Ifyakufuma 5
5
1Popele apo pantanjile Mose naAloni ŵaliile nekulaŵila kuli Falo ati: ŴaYawe Lesa wakwe Isilaeli ŵaJaŵile'fi ati: Muŵasumine aŵantu ŵanji ati ŵaye mukuncitile'citenje cakulya mumpaŋga. 2Popele Falo ati: MboyuYawe ninani, uyu nakumfwisye'siwi ati nsumine ati aye Isilaeli? Msimwisi-po neŵo Yawe; kaŵili tesi nsumine ati aye Isilaeli. 3Popele naŵo ati: ŴaLesa ŵaŵaEbeya eŵaisa kuli fweŵo: tulukumukombeteleni ati ŋgatuye umusinso wansiku sitatu mumpaŋga, tukepaye imilambu iyakuli ŵaYawe Lesa wesu; weŋgesa kutuŵusisya umwalo neli nimpoko. 4Popele imfumu yaŵaIjipiti yalilaŵile kuli ŵo ati: Mweŵo, Mose naAloni, mbanindo mulukukokwesya aŵantu ukucite'milimo yaŵo. Kamuyeni kufipinto fyenu.
5Kaŵili Falo ati: Ŵoneni, ŵukumo aŵantu aŵamucalo ŵenji, kaŵili mulukuwaleŋgesya ukutusya kufipinto fyaŵo. 6Popele akasuŵa ako kopele Falo walifundile ifilolo ifyakumilimo yaŵantu newapyunjisi ŵafifyo ati: 7Pano tesi mukawapele aŵantu icani icumine icakuŵumbisya incelwa, koti kale, tau; ŋgaŵalukuya, ŵalukulifwaila icani icumine. 8Sombi ukupenda kwancelwa, uko ŵalukukumanya akale, mukaŵike pali ŵo; tesi mukacefye-po neli kantu, pakuti ŵo ŵafila; pakuti pali fyefyo ŵalukulila ati: Ŋgatuye tukepaye imilambu iyakuli Lesa wesu. 9Imilimo icilile ukulema ŋgaipelwe kuli ŵo, ŋgaŵakulukupyunjisya-mo; ŵekacetekela amasiwi aŵufi.
10Popele apo ifilolo fyamilimo yaŵantu fyalifumine pamo ncŵapyunjisi ŵafifyo, nekulaŵila kuŵantu ati: WaFalo ŵalaŵile'fi ati: Tesi mupeleni icani icumine. 11Kamuyeni, mweŵene, mulukulifwaile'cani uko uku mwisi ukuciŵona; pakuti tesi ikacefiwe imilimo yenu neli kantu. 12Fyopele'fyo aŵantu walipalaŋganine monse mucalo caIjipiti mukunukule'fisiŋga fyacani pamupunda wacani icumine. 13Kaŵili ifilolo fyamilimo fyalikakatile ati: Kamukonsye' milimo yenu, imilimo iyansiku syonse, koti nipampindi iyo iyali-mo necani icumine. 14Nakaŵili aŵapyunjisi aŵapaŵaIsilaeli, aŵo fyaikalicile pali ŵo ifilolo fyakwe Falo, ŵaliŵapamine kuli fyo nekuŵepusya ati: Mbanindo tamukonsesye namailo nalelo imilimo yenu, iyakuŵumbe'ncelwa koti kale?
15Popele apo aŵapyunjisi aŵapaŵaIsilaeli ŵaliisile nekumulilila Falo ati: Mbanindo mulukutucitile'fi, fweŵapyunjisi ŵenu? 16Takupelwe icani kuli fweŵo fweŵapyunjisi ŵenu, lomba ŵalukulaŵila kuli fweŵo ati: Ŵumbeni incelwa! popele ŵoneni, fweŵapyunjisi ŵenu tulukupamwa; sombi umulandu uli kuŵantu ŵenu mweŵene. 17Sombi naye ati: Muli ŵafila, muli ŵafila: nipakuti pali fyefyo epo mulawila ati: Ŋgatuye, tukepaye imilambu iyakuli Yawe. 18Kamuyeni lomba pano, mulukucite'milimo; pakuti tesi kupelwe icani icumine kuli mweŵo; naŋgawe'fyo mukasilisye ukupenda kwancelwa. 19Popele aŵapyunjisi aŵapaŵaIsilaeli ŵalibwene ati tulikatasiwe, pakumfwa ati: Tesi mukacefye-po neli panini pancelwa syenu, pamilimo yenu iyansiku syonse.
20Popele ŵalikumene naMose naAloni, aŵaiminine munsila, ili ŵafumine kuli Falo: 21naŵo aŵapyunjisi ŵalilaŵile kuli ŵo ati: ŴaYawe ŋgawamulolesyeni, ŋgawakasololole; pakuti mwaleŋgesyo'bwema bwesu ukukanaminwa pamenso akwe Falo, napamenso aŵantu ŵakwe, ukuŵike'mpoko muminwe yaŵo iyakutwipaya.
22Popele apo Mose walibwelele kuli ŵaYawe, nekulaŵila ati: MweŵaYawe, mbanindo muŵacitile ifiŵipile aŵaŵantu? Mbanindo muntumine neŵo? 23Pakuti ukufuma kumpindi iyo naisile kuli Falo mukulaŵila mwisina lyenu, alukuŵacite'fiŵipile aŵa-ŵantu; kaŵili mweŵo tamuŵapulwisye aŵantu ŵenu neli panini.
Currently Selected:
Ifyakufuma 5: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
