Ifyakufuma 29
29
1Lombe'ci ececo ici ukaŵacite mukuŵaswesya ati ŵakapyunjile muŵupapatilisi: ukaŵule iŋombe imo iyanice nembelele isyalalume siŵili isyakuŵule'fisemba, 2nefimpwampwa ifyakuwule'musuŋga, nemikate iyakuŵulo'musuŋga isaŋkene nemafuta, nefimbala ifyakuwule'musuŋga ifisufisiwe nemafuta; ukaficite kuwuŋga bwatiligu uŵupelekele. 3Popele ukafiŵike fyonse mucilukwa cimo, ukafilete mucilukwa ico, pamo neŋombe nembelele isyalalume syoŵilo. 4Popele ukalete kumulyaŋgo uwakucitente cewuŋgano Aloni neŵana ŵakwe aŵalalume, ukaŵasamfye kumenda. 5Eli ukaŵule ifyakufwala, ukamufwike Aloni ilaya, nemwinjila wakwe efodi, naefodi, necakulamina-mo intiŵi, nekumufwika umusipi uposelwe nemano uyo uli pali efodi; 6kaŵili ukaŵike pamutwi wakwe insalu iyapamutwi; ukaŵike umuntinya uswetelele pa nsalu iyapamutwi. 7Eli ukaŵule amafuta akusufya, uketile pamutwi wakwe, ukamusufye.
8Popele apo ukaŵalete aŵana ŵakwe, ukaŵafwike amalaya. 9Ukaŵafwike imisipi, Aloni neŵana ŵakwe, ukakake pamitwi yaŵo insalu isyapamitwi; naŵo eli ŵakalukuli neŵupapatilisi kwifunde lyamuyayaya; lomba Aloni neŵana ŵakwe ukaŵapose kuli ŵaLesa. 10Popele ukalete iŋombe pamenso acitente cewuŋgano: popele Aloni neŵana ŵakwe ŵakaŵike'minwe yaŵo pamutwi waŋombe. 11Eli ukepaye iŋombe pamenso aŵaYawe, pamulyaŋgo uwakucitente cewuŋgano. 12Popele apo ukaŵule-po pamilopa yaŋombe, ukeŵike pamaseŋgo akuconto kumunwe woŵe; eli uketulule imilopa yonse pansi yaconto. 13Popele apo ukaŵule amafuta onse afimba-po pamala, pamo nalwisalila uli peulu paciŵu, nemfyo syoŵilo, nemafuta ali peulu pali syo, nekufiocela paconto. 14Sombi umunefu waŋombe neciseŵa caiyo neŵufulu bwaiyo ukocele mumulilo pesonde lyacisasa: ifyo mulambu uwafyakuŵifya.
15Kaŵili ukaŵule imbelele iyalalume imo; popele Aloni neŵana ŵakwe ŵakaŵike iminwe yaŵo pamutwi wambelele iyalalume. 16Eli ukaipaye imbelele, ukaŵule imilopa yaiyo, ukaisanse ponse ponse paconto. 17Popele apo ukapandale imbelele, ukasamfye amala nemolu, ukaŵike pamo nefyakupandala nemutwi. 18Popele ukoce imbelele iyalalume yonse paconto: mulambu uwakuŵocela ŵaYawe: bwema uŵuweme, mulambu uwamulilo uwakuli ŵaYawe.
19Popele apo ukaŵule imbelele iyalalume iyo imbi; popele Aloni neŵana ŵakwe ŵakaŵike iminwe yawo pamutwi wambelele. 20Eli ukaipaye imbelele, ukaŵule-po pamilopa yaiyo, ukeŵike peulu lukoso lyakutwi kwakwe Aloni ukwakulwine, napeulu lukoso lyakutwi kwaŵana ŵakwe ukwakulwine, napacikumo icakukuŵoko kwaŵo ukwakulwine, napacikumo icikulu icakulukasa lwaŵo ulwakulwine, nekwisanse'milopa paconto ponse ponse. 21Popele ukaŵula-po pamilopa iili paconto, nekuŵula-po pamafuta akusufya, ukasanse pali Aloni, napafyakufwala fyakwe, napaŵana ŵakwe, napafyakufwala fyaŵana ŵakwe pamo nakwe; eli akasweta pamo nefyakufwala fyakwe neŵana ŵakwe, nefyakufwala fyaŵana ŵakwe pamo nakwe. 22Kaŵili ukaŵule-po pambelele iyalalume amafuta, nemucila unonene, nemafuta afimba-po pamala, nalwisalila uli peulu paciŵu, nemfyo syoŵilo, nemafuta ali pali syo, nekasolo akakulwine; pakuti nimbelele iyalalume iyakuliposa kuli ŵaLesa; 23kaŵili ukawule icimpwampwa casiŋkwa cimo, nemukate wasiŋkwa wamafuta umo, necimbala cimo, mucilukwa cafimpwampwa ifyakuwulo'musuŋga ifili pamenso aŵaYawe; 24popele ukaŵike fyonse paminwe yakwe Aloni, napaminwe yaŵana ŵakwe; eli ukafikupale umulambu uwakukupala pamenso aŵaYawe. 25Popele ukafipoke muminwe yaŵo, ufyoce paconto peulu pamulambu wakoca, fikaŵe bwema bwanse pamenso aŵaYawe: mulambu uwamulilo uwakuli ŵaYawe. 26Popele apo ukaŵule akatiŵi kambelele iyalalume iyakwe Aloni iyakuliposa, ukakakupale umulambu uwakukupala pamenso aŵaYawe: ako kakalukuli cakulekanya coŵe. 27Popele ukakaswesye akatiŵi kamulambu uwakukupala, pamo nekasolo kamulambu uwakusuntula, uyo ukupalwa nekusuntulwa, uwambelele iyalalume iyakuliposa, ewayeyo iyakuli Aloni, newayeyo iyakuŵana ŵakwe; 28popele ukalukuli wakwe Aloni neŵana ŵakwe koti kuŵalambula insiku syonse kuŵaIsilaeli; pakuti mulambu uwakusuntula uwakuposwa kuŵaIsilaeli uwapamilambu yaŵo iyaŵutende, emulambu waŵo uwakusuntula uwakuli ŵaYawe.
29Kaŵili ifyakufwala fyakwe Aloni ifiswetelele fikalukuli fyakuŵana ŵakwe panuma pakwe, ati ŵakasufisiwe ili ŵafifwite, ŵakaposwe kuli ŵaLesa ili ŵafifwite. 30Uyo-mwana wakwe ukalukuli mupapatilisi pamupunda wakwe akalukufifwite insiku sisanu nasiŵili, pakwinjila ye mucitente cewuŋgano mukupyunjila-mo umo umuswetelele.
31Popele ukaŵule imbelele iyalalume iyakuliposa, ukepike umunefu waiyo pamupunda uswetelele. 32Popele apo Aloni neŵana ŵakwe ŵakalye umunefu wambelele, pamo nefimpwampwa fyasiŋkwa ifili mucilukwa, pamulyaŋgo uwakucitente cewuŋgano, 33Lomba ŵakalye ifyo ifi kwalamwinwa kuli fyo, mukufiposa kuli ŵaLesa nekufiswesya; sombi umwensu tesi akalye-ko, pakuti filiposelwe kuli ŵaLesa. 34Lomba kani fimbi ifyamunefu wakuliposa kani fimbi ifyafimpwampwa fyasiŋkwa fikasyalepo, ukufiko'lucelo, eli ukafyoce'fyo ifyakusyala-po mumulilo; tesi fikaliwe-po, pakuti filiposelwe kuli ŵaLesa.
35Popele ukacite'fyo kuli Aloni nakuŵana ŵakwe, koti nifyefyo fyonse ifi ŋkufundile; ukalukuŵaposa kuli ŵaLesa insiku sisanu nasiŵili. 36Lomba insiku isyo syonse ukepaye iŋombe yamulambu uwafyakuŵifya koti kulamwina, eli ukaswesye iconto, pakucicitila ukulamwina; kaŵili ukacisufyepo, mukuciswesya. 37Insiku sisanu nasiŵili ukalukucicitila iconto ukulamwina, nekuciswesya; lomba iconto cikalukuswetelele lukoso; kaŵili fyonse lukoso, ifikakuma-ko kuconto, fiŋgaswetelela.
38Lombe'fyo ifi uŋgaposa paconto koti mulambu nififi: utwana twambelele utwakulala pano pesonde umwako' mo lukoso, insiku syonse tuŵili tuŵili. 39Akana kambelele kamo ukakapose ulucelo; akaŵyakwe ukakapose iciŋgulo. 40Kaŵili pamo nekana kamo ukapose icakwesya cimo pekumi cakwe efa wawuŋga uŵupelekele, icisaŋkene necakwesya cimo pali fine fyakwe cini wamafuta akandilwe; pamo necakwesya cimo pali fine fyakwe cini wamfaina, koti mulambu wakunwa. 41Popele akana kambelele ako kambi ukakapose iciŋgulo, nekukacitila koti mulambu wawuŋga ubwalucelo nakoti mulambu wakako uwakunwa, ati kakaŵe bwema bwanse, mulambu uwamulilo uwakuli ŵaYawe. 42Ico cikalukuli mulambu uwakoca uwamuyayaya pafitentekwa fyenu kumulyaŋgo uwakucitente cewuŋgano pamenso aŵaYawe: uko ŋkalukumuwoneni, mukulaŵila naweŵo apo. 43Kaŵili apo popele ŋkalukusaŋgana neŵaIsilaeli; kaŵili icitente cikalukuswesiwa kuŵuleme bwanji. 44Lomba ŋkafiswesya icitente cewuŋgano neconto; kaŵili naAloni naye neŵana ŵakwe ŋkawaswesya, ati ŵakalukumpyunjila muŵupapatilisi. 45Popele ŋkalukwikala pakati paŵaIsilaeli; ŋkalukuli nineŵaLesa ŵaŵo. 46Kaŵili ŵakesiŵa ati neŵo nineŵaYawe, Lesa waŵo, aŵaŵafumisye mucalo caIjipiti, ati ŋkalukwikele pakati pali ŵo: Neŵo nineŵaYawe, Lesa waŵo.
Currently Selected:
Ifyakufuma 29: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
