Ifyakufuma 4
4
1Popele Mose waliasucile ati: Sombi ŵoneni, tesi ŵakancetekele, tesi ŵakomfwisye isiwi lyanji; pakuti ŵakalaŵila ati: ŴaYawe taŵabwenekele kuli weŵo. 2Popele ŵa Yawe ŵalilaŵile kuli ye ati: Cindo ico uli naco muminwe? Naye ati: Kasako. 3Kumfwa ati: Kapose pansi! Naye Mose walikaposele pansi, nako kakaaluka ni nsoka; peŋka Mose kaaŵutuka-ko ukwitina, 4Popele ŵaYawe ŵalilaŵile kuli Mose ati: Tambiko'kuŵoko koŵe, wikate palumindo! (naye kaatambiko'kuŵoko, kaekata, nayo kayaluka kasako muminwe yakwe:) 5ati ŋgaŵakacetekele ati ŵaYawe, Lesa waŵawisiŵo, eŵaLesa ŵakwe Ablaamu, eŵaLesa ŵakwe Isaci, eŵaLesa ŵakwe Yakobi, ŵalibwenekele kuli weŵo.
6Nakaŵili ŵaYawe ŵalilaŵile kuli ye ati: Pano injisyo'kuŵoko koŵe mwilaya pantiŵi. Naye kaenjisyo'kuŵoko mwilaya pantiŵi: popele, pakukufumya, kuŵona ukuŵoko kwakwe kwaŵa nemanata, nekutuŵa tuu koti candwa. 7Kumfwa ŵaYawe ati: Bwesesya ukuŵoko muntiŵi. (Naye kaabwesesya ukuŵoko kwakwe muntiŵi; peŋka pakukufumya liŵili, kuŵona kwaaluka kwaŵa koti munefu wakwe umbi.) 8Popele apo, kani ŵo tesi ŵakakucetekele, neli kumfwisye'siwi lyakesiŵilo akakutaŋga, lomba ŵakacetekela isiwi lyakesiŵilo aka kambi. 9Popele apo, kani ŵo tesi ŵakacetekele netwisiŵilo utu tuŵili, neli kumfwisye'siwi lyoŵe; lomba ukatapule amenda munika, uketile pamutunta; popele amenda, ayo ukatapula munika, eli akaaluka milopa pamutunta.
10Peŋka Mose kaalaŵila kuli ŵaYawe ati: Neŵo nsili ninemuntu wamasiwi, nekale konse, neli kufuma kumpindi iyo mwalaŵile kuli neŵo nemuntu wenu; pakuti ninekaputa, uwalumini ulwakukokola.
11Sombi ŵaYawe ŵalilaŵile kuli ye ati: Mbaninani uwaleŋgele akanwa kamuntu? Kaŵili mbaninani uwakuleŋgesyo'muntu ukusiŋka amasiwi, kani kusiŋka amatwi, kani kuŵona, kani kupofola? Kansi nsili nineŵo, neŵaYawe? 12Pakuti pali fyefyo lomba, koya; neŵo ŋkalukwikala nekanwa koŵe, nekukusambisye'fyo ifi uŋgalawila.
13Popele Mose ati: MweŵaYawe, ndukumukombeteleni ati mutume pali woyo umwakutuma.
14Peŋka ukufitwa kwaŵaYawe kwaliŵucile pali Mose, naŵo ati: Kani tapalipo Aloni umwina-Lefai umukwanu? Ndiisi ati ali nemano akulaŵila bwino. Kaŵili ŵona, alukwisa mukukucinsya; popele pakukuŵona eli akatemwa mumutima wakwe. 15Popele ukalaŵile kuli ye, uŵike amasiwi mukanwa kakwe; popele ŋkalukuli nekanwa koŵe, nekanwa kakwe, nekumusambisyeni ifyo ifi muŋgacita. 16Popele akalukuli wakukulaŵilila kuŵantu: popele apo lomba akakuŵela kanwa, naweŵo eli ukamuŵela koti niŵaLesa. 17Kaŵili ukapinte muminwe yoŵe aka-kasako, aka ukacitisya-ko utwisiŵilo.
18Popele apo Mose walikumbulucile nekubwelela kuli ŵawisifyala, nekulaŵila kuli ŵo ati: Ndukumukombeteleni ati munsumine nje ŋkabwelele kuŵakwaŵesu awali mucalo ca Ijipiti, ŋkaŵone kani ŵacili nemweo. Popele Yitilo walilaŵile kuli Mose ati: Koya neŵutende.
19Kaŵili ŵaYawe ŵalilaŵile kuli Mose mucalo caMidyani ati: Koya, ukabwelele kucalo caIjipiti; pakuti ŵalifwile ŵonse aŵantu aŵafwaile ukukwipaya. 20Popele Mose walipintile umukasi wakwe neŵana ŵakwe aŵalalume, nekuwekalika pamboŋgolo, nekubwelela kucalo caIjipiti. Kaŵili Mose walipintile muminwe yakwe akasako kaŵaLesa. 21Popele apo ŵaYawe ŵalilaŵile kuli Mose ati: Pakubwelela kuIjipiti, ukacite icine pamenso akwe Falo ifimpelampela fyonse'fyo ifi mbicile muminwe yoŵe: sombi ŋkakosyo'mutima wakwe, taakaŵaleka aŵantu. 22Lomba ukalaŵile kuli Falo ati: ŴaYawe ŵalaŵile'fi ati: Isilaeli mwana wanji umwalalume, umuwele: 23lomba nalaŵila kuli weŵo ati: Usumine ati aye umwana wanji, ŋgaakampyunjile; kaŵili wakano'kumuleka; ŵona, ŋkepayoʼmwana woŵe umwalalume umuŵele.
24Popele apo pansila apo ŵalukulala, ŵaYawe ŵalikumene nakwe Mose, nekwesyo'kumwipaya. 25Peŋka Sipola kaaŵulo'mwala, kaapinika-ko umusuti wamwana wakwe, kaauposa kumakasa akwe Mose; kaalaŵila ati: Cine niwemulume wamilopa kuli neŵo. 26Fyopele'fyo ŵaLesa kaŵamuleka Mose. Popele Sipola ati: Mulume wamilopa, pakuti pacisilamu.
27Lomba ŵaYawe ŵalilaŵile kuli Aloni ati: Koya kumpaŋga, ukamucinsye Mose. Naye aliile, nekukumana nakwe kulupili lwaŵaLesa, nekumufyonta-po. 28Popele Mose walimuŵulile Aloni amasiwi aŵaYawe onse ayo ŵamutumine, netwisiŵilo tonse utu ŵamufundile.
29Popele Mose naAJoni ŵaliile nekuwuŋganya aŵaIsilaeli aŵakulu ŵonse; 30naye Aloni waliŵulisisye amasiwi onse ayo ŵalaŵile ŵaYawe kuli Mose, nekutucito'twisiŵilo uto pamenso aŵantu. 31Popele aŵantu ŵalicetekele; naŵo, pakumfwa ati ŵaYawe ŵaisa mukuŵona aŵaIsilaeli, ŵaŵona ukupeŋga kwaŵo, eli ŵainamisye nekucindika.
Currently Selected:
Ifyakufuma 4: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
