Ifyakufuma 34
34
1Popele apo ŵaYawe ŵalilaŵile kuli Mose ati: Liŵasile amaseleti ebwe aŵili akupalana neakutaŋga; popele nakulemba pamaseleti amasiwi ayo ali pamaseleti akutaŋga, ayo watoŵele. 2Lomba ukalukupembelele ulucelo, ukaninine palupili lwaSinai ulucelo, ukalibwenesye kuli neŵo apo peulu lyalupili. 3Kaŵili tapali-po neli muntu umo ukaninina pamo naweŵo; nakaŵili aŵantu ŵonse ŵekaŵonwa neli umo palupili ponse; nakaŵili amataŋga ambelele neaŋombe ekalya pamenso palupili ulo.
4Peŋka kaaŵasa amaseleti ebwe apalene neakutaŋga; naye Mose kaacelela ulucelocelo, kaaninina palupili lwaSinai, koti nifyefyo ifi ŵamuŵulile ŵaYawe, naye kaapinta muminwe yakwe amaseleti ebwe aŵili. 5Popele ŵaYawe ŵaliselucile mwikumbi, nekwimakana apo pamo nakwe, nekulitula isina lyaŵaYawe. 6Popele ŵaYawe ŵalipitile pamenso pakwe, nekutula ati: NiŵaYawe, ŵaYawe, ŵaLesa aŵeswile iŋkumbu, aŵaluse, aŵakokolo'kufitwa, aŵakumene lukoso iŋkumbu naŵucine; 7awalamine'ŋkumbu aŵantu imyanda namyanda, aŵafitulucila kuli ŵumbifi nakukupulaisya nakukuŵifya: awatawakasimaŋganya neli kusimaŋganya imilandu yaŵamilandu, aŵaŵike' milandu yaŵumbifi bwaŵawisiŵo paŵana ŵaŵo, napaŵana ŵaŵana ŵaŵo napalufyalo lwaŵusitatu napalwaŵusine. 8Popele Mose nekwaŋgufya nekwinamisya pansi, nekulukulambila. 9Naye ati: Kani ŵukumo ndibwene uluse pamenso enu, mŵeYawe, ndukumukombeteleni ati ŵaYawe ŋgawalukwenda pakati pali fweŵo; pakuti aŵaŵantu ŵacikaka; lomba mufitulucile kuli ŵumbifi bwesu nakukuŵifya kwesu, popele mutupoke koti ŵupyani bwenu.
10Kumfwa ŵaYawe ati: Ŵona, ndukucito'kulayana: pamenso aŵantu ŵoŵe ŵonse ŋkacite'timpelampela, ifitafiŋgacitwa ifyakuŵe'fyo monse mucalo capansi, neli nimumukoka waŵantu neli umo tau; popele aŵantu ŵonse, aŵo ukalukuli naŵo, ŵakaŵone'milimo yaŵaYawe, pakuti ifyo ifi ŋkacita naweŵo fyakukaŋkamano'kwakuti. 11Ŋgolukulonda bwino ifyo ifi ndukufunda lelo: ŵona, ŋkatamfya pamenso powe aŵaAmoli neŵaKanani, neŵaYeti, neŵaPelisi, neŵaYifi, neŵaJebusi. 12Cenjela, wikesa kulayana nenjikale isyamucalo umo ulukuya; uko-kulayana kwikaŵa coŋgola pakati pali weŵo; 13sombi mukatoŵale ifyonto fyasiko, mukasansale impanda syasiko, mukateme ŵaAsyela ŵasiko; 14pakuti tesi ukacindike lesa umbi; pakuti ŵaYawe, aŵelicilwe ati niŴukwa, niŵaLesa ŵaŵukwa; 15wikesa kulayana nenjikale isyamucalo, lomba neŵantu ŵoŵe nekucencemansyanya naŵalesa ŵasiko, nekuŵepaila imilambu ŵalesa ŵasiko, lomba nemuntu umbi nekukwita, naweŵo wikesa kulya ifyamulambu wakwe; 16neli kupoka paŵana ŵasiko aŵanakasi aŵakuupwa aŵana ŵoŵe aŵalalume, neŵana ŵasiko aŵanakasi ŵekesa kucencemansyanya naŵalesa ŵasiko, nekuwaleŋgesya aŵana ŵoŵe aŵalalume ati naŵo ŵacencemansyanye naŵalesa ŵasiko. 17Tesi uliŵumbile ŵalesa ŵacela icisuŋgulwilwe neli umo.
18Icitenje icafimpwampwa ifyakuŵulo'musuŋga ukalukucilama. Ukalukulya ifimpwampwa ifyakuŵulo'musuŋga insiku sisanu nasiŵili, koti nifyefyo ifi nakufundile, pampindi isalulwilwe pamwensi waAbibi: pakuti pali nipamwensi waAbibi epo wafumine mucalo caIjipiti.
19Aŵana aŵaŵele ŵonse ŵanji; pamo nenama syoŵe syonse isyalalume, aŵana aŵaŵele ŵaŋombe neŵambelele. 20Umwana wamboŋgolo umuŵele ukamuluŵule pakuposa akana kambelele: sombi kani tesi umuluŵule, ukamukonone umukosi. Aŵana ŵoŵe aŵalalume aŵaŵele ukaŵaluŵule ŵonse. Tapakaŵoneka pamenso anji umuntu uli minwe lukoso.
21Ukalukucite'milimo ukukumana insiku sisanu nakamo; sombi pakasuŵa kansiku sisanu nasiŵili ukalukutusya; naŋgawa ati nipampindi yakulima napampindi yakuteŵula, ukalukutusya.
22Nakaŵili ukalukulame'citenje camiluŋgu, icafyamutulu ifyakuteŵula kwatiligu, necitenje cakuloŋgela pakupelo'mwaka.
23Impindi sitatu pamwaka umo aŵalalalume ŵoŵe ŵonse ŵakaŵoneke pamenso paŵaYawe Lesa, ŵaLesa ŵaŵaIsilaeli. 24Pakuti ŋkaitamfya imikoka yaŵantu pamenso oŵe, nekwikusya imipaka yoŵe; kaŵili tapakalukuli-po umuntu uwakukumbwa icalo coŵe, pakulukuya weŵo mukuŵoneka pamenso aŵaYawe Lesa woŵe impindi isyo syotatu pamwaka.
25Tesi ukapele imilopa yamulambu wanji pamo nefimpwampwa ifyamusuŋga; kaŵili umulambu uwacitenje icamuciluko tesi ukasiwe ukufiko'lucelo.
26Icakutaŋga lukoso icapafyamutulu ifyapamusili woŵe ukaciinjisye muŋanda yaŵaYawe Lesa woŵe. Tesi umwipicile umwana wambusi mumandili akwe nyina.
27Popele apo ŵaYawe ŵalilaŵile kuli Mose ati: Ulembe amasiwi ayo; pakuti koti kweŵa kwamasiwi ayo ndilayene naweŵo neŵaIsilaeli. 28Lomba walisyele apo pamo naŵaYawe utusuŵa amakumi ane nemasiku nao amakumi ane; kaŵili taalile-po ifyakulya neli kunwa-po neli menda. Naŵo ŵalilembele pamaseleti amasiwi akulayana, amafunde ayo ikumi.
29Popele apo lomba, ili aselucile Mose kulupili nemaseleti ayo aŵili akulayana muminwe yakwe Mose, pakuseluka kulupili, lomba Mose taaisiŵile ati iŋkanda iyapamenso panji ilukusasamuka, pakuti pakwambala naŵo. 30Popele apo pakumuŵona Mose, Aloni neŵaIsilaeli ŵonse, lomba iŋkanda iyapamenso pakwe yalukusasamuka; naŵo ŵalitinine ukupalamina kuli ye. 31Popele Mose waliŵetile; popele Aloni neŵekalicisi ŵeŵumba ŵonse ŵalibwelele kuli ye; lomba Mose kaalaŵila naŵo. 32Popele panuma yafyefyo aŵaIsilaeli ŵonse ŵalipalamine; naye waliŵafundile fyonse'fyo ifi ŵamuŵulile ŵaYawe palupili lwaSinai. 33Popele ili asilile ukwambala naŵo, Mose walilifimbile pamenso necitambala. 34Sombi pakwinjila Mose pamenso aŵaYawe mukulukwambala naŵo, kaalukufule'citambala, ili taaŋgafuma-mo; naye kaafuma-mo, kaaŵaŵula aŵaIsilaeli ifyo ifi afundilwe; 35popele aŵaIsilaeli kaŵamuŵona Mose pamenso ati ilukusasamuka iŋkanda yapamenso pakwe Mose; naye Mose kaalifimba pamenso liŵili necitambala, ili taaŋgenjila mukwambala naŵaLesa.
Currently Selected:
Ifyakufuma 34: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
