyo'mutima wakwe nemitima yaŵantu ŵakwe ati ŋkalanjisye utu-twisiŵilo twanji pakati pali ŵo; 2nakaŵili ati ukafituŵe mumatwi amwana woŵe neamwinsikulu woŵe, ifintu ifyo ifi ncitile pacalo caIjipiti, netwisiŵilo twanji uto ncitile pakati pali ŵo; ati mukesiŵe ati neŵo eneŵaYawe.
3Popele Mose naAloni ŵaliinjile kuli Falo, nekulaŵila kuli ye ati: WaYawe Lesa waŵaEbeya ŵalaŵile'fi ati: Mbempindi yasyani mwakulukukano'kulicefya pamenso anji? Ŵalekeni aŵantu ŵanji, ati ŵakampyunjile. 4Sombi kani mukane ukuŵaleka aŵantu ŵanji, ŵoneni, mailo ŋkasilete'nsye mumi paka yenu; 5popele sikafimba-po pacalo ponse, ati aŵantu tekuti ŵakaŵone-po icalo; popele sikalye'fyasyele-po pali fyefyo ifyapulucile, ifyo ifilukumusyalileni-po ukupuluka kumfula yamabwe; kaŵili sikalye'miti yonse ilukumumeneneni mumaŵala; 6kaŵili amananda enu akesule'nsye, pamo nemananda aŵapyunjisi ŵenu ŵonse, nemananda aŵaIjipiti ŵonse; ifyakuŵe'fyo lomba ŵawisinwe naŵawisiŵo kaŵili taŵabwene, ukufuma kukasuŵa ako ŵaikele mucalo capa nsi ukufika nakukasuŵa kalelo. Naye Mose walialucile, nekufuma-po pali Falo.
7Popele apo aŵantu ŵakwe Falo ŵalilaŵile kuli ye ati: Mboyu-muntu akaleka lisa ukutukatasye'fi? Ŵalekeni aŵantu, ati ŵakapyunjile ŵaYawe Lesa waŵo: kansi tamuŋgesiwa ati icalo caIjipiti cilionawilwe? 8Popele Mose naAloni ŵaliletelwe liŵili kuli Falo; naye alilaŵile kuli ŵo ati: Kamuyeni, mukapyunjile ŵaYawe Lesa wenu: sombi mbaniŵani naŵani aŵakaya? 9Kumfwa Mose ati: Tukaya fwense neŵanice neŵacekulu, neŵana ŵesu aŵalalume neŵanakasi; tukaya pamo nemataŋga esu ambelele neaŋombe; pakuti tuŋgaŵacitile'citenje ŵaYawe. 10Naye Falo walilaŵile kuli ŵo ati: ŴaYawe ŵekale nenu, koti nifyefyo ifi nakumulekeni, mweŵo netwana twenu: cenjeleni, pakuti ukuŵifya kuli pamenso enu. 11Ifyo tefyo: kamuyeni pano mweŵalalume, mukaŵapyunjile ŵaYawe: pakuti nifyefyo efi mulukufwaya. Naŵo ŵalitamfiwe pamenso akwe Falo.
12Popele apo ŵaYawe ŵalilaŵile kuli Mose ati: Tambicilo'kuŵoko koŵe peulu pacalo caIjipiti, ati siise insye pacalo caIjipiti, sikalye imbuto syonse isyamucalo, syonse'syo isi yasile imfula yamabwe. 13Peŋka Mose kaasonta'kasako kakwe peulu pacalo caIjipiti; popele ŵaYawe ŵaliletele pacalo icipupu icakumutulesuŵa akasuŵa ako konse neŵusiku ŵonse; popele pakuco'lucelo, icipupu icakumutulesuŵa caliletele insye. 14Nasyo insye syaliputile monse mucalo caIjipiti nekutusisya mumipaka yonse iyakucalo caIjipiti; syalikatesye ukwakuti; nekale konse tapali insye isipalene nasyesyo, kaŵili panuma yasyesyo tapakalukuli-po isyakuŵe'fyo. 15Pakuti syalifimbile ponse pacalo conse, fyopele'fyo icalo caliŵele nemfinsi; popele syalilile imbuto syonse isyamucalo, nefisepo fyonse ifyapamiti ifi yasile imfula yamabwe: popele tapasyele-po neli kantu akafifufya, neli muti neli luŵuto ulwamwiŵala, monse mucalo caIjipiti.
16Popele Falo waliaŋgufisye ukuŵeta Mose naAloni; nekulaŵila ati: Naŵifya kuli ŵaYawe Lesa wenu nakuli mweŵo. 17Pano lomba ndukukukombetela ati ufituluke kukuŵifya kwanji iyi-mpindi imo yeŋka, ukapapatile ŵaYawe Lesa wenu ati ŋgawafumve kuli neŵo iyi-mfwa veŋka. 18Naye Mose walifumine pali Falo, nekuŵakombetela ŵaYawe. 19Popele ŵaYawe ŵalialwile icipupu icikulu makosa icakufuma kumbonsi, naco calipintile insye nekusiposa muCisiŵa leikasicile; tapasyele neli lumo ulusye monse mumi paka yakucalo caIjipiti. 20Sombi ŵaYawe ŵalikosesye umutima wakwe Falo, taasumine Falo ati ŵaye aŵaIsilaeli.
21Popele apo ŵaYawe ŵalilaŵile kuli Mose ati: Tambiko'kuŵoko koŵe kwiulu, ati paŵe imfinsi pacalo caIjipiti, imfinsi iyi ŵesi ukumfwa aŵantu. 22Popele Mose walitambicile ukuŵoko kwakwe kwi ulu; popele paliŵele imfinsi itikeme monse mucalo caIjipiti insiku sitatu. 23Taŵalukuŵonana, kaŵili tapawucile pantu pakwe neli muntu umo pansiku sitatu; sombi aŵaIsilaeli ŵonse ŵali nekutuŵa mumananda aŵo.
24Popele Falo walimwitile Mose, nekulawila ati: Kamuyeni, mukaŵapyunjile ŵaYawe; sombi amataŋga enu ambelele neaŋombe eŋka ŋgaasyale: utwana twenu nato ŋgamulukuya nato. 25Sombi Mose ati: Muŋgatupela muminwe yesu kaŵili nesyakwipaya nesyakoce'milambu, ati tukaŵepaile ŵaYawe Lesa wesu. 26Inama syesu nasyo tukalukuya nasyo; tesi pakasyale panuma neli kaŵondo kamo; pakuti ukwelelwa ati tukaŵule-po pali syo mukuwapyunjila ŵaYawe Lesa wesu; kawili tatusiisi isyo isi twelelwe ukuŵapyunjila ŵa Yawe, ili tatuŋgafiko'ko.
27Sombi ŵaYawe ŵalikosesye umutima wakwe Falo, nave taasumine ati ŵaye. 28Popele Falo walilaŵile kuli Mose ati: Fuma-po pali neŵo, ulukucenjela, tekumbona-po liŵili pamenso; pakuti akasuŵa ako ukambona pamenso, kopele ako eko ukafwa! 29Popele Mose ati: Mwalaŵila bwino, cine nsikamuŵoneni liŵili pamenso.
Currently Selected:
Ifyakufuma 10: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
