Ifyakufuma 35
35
1Popele Mose waliwuŋgenye iŵumba lyaŵaIsilaeli ŵonse, nekulaŵila kuli ŵo ati: Aya emasiwi ayo ŵafundile ŵaYawe ati mukalukwacita: 2lmilimo ikalukucitwa pansiku sisanu nakamo, sombi pakasuŵa akansiku sisanu nasiŵili pakalukumuŵeleni kasuŵa akaswetelele, sabata uwakutusya ukwakuŵatonda ŵaYawe; aŵantu ŵonse uyo ukacita-mo imilimo eukepailwa. 3Tesi mukaasye umulilo ponse pamananda enu pakasuŵa kasabata.
4Popele apo Mose walilaŵile kwiŵumba lyaŵaIsilaeli ŵonse ati: Ici ecintu ico ŵafundile ŵaYawe ati: 5Muŵule pakati pali mweŵo umulambu uwakuli ŵaYawe; aŵantu ŵonse uyo uli nemutima wakusumina bwino, ŋgaakaulete umulambu waŵaYawe, igolide nesilifa neluŵemba, 6nensalu ifitile koti liulu, neikasicile panini, neikasicile cee, nensalu inacile, nemasako ambusi, 7nefiseŵa fyambelele isyalalume ifisaŋgwilwe ati fikasicile, nefiseŵa fyamatakasi, nefiti fyamuŋgasenje, 8nemafuta akunyale, nefinuncile bwino ifyakumafuta akusufya, nefyakuli libona uwanse, 9nemabwe amasyoyami, pamo nemabwe akuŵika pali efodi napacakulamina-mo intiŵi. 10Popele aŵantu ŵonse uli nemutima wamano, ŋgaakese acite fyonse'fyo ifi ŵafundile ŵaYawe: 11isema, necitente caliko, necakufimba pali lyo, neŋkoŵeko syaliko, nematabwa aliko, nemitaŵiko yaliko, nempanda syaliko, netulindi twaliko, nebokosi lyakulayana, 12nemitembo yaliko, necifuniko cacifuto, necipembe icakucicila, 13netebulu, nemitembo yaliko, nefiŋkoloŋkolo fyonse ifyakuli lyo, nasiŋkwa waŵumboni, 14necakuteka-po inyale kaŵili, nefiŋkoloŋkolo ifyakuli co, nenyale syacico, nemafuta akunyale, 15neconto cafinuncile bwino, nemitembo yaciko, nemafuta akusuŵa-ko, nefinuncile bwino ifyanse, necipembe icaciŵi kumulyaŋgo uwakwisema, 16neconto camilambu iyakoca, pamo necakupika caciko icaluŵemba, nemitembo yaciko, nefiŋkoloŋkolo fyonse ifyakuli co; nemusambilo, necapansi cauo, 17nefipembe ifyakuluŵansa, nempanda syakuko, netulindi twasisyo, necakucicila pamusiko uwakuluŵansa, 18nemisoŋga iyakwisema, nemisoŋga iyakuluŵansa, nemyando yaiyo, 19nefyakufwala ifipasilwe bwino, ifyakupyunjila nafyo mumulenda uswetelele, nefyakufwala ifiswetelele ifyakwe Aloni umupapatilisi, nefyakufwala fyaŵana ŵakwe, mukupyuŋga muŵupapatilisi.
20Popele apo iŵumba lyonse lyaŵaIsilaeli lyalifumine pamenso pakwe Mose. 21Naŵo ŵaliisile, ŵonse aŵasantucile mumitima, naŵaŵo ŵonse aŵali nemitima iyakusuminina, nekuleta umulambu waŵaYawe, uwakumilimo iyakucitente cewuŋgano, newakukupyuŋga kwakuko konse, newakufyakufwala ifiswetelele. 22Lomba kaŵesa, neŵalalume neŵanakasi, ŵonse aŵali nemitima iyakusuminina, kaŵaleta amakosa nensela nensalamu nemiŋkoŋka, fyonse ifyamataŋgalo ifyegolide; icine aŵantu ŵonse aŵaletele umulambu wegolide kuli ŵaYawe. 23Kaŵili aŵantu ŵonse uyo ubwenekele ati ndi nensalu ifitile koti liulu, neikasicile panini, neikasicile cee, nensalu inacile, nemasako ambusi, nefiseŵa fyambelele isyalalume ifisaŋgwilwe ati fikasicile, nefiseŵa fyamatakasi, kaafileta. 24Aŵantu ŵonse, aŵaposele umulambu wesilifa newaluŵemba, kaŵaleta umulambu waŵaYawe; kaŵili aŵantu ŵonse uwabwenekele ati ndi nefiti fyamuŋgasenje ifyakumilimo yonse iyakupyuŋga, kaafileta. 25Kaŵili aŵanakasi ŵonse aŵali nemitima yamano kawapike'ŋguwo kuminwe yaŵo, kaŵalete'yo iŵapicile, neifitile koti liulu, neikasicile panini, neikasicile cee, nensalu inacile. 26Popele aŵanakasi ŵonse aŵasantucile mumitima yamano kaŵapika amasako ambusi. 27Kaŵili aŵekalicisi kaŵaleta amabwe amasyoyami, nemabwe akuŵika pali efodi napacakulamina-mo intiŵi; 28nefinuncile bwino, nemafuta akunyale, neakumafuta akusuŵa-ko, neakufinuncile bwino ifyanse. 29AŵaIsilaeli ŵaliletele kuli ŵaYawe umulambu uwakupa lukoso koti mitima yaŵo; aŵalalume ŵonse neŵanakasi ŵonse aŵali nemitima iyakusuminina ukukuletela ukupyuŋga konse uko ŵafundile ŵaYawe ati kukacitwe kuminwe yakwe Mose.
30Popele Mose walilaŵile kuŵaIsilaeli ati: Ŵoneni, ŵaYawe ŵamwita kwisina lyakwe Besaleli, umwana wakwe Uli, umwana wakwe Ulu, uwapacikoto caŵena-Juda; 31nekumwisusyo'mupasi waŵaLesa, mumano namukalaŋgo namumilaŋgwe namuli ŵumfundi ŵonse; 32ati akaalakanye imilimo yamano, acite'fintu kwigolide nakwisilifa nakuluŵemba, 33nakukupinika amabwe amakweŵo apatali akwikatwa bwino, nakukuŵase'fiti; acite'milimo yaŵumfundi yonse yonse. 34Kaŵili ŵaLesa ŵamwinjisya mumutima wakwe ati akalukusambisya, ŵoŵilo naAyolyabi, umwana wakwe Acisamaci, uwapacikoto caŵena-Dani. 35Ŵo ŵaŵesusya amano amumutima, ati ŵakacite imilimo yonse yonse, neyamulembesi uwapamabwe, neyakwe mfundi uwamano, neyamutunjisi uwansalu ifitile koti liulu neikasicile panini, neikasicile cee, nensalu inacile, neyamupicisi, eyaŵaŵo ŵonse aŵacite'milimo yonse, neyaŵaŵo aŵalaŋguluka imilimo yamano.
Currently Selected:
Ifyakufuma 35: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
