Ifyakufuma 37
37
1Kaŵili Besaleli walicitile ibokosi lyakulayana kuciti camuŋgasenje: muŵutali lyalikumene amakubita aŵili nelyeyafu, kaŵili mubwipi lyalikumene ikubita limo neyafu, nakaŵili muŵutali ubwakufuma pansi lyalikumene ikubita limo neyafu; 2popele aliŵicile peulu paciti ponse igolide iliswetele, namukati napesonde pali lyo, nekusiŋgulusya pali lyo umuntinya wegolide. 3Popele aliliŵumbile imikoŋko yegolide ine kumolu aliko onane; kaŵili imikoŋko iŵili yali kuluŵali lumo, naimbi imikoŋko iŵili yali kuluŵali lwaliko lumbi. 4Popele alicitile imitembo yaciti camuŋgasenje, nekuŵike'golide peulu pali yo. 5Popele alipusisye imitembo mumikoŋko iyali pambali syebokosi, mukutembe'bokosi kuli yo.
6Popele alicitile icifuniko cacifuto icegolide iliswetele: muŵutali calikumene amakubita aŵili nelyeyafu, kaŵili mubwipi calikumene ikubita limo neyafu. 7Kaŵili aliŵumbile ŵakelubi ŵegolide ŵaŵili; aliŵacitile kufyela ifyakupamwa, kumpelo syoŵilo isyakucifuniko cacifuto; 8alicitile kelubi umo kuluŵali lumo, naumbi kelubi umo kuluŵali lumbi: aliŵaŵumbile ŵakelubi kumo necifuniko cacifuto pambali syoŵilo syacico. 9Popele ŵakelubi ŵalitambicile peulu amapindo aŵo, nekufimba-po pacifuniko cacifuto kumapindo aŵo, ili ŵalolansyanya nemenso aŵo; amenso aŵakelubi alilolele kucifuniko cacifuto.
10Kaŵili alicitile itebulu kuciti camuŋgasenje: muŵutali lyalikumene amakubita aŵili, kaŵili mubwipi lyalikumene ikubita limo, namuŵutali ubwakwesya peulu namo lyalikumene ikubita limo neyafu. 11Kaŵili aliŵikile peulu pali lyo igolide iliswetele; nakaŵili alilicitile umuntinya wegolide uwakulisiŋguluka. 12Kaŵili alilicitile umukombelo uwakulisiŋguluka uwakwesyo' ŵukulu bwacipanta; nekuucitila umukombelo waliko umuntinya wegolide uwakusiŋguluka, 13Popele alilicitile imikoŋko yegolide ine, nekwiŵika imikoŋko kumakoŋko onane akumolu aliko onane. 14Imikoŋko yali apepi napamukombelo, apakupusisya imitembo iyakutembe'tebulu. 15Kawili alicitile imitembo kuciti camuŋgasenje, nekuŵike'golide peulu pali yo, ati itembe itebulu. 16Nakaŵili alicitile ifiŋkoloŋkolo ifyali petebulu, nembale syaliko, nemasupuni aliko, nemabeseni aliko, neŋkomeci syaliko isyakwitila-ko; fyonse alificitile kwigolide ilswetele.
17Popele aliciŵumbile icakuteka-po inyale kwigolide iliswetele: alicicitile icakuteka-po kufyela ifyakupamwa, necapansi caciko, nemusalawo waciko; kaŵili iŋkomeci syaciko, nefipumputu fyaciko, nemaluŵa aciko, fyonse fyaliŵumbilwe kumo naco; 18popele mwalifumine mumbali syaciko imitano isanu naumo; imitano yacakuteka-po inyale itatu yalifumine kuluŵali lumo lwaciko, nemitano yacakuteka-po itatu nayo yalifumine kuluŵali lumbi lwaciko; 19iŋkomeci sitatu isiŵumbilwe koti maluŵa asyadeci syali pamutano umo, necipumputu neluŵa; neŋkomeci sitatu isiŵumbilwe koti maluŵa asyadeci, nasyo syali pamutano umbi, necipumputu neluŵa: fyopele'fyo pamitano yosanu naumo iyakufuma mucakuteka-po inyale. 20Kaŵili mucakuteka-po mwali iŋkomeci sine, isiŵumbilwe koti maluŵa asyadeci, nefipumputu fyasiko nemaluŵa asiko; 21kaŵili icipumputu cali pansi pamitano iŵili iŵumbilwe kumo naco, nacimbi icipumputu pansi pamitano iŵili iŵumbilwe kumo naco, nacimbi naco icipumputu pansi pamitano iŵili iŵumbilwe kumo naco, ifyakumitano yosanu naumo iyakufuma muli co. 22Ifipumputu fyasiko nemitano yasiko fyaliŵumbilwe kumo naco: conse cali ciŵuluŵulu icegolide iliswetele icakupamwa. 23Popele alicitile inyale syaciko sisanu nasiwili, nefimanto fyakuko, nembale isyakuŵika-mo imilale, fyonse fyali fyegolide iliswetele. 24Alicicitile kwigolide iliswetele ilyakukumana italanto, pamo nefiŋkoloŋkolo fyakuko fyonse.
25Popele alicitile iconto icakocelapo ifinuncile bwino kuciti camuŋgasenje: muŵutali calicsesye ikubita, namubwipi namo caliesesye ikubita, calilolele pane; kaŵili uŵutali ubwakwesya peulu bwalikumene amakubita aŵili; amaseŋgo acico ali cintu cimo naco. 26Popele aliŵicile peulu pali co igolide iliswetele, napeulu napambafu apasiŋgulucile napamaseŋgo acico; kaŵili alicicitile umuntinya wegolide uwakucisiŋguluka, 27Kaŵili alicicitile imikoŋko yegolide iŵili pansi pamuntinya wacico, pambafu syacico syoŵilo, pambali syacico syoŵilo, apakupusisya imitembo iyakucitemba. 28Popele alicitile imitembo kuciti camuŋgasenje, nekuŵika peulu pali yo igolide.
29Popele alicitile amafuta ayo aswetelele akusuŵa-ko, nalibona uswetele uwafinuncile bwino ifyanse, koti mano aŵakupataŋkanye'fintu ifinuŋka.
Currently Selected:
Ifyakufuma 37: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
