Ifyakufuma 40
40
1Popele ŵaYawe ŵalilaŵile kuli Mose ati: 2Pakasuŵa kakutaŋga akamwensi wakutaŋga ukeŵake isema lyacitente cewuŋgano, 3Popele ukaŵike-mo umo ibokosi lyakulayana; eli ukacicile-ko kwibokosi icipembe. 4Popele ukenjisye itebulu, ukaansike'fintu ifili-po; kaŵili ukenjisye icakuteka-po inyale, ukaasye inyale syakuko. 5Popele ukatekele iconto cegolide icafinuncile bwino pamenso pebokosi lyakulayana; eli ukaŵike icicicilo kumulyaŋgo uwakwisema. 6Popele ukatekele iconto camilambu iyakoca pamenso pamulyaŋgo uwakwisema lyacitente cewuŋgano. 7Popele ukatekele umusambilo pakati pacitente cewuŋgano neconto, uketile-mo amenda. 8Popele ukasompe icaluŵansa icisiŋgulucile, ukapatike'cicicilo icakumusiko uwakucaluŵansa. 9Popele apo ukaŵule amafuta akusufya-ko, ukasufye-ko kwisema nakuli fyo fyonse ifilimo, ukalipose kuli ŵaLesa, nefintu fyonse ifyakuli lyo; lomba likalukuswetelele. 10Popele ukasufye-ko kuconto camilambu iyakoca, nakufiŋkoloŋkolo fyakuko fyonse, ukacipose iconto kuli ŵaLesa; lombe'conto cikalukuswetelele swete. 11Popele ukasufye-ko kumusambilo nakucapansi cakuko, ukacipose kuli ŵaLesa. 12Popele apo ukalete Aloni neŵana ŵakwe kumulyaŋgo uwakucitente cewuŋgano, ukaŵasamfye nemenda. 13Popele ukamufwike Aloni ifyakufwala ifiswetelele; eli ukamusufyeko umupose kuli ŵaLesa, ati akalukumpyunjila muŵupapatilisi. 14Popele ukaŵalete aŵana ŵakwe, ukaŵafwike iminjila; 15eli ukaŵasufye-ko, koti nifyefyo ifi wasufisye-ko kuli wisiŵo, ati ŵakalukumpyunjila muŵupapatilisi; popele uko-kuŵasufya kukalukuŵaŵela ŵupapatilisi bwamuyayaya pafitentekwa fyaŵo fyonse.
16Popele Mose walicitile'fyo: koti nifyefyo fyonse ifi ŵamufundile waYawe, koti nifyopele'fyo kaacita.
17Popele apo lomba pamwensi wakutaŋga uwapamwaka waŵuiŵili, pakasuŵa kakutaŋga akamwensi uyo, isema lyaliiŵekwe. 18Lomba Mose waliiŵeke isema, nekuŵiko'tulindi twakuko, nekwimika amatabwa akuko, nekuwika-ko imitaŵiko yakuko, nekwimike'mpanda syakuko. 19Popele aliŵicile icitente peulu pesema, nekuŵika peulu pali co icakufimba-po pacitente; koti nifyefyo ifi ŵamufundile Mose ŵaYawe.
20Popele apo aliŵulile ukulayana nekukuŵika mwibokosi, nekuwika-ko imitembo, nekuŵika peulu pebokosi icifuniko cacifuto; 21popele aliinjisye ibokosi mwisema, nekupatika icipembe icakucicila, nekucicila-ko ibokosi lyakulayana; koti nifyefyo ifi ŵamufundile Mose ŵaYawe.
22Popele apo aliinjisye itebulu mucitente cewuŋgano, pesonde lyacipembe kuciŵafu cesema icakunofu. 23Popele aliansicile-po bwino ifimpwampwa fyasiŋkwa pamenso aŵaYawe; koti nifyefyo ifi ŵamufundile Mose ŵaYawe.
24Popele apo aliinjisye mucitente cewuŋgano icakuteka-po inyale, apasiŋkamene napetebulu kuciŵafu cesema icakusaufu. 25Popele aliasisye inyale pamenso aŵaYawe; koti nifyefyo ifi ŵamufundile Mose ŵaYawe.
26Popele apo aliinjisye iconto cegolide mucitente cewuŋgano pamenso pacipembe; 27popele aliocele-po libona uwafinuncile bwino ifyanse; koti nifyefyo ifi ŵamufundile Mose ŵaYawe.
28Popele aliŵicile-ko kwisema icakucicila kumulyaŋgo. 29Popele aliŵicile kumulyaŋgo uwakwisema lyacitente ceŵuŋgano iconto camilambu iyakoca, nekuposela-po umulambu wakoca nemulambu wawuŋga: koti nifyefyo ifi ŵamufundile Mose ŵaYawe.
30Popele apo aliŵicile umusambilo pakati pacitente cewuŋgano neconto, nekuŵika-mo amenda akusamba. 31Lomba Mose naAloni neŵana ŵakwe kaŵasambila-mo kuminwe nakumakasa; 32popele pakwinjila ŵo mucitente ceŵuŋgano, napakupalamina ŵo kuconto, kaŵasamba; koti nifyefyo ifi ŵamufundile Mose ŵaYawe.
33Kaŵili alisompele icaluŵansa icasiŋgulucile kwisema nakuconto, nekwimike'cakucicila kumusiko uwakucaluŵansa. Fyopele'fyo Mose kaasilisye'milimo.
34Popele apo ikumbi lyalifimbile-po pacitente cewuŋgano, neŵuleme bwaŵaYawe naŵo kabwisule'sema. 35Lomba Mose taaisiŵile ukwinjila mucitente cewuŋgano, pakuti ikumbi lyaliikele-po, neŵuleme bwaŵaYawe nekwisule'sema. 36Popele pakusuntulwa ikumbi ukufuma-po pesema, aŵaIsilaeli kaŵaya pantanjile panyendo syaŵo syonse; 37sombi kani ikumbi nekuŵulo'kusuntulwa, lomba ŵo nekuŵulo'kwenda, ili takaŋgafika akasuŵa akakusuntulwa lyo. 38Pakuti ikumbilyaŵa Yawe lyali pesema pakasuŵa, kaŵili mwali-mo umulilo paŵusiku, pamenso paŵacikoto cakwe Isilaeli, panyendo syaŵo syonse.
Currently Selected:
Ifyakufuma 40: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
