Ifyakufuma 39
39
1Lomba kunsalu iyo ifitile koti liulu, neikasicile panini, neikasicile cee, ŵalipasile ifyakufwala ifipasilwe bwino ukwakuti, ifyakupyunjila-ko mumulenda uswetelele; kaŵili ŵalipasile ifyakufwala fyakwe Aloni ifiswetelele: koti nifyefyo ifi ŵamufundile Mose ŵaYawe.
2Popele alipasile efodi kwigolide, nakunsalu ifitile koti liulu, neikasicile panini, neikasicile cee, nakunsalu iyakupyata inacile. 3Popele kaŵapamala igolide kaliŵa koti mapepala akuŵulo' mutika; kaŵili kaŵalipinika kaliŵa ninsambo, ati ŵalipasilile kumo nensalu ifitile koti liulu, neicasicile panini, neikasicile cee, nensalu inacile, imilimo yakwe mfundi wamano. 4Kaŵili ŵalimucitile efodi ifyapafifusi fiŵili ifilundilwe: walilundaŋkene kumpelo syoŵilo. 5Kaŵili umusipi uposelwe nemano uyo uli pali efodi, uwakumupimpa, walicitilwe koti mekalilo opele kunsalu intu imo; kwigolide, nakunsalu ifitile koti liulu, neikasicile panini, neikasicile cee, nensalu iyakupyata inacile; koti nifyefyo ifi ŵamufundile Mose ŵaYawe.
6Popele ŵaliŵasile amabwe esyoyami, nekwaŵika mufyakwikata-ko ifyegolide, nekwalemba nemalembo apansalamu, koti masina aŵaIsilaeli. 7Popele aliaŵicile pafyapafifusi ifyakuli efodi, ati filukwikala mabwe akuŵaanusya aŵaIsilaeli; koti nifyefyo ifi ŵamufundile Mose ŵaYawe.
8Kaŵili alicitile icakulamina-mo intiŵi, imilimo yakwe mfundi uwamano, koti milimo yakwe efodi, kwigolide, nakunsalu ifitile koti liulu, neikasicile panini, neikasicile cee, nakunsalu iyakupyata inacile. 9Calilolele pane; ŵalicifutwile icakulamina-mo initŵi; muŵutali caliesesye icipanta, namubwipi namo kacesya icipanta, califutwilwe. 10Popele ŵaliŵicile pali co imiloŋgo yamabwe ine. Umuloŋgo wakutaŋga wali nasadyo natopasi nabaleketi. 11Lomba umuloŋgo waŵuiŵili wali nasimalajido nasafila nayakalomo. 12Kaŵili umuloŋgo waŵuitatu wali nawacinti nasyebu naametusito. 13Nakaŵili umuloŋgo waŵuine wali nabelulo nesyoyami nayasipa: amabwe onse aliŵicilwe mwigolide mufyakwikata-ko fyao. 14Lomba amabwe ali koti masina aŵaIsilaeli, ikumi naaŵili koti masina aŵo; koti malembo apansalamu, onse aliŵelele imikoka yaŵaIsilaeli ikumi na iŵili, koti masina aiyo. 15Popele ŵalicitile peulu pacakulamina-mo intiŵi iminyololo koti myando iyakupyata iyegolide iliswetele. 16Kaŵili ŵalicitile ifyakwikata-ko fiŵili ifyegolide, nemikoŋko yegolide iŵili; nekuwike'mikoŋko iyo iŵili pampelo syacakulamina-mo intiŵi syoŵilo. 17Popele ŵaliŵicile iminyololo iyo iŵili iyegolide ipyatilwe pamikoŋko iŵili kumpelo syacakulamina-mo intiŵi. 18Kaŵili impelo isyo simbi siŵili isyaminyololo ipyatilwe ŵalisikacile kufyakwikata-ko fiŵili, nekufiŵika pafyapafifusi ifyakuli efodi pantanjile pali ye. 19Kaŵili ŵalicitile imikoŋko yegolide iŵili nekwiŵika pampelo syacakulaminamo intiŵi siŵili, pamukombelo wacico uwali pambali yakwe efodi mukati. 20Nakaŵili ŵalicitile naimbi imikoŋko yegolide iŵili, nekwiŵika pafyapafifusi fiŵili ifyakuli efodi pansi, pantanjile pali ye, apepi napamulundo wafifyo, peulu lyamusipi uposelwe nemano uyo uli pali efodi. 21Popele kumikoŋko yacico ŵalikacile icakulamina-mo intiŵi kumikoŋko yakwe efodi necakupyata icifitile koti liulu, ati ciikale peulu lyamusipi uposelwe nemano uyo uli pali efodi, icakulamina-mo intiŵi ciiŋgakakulucila kuli efodi; koti nifyefyo ifi ŵamufundile Mose ŵaYawe.
22Popele alipasile umwinjila wonse wakwe efodi kunsalu iyakupika ifitile koti liulu; 23umwinjila wali necipense icakupusisya-mo umutwi pakati pali wo, wali nemukombelo upicilwe usiŋgulucile kucipense cauo, koti cipense icakuli kaminsa wacela, ciiŋgesa kukwamuka. 24Kaŵili pansi pamwinjila ŵalipasile ŵalimono kunsalu ifitile koti liulu, neikasicile panini, neikasicile cee, nakunsalu iyakupyata inacile. 25Kaŵili ŵalicitile indiŵu syegolide iliswetele, nekusiŵika pakati napakati pali ŵalimono pansi pamwinjila apasiŋgulucile, pakati pali ŵalimono; 26pali indiŵu nalimono, lomba naimbi indiŵu naumbi limono, pansi pamwinjila apasiŋgulucile, mukupyunjila-mo; koti nifyefyo ifi ŵamufundile Mose ŵa Yawe.
27Popele ŵalimuposele Aloni neŵana ŵakwe iminjila kufyakupika ifyansalu inacile; 28kaŵili insalu iyapamutwi kaŵaposa kunsalu inacile, nefyapamitwi ifiweme nafyo kunsalu inacile, naŵakaputula ŵansalu naŵo kunsalu inacile ipyatilwe, 29nemusipi nawo, kunsalu inacile ipyatilwe, neifitile koti liulu, neikasicile panini, neikasicile cee, imilimo yamutunjisi; koti nifyefyo ifi ŵamufundile Mose ŵaYawe.
30Popele ŵalicitile icela icakumuntinya uswetelele kwigolide iliswetele, nekulemba pali co amalembo, koti malembo apansalamu, ati: UKULIPOSA UKWAKULI WAYAWE. 31Popele ŵalikacile kuli co icakupyata icifitile koti liulu, mukucikacisya kunsalu iyapamutwi iyali peulu; koti nifyefyo ifi ŵamufundile Mose ŵaYawe.
32Fyopele'fyo yalisilile imilimo yonse iyakwisema lyacitente cewuŋgano; kaŵili aŵaIsilaeli ŵalicitile koti nifyefyo fyonse ifi ŵamufundile Mose ŵaYawe, koti nifyopele'fyo kaŵacita.
33Popele apo ŵaliletele kuli Mose isema, necitente, nefyali-mo fyonse, neŋkoŵeko syakuko, nematabwa akuko, nemitaŵiko yakuko, nempanda syakuko, netulindi twakuko; 34necakufimba peulu icafiseŵa fyambelele isyalalume ifisaŋgwilwe ati fikasicile, necakufimba icafiseŵa fyamatakasi, necipembe icakucicicilo; 35nebokosi lyakulayana, nemitembo yakuko, necifuniko cacifuto; 36netebulu, nefiŋkoloŋkolo fyonse ifyakuko, nasiŋkwa waŵumboni; 37necakuteka-po inyale iciswetele, nenyale syakuko, inyale isyakuŵamba bwino, nefiŋkoloŋkolo fyonse ifyakuko, nemafuta akukutuŵa; 38neconto cegolide, nemafuta akusuŵa-ko, nefinuncile bwino ifyanse, necicicilo icakumulyaŋgo uwakucitente; 39neconto caluŵemba, necakupika cacico icaluŵemba, nemitembo yakuko, nefiŋkoloŋkolo fyonse ifyakuko, nemusambilo, necapansi cakuko; 40nefipembe ifyakucaluŵansa, nempanda syakuko, netulindi twakuko, necicicilo icakumusiko uwakucaluŵansa, nemyando yakuko, nemisoŋgo yakuko, nefintu fyonse ifyakukupyuŋga ukwakwisema, nekwakucitente cewuŋgano: 41nefyakufwala ifipasilwe bwino ifyakupyunjila-mo mumulenda uswetelele, nefyakufwala ifiswetelele ifyakwe Aloni umupapatilisi, nefyakufwala ifyaŵana ŵakwe, ifyakupyunjila muŵupapatilisi. 42Koti nifyefyo fyonse ifi ŵamufundile Mose ŵa Yawe, koti nifyopele'fyo kawacite' milimo yonse aŵaIsilaeli. 43Popele apo Mose walibwene imilimo yonse, lomba kusaŋga kale ŵaicitile; koti nifyefyo ifi ŵafundile ŵaYawe, koti nifyopele'fyo lomba kale ŵacitile. Popele apo Mose waliŵasyucisye.
Currently Selected:
Ifyakufuma 39: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
