Ifyakufuma 36
36
1Popele Besaleli naAyolyabi ŵakacite imilimo, pamo neŵantu ŵonse aŵali nemitima yamano, aŵo ŵaYawe eŵaŵicile-mo mumitima yaŵo amano nekalaŋgo akakwisiŵo'kucite'milimo yonse iyakukupyuŋga ukwamumulenda, koti nifyefyo fyonse ifi ŵafundile ŵaYawe.
2Popele Mose waliŵetile Besaleli naAyolyabi, neŵantu ŵonse aŵali nemitima yamano, aŵo ŵaYawe eŵaŵicilemo mumitima yaŵo amano, eŵaŵo ŵonse aŵasantucile mumitima ukwisa kumilimo mukwicita; 3naŵo ŵalipokele kuli Mose imilambu yonse iyo ŵaletele aŵaIsilaeli iyakumilimo iyakukupyuŋga ukwamumulenda, mukwicita kuli yo. Kaŵili kaŵacimuletela imilambu yakupa lukoso koti mitima yaŵo incelo syonse.
4Popele apo aŵamano ŵonse, aŵalukucite'milimo yonse iyamumulenda, ŵalifumine ŵonse kumilimo yaŵo iyo ŵalukucita; 5nekulaŵila kuli Mose ati: Aŵantu ŵalukuleta ifyakucilo'kwakuti napakufwaya kwakupyuŋga kwamilimo, iyo ŵafundile ŵaYawe ati citeni. 6Popele Mose walifundile, naŵo ŵalikutulisye monse mucisasa, ati: Aŵantu ŵonse neŵalalume neŵanakasi ŵekacita naimbi imilimo iyakumulambu uwakumulenda. Fyopele'fyo aŵantu ŵalikaniwe ati ŵaleke ukuleta. 7Pakuti ifintu ifyo ifi ŵali nafyo fyalikumene ukucite'milimo yonse; kaŵili kaficila-po ubwinji.
8Lomba aŵantu ŵonse aŵali nemitima yamano, aŵalukucite'milimo, ŵalicitile isema, kaliŵa nefipembe ikumi; ŵalifiposele kunsalu iyakupyata inacile, neifitile koti liulu, neikasicile panini, neikasicile cee, naŵakelubi, imilimo yakwe mfundi uwamano. 9Uŵutali bwafipembe fyonse bwalikumene amakubita amakumi aŵili naasanu muli asanu naatatu, kaŵili mubwipi bwafipembe fyonse mwalikumene amakubita ane: ifipembe fyonse ukufyesya kafyelana pamo. 10Kaŵili ŵalilundaŋkenye ifipembe fisanu; kaŵili nafimbi ifipembe fisanu kawafilundaŋkanya. 11Kaŵili ŵalicitile ifyaŋkoŵeko ififitile koti liulu pamukombelo wacipembe cimo kumpeto pamulundo; fyopele'fyo ŵalicitile pamukombelo wacipembe icipelele-ko lukoso pamulundo waŵuiŵili. 12Pacipembe cimo ŵalicitile ifyaŋkoŵeko amakumi asanu, kaŵili pamukombelo wacipembe icali pamulundo waŵuiŵili ŵalicitile ifyaŋkoŵeko amakumi asanu: ifyaŋkoŵeko fyalitontoŋkene. 13Nakaŵili ŵalicitile iŋkoŵeko syegolide amakumi asanu, nekufilundaŋkanya ifipembe kuŋkoŵeko: fyopele'fyo isema lyali limo.
14Kaŵili ŵalicitile ifipembe fyamasako ambusi, fyaliŵele citente peulu pesema; ŵalificitile ifipembe ikumi nacimo. 15Uŵutali bwafipembe fyonse bwalikumene amakubita amakumi atatu, kaŵili mubwipi bwafipembe fyonse mwalikumene amakubita ane: ifipembe ikumi nacimo ukufyesya kafyelana pamo. 16Popele ŵalilundaŋkenye ifipembe fisanu pantu pamo, nafimbi fisanu nacimo pantu pafiko. 17Kaŵili ŵalicitile ifyaŋkoŵeko amakumi asanu pamukombelo wacipembe ico icipelele-ko lukoso pamulundo, nafimbi ifyaŋkoŵeko amakumi asanu pamukombelo wacipembe icipelele-ko lukoso pamulundo waŵuiŵili. 18Nakaŵili ŵalicitile iŋkoŵeko syaluŵemba amakumi asanu, mukulundaŋkanye'citente ati ciŵe cimo.
19Kaŵili ŵalicitile icakufimba-po pacitente icafiseŵa fyambelele isyalalume ifisaŋgwilwe ati fikasicile, nakaŵili necakufimba-po peulu icafiseŵa fyamatakasi.
20Kaŵili ŵalicitile amatabwa akwisema aciti camuŋgasenje ati eme. 21Uŵutali bwamatabwa bwalikumene amakubita ikumi, namubwipi bwamatabwa namo mwalikumene ikubita limo neyafu. 22Pamatabwa onse pali utukoli tuŵili utuŵambakene bwino; ŵaliacitile ifyo amatabwa onse akwisema. 23Kaŵili ŵalicitile amatabwa akwisema, amatabwa amakumi aŵili kuciŵafu icakusaufu. 24Kaŵili ŵalicitile utulindi twesilifa amakumi ane pansi yamatabwa ayo amakumi aŵili; utulindi tuŵili pansi yetabwa limo mukwinjisisya-mo utukoli twaliko tuŵili, natumbi utulindi tuŵili pansi yetabwa limbi mukwinjisisya-mo utukoli twaliko tuŵili. 25Nakaŵili napaluŵafu Iwesema ulwaŵusiŵili kuciŵafu icakunofu, ŵalicitile amatabwa amakumi aŵili, 26netulindi twao utwesilifa amakumi ane: utulindi tuŵili pansi yetabwa limo, natumbi utulindi tuŵili pansi yetabwa limbi. 27Popele panuma yesema kumbonsi ŵalipacitile amatabwa asanu nalimo. 28Kaŵili ŵalicitile amatabwa aŵili akufilulu fyesema ifyakunuma. 29Popele aliŵambakene pansi, kaŵili ali amo aŵuluŵulu ukufika napeulu kumukoŋko umo; oŵilo ŵaliacitile koti nifyopele'fyo kufilulu fyoŵilo. 30Lomba pali amatabwa asanu naatatu, netulindi twao twesilifa nato, pali utulindi ikumi natusanu nakamo; utulindi tuŵili twali pansi yamatabwa onse.
31Kaŵili ŵalicitile imitaŵiko yaciti camuŋgasenje; isanu iyakumatabwa akuluŵali lumo Iwesema, 32naimbi imitaŵiko isanu iyakumatabwa akuluŵali lumbi Iwesema, naimbi imitaŵiko isanu iyakumatabwa esema akunuma akumbonsi. 33Kaŵili umutaŵiko uwapakati ŵaliupisisye pakati pamatabwa lukoso ukukumana kumpelo syoŵilo. 34Popele ŵaliŵicile peulu pamatabwa igolide iliswetele, kaŵili ŵalicitile imikoŋko yao kwigolide apakwinjisisya imitaŵiko: nakaŵili ŵaliŵicile igolide peulu pamitaŵiko.
35Kaŵili ŵaliposele icipembe kunsalu ifitile koti liulu, neikasicile panini, neikasicile cee, nakunsalu iyakupyata inacile; ŵalicitile naŵakelubi, imilimo yakwe mfundi uwamano. 36Popele ŵalicicitile impanda sine isyaciti camuŋgasenje, nekuŵike'golide peulu pali syo; ifyaŵundoŵo fyasiko fyali fyegolide; kaŵili ŵalisiŵumbile utulindi twesilifa tune.
37Popele ŵalicitile icakucicila icakumulyaŋgo uwakwisema, icifitile koti liulu, necikasicile panini, necikasicile cee, necansalu iyakupyata inacile, imilimo yamutunjisi; 38nempanda syacico sisanu pamo nefyaŵundoŵo fyasiko; kaŵili ŵaliŵicile igolide peulu pamitwi yasiko napandondo syasiko isyakuŵambakanya; nakaŵili utulindi twasiko tusanu twali twaluŵemba.
Currently Selected:
Ifyakufuma 36: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
