Ifya Ŵalefai 1
1
1Lomba ŵaYawe ŵalimwitile Mose, nekulaŵila kuli ye ukufuma kumutanda weŵuŋgano, ati, 2Laŵila kuŵaIsilaeli, uŵaŵule ati, Pali mweŵo kani umuntu alete kuli ŵaYawe umulambu, mukalete umulambu wenu ukusalulula panama, petaŋga lyaŋombe napetaŋga lya nama sinini.
3Kani umulambu wakwe mulambu wakoca uwapetaŋga lyaŋombe, ŋgaapose iyalalume iyakuŵule'cisemba; akaipose koti mutima wakwe umwine kumulyaŋgo uwakwisema Iyeŵuŋgano pamenso aŵaYawe. 4Kaŵili akaŵike ukuŵoko kwakwe pamutwi wamulambu uwakoca, peŋka ukapokelelwa pakuti pali ye mukumuluŵula. 5Eli aŋgepaye'ŋombe pamenso aŵaYawe; neŵapapatilisi naŵo, aŵana ŵakwe Aloni aŵalalume, eli ŵaŋgalete'milopa, nekusanse'milopa ponse ponse napaconto icili kumulyaŋgo uwakwisema Iyeŵuŋgano. 6Peŋka akafunde'ciseŵa camulambu uwakoca, akaupampe ukucite'minefu yauo. 7Lomba aŵana aŵalalume ŵakwe Aloni umupapatilisi ŵakaŵike umulilo paconto nekwansicile'ŋkuni pamulilo; 8lomba aŵapapatilisi, aŵana ŵakwe Aloni aŵalalume, eli ŵaŋgateka iminefu nemutwi nemafuta ukufyansika bwino peulu paŋkuni isili pamulilo uli paconto; 9sombi ifya mukati fyauo nemolu aka fisamfye mumenda; eli aŋgoca fyonse umupapatilisi paconto, umulambu uwakoca, umulambu uwamulilo, uwakunuŋko'kuweme ukwakuli ŵaYawe.
10Kaŵili kani umulambu wakwe mulambu uwapamataŋga anama sinini, kani wapambelele kani wapambusi, uwakoca, akalete iyalalume iyakuŵule' cisemba. 11Peŋka akaipaile muceni caconto icakunofu, pamenso aŵaYawe; peŋka aŵapapatilisi, aŵana ŵakwe Aloni aŵalalume, ŵakasanse imilopa yaiyo ponse ponse paconto. 12Kaŵili akaipampe ukucite'minefu yaiyo, pamo nemutwi waiyo nemafuta; popele apo umupapatilisi akafiteke ukufyansika bwino peulu paŋkuni isili pamulilo uli paconto; 13sombi ifyamukati nemolu akafisamfye nemenda; eli aŋgafileta fyonse umupapatilisi, nekufyoca paconto: mulambu uwakoca, mulambu uwamumulilo, uwakunuŋko'kuweme ukwakuli ŵaYawe.
14Kaŵili kani umulambu wakwe uwakoca uwakuŵaposela ŵaYawe wafyuni, ŋgaakalete umulambu wakwe uwaŵasikampele neli watuŋkulimba. 15Peŋka umupapatilisi akacilete kuconto, acipote umukosi ukufumyo'mutwi, acoce paconto; lombe'milopa yacico ikapotelwe muceni caconto; 16kaŵili akanukule iciŵosolyo cacico pamo nemasako, akacipose muceni caconto kumutulesuŵa, pantu apali amatoi. 17Peŋka akacipandule pamo nemapindo acico, sombi teti acipandwisye ukucilekanya paŵili; lomba umupapatilisi eli akoce paconto, peulu paŋkuni isili pamulilo; mulambu uwakoca, mulambu uwamumulilo, uwakunuŋko kuweme ukwa kuli ŵaYawe.
Currently Selected:
Ifya Ŵalefai 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
