Ifyakufuma 25
25
1Popele ŵaYawe ŵaliilaŵile kuli Mose ati: 2Ukalaŵile kuŵaIsilaeli ati ŋgawakandetete umulambu; mukapoke umulambu wanji kuŵantu ŵonse aŵakasumina bwino mumitima yaŵo. 3Umulambu wanji uyu mukapoka kuli ŵo niwuvu: Iigolide nesilifa neluŵemba; 4nensalu ifitile koti liulu, neikasicile panini, neikasicile cee, nensalu inacile, nemasako ambusi; 5nefiseŵa fyambelele isyalalume ifisaŋgwilwe ati fikasicile, nefiseŵa fyamatakasi, nefiti fyamuŋgasenje; 6nemafuta akunyale, nefinuncile bwino ifyakumafuta akusufya, nefyakuli libona uwanse; 7nemasyoyami, pamo nemabwe akuŵika pali efodi napacakulamina-mo intiŵi.
8Kaŵili ŋgawanjiwacile umulenda uswetelele; ati ŋkalukwikala pakati pali ŵo. 9Koti nifyefyo fyonse ifi ndukukulanjisya, ifyamekalilo amutanda nefyamekalilo afintu fyamomo, koti nifyopele'fyo mukawiŵake.
10Popele ŵakancitile ibokosi lyaciti camuŋgasenje: muŵutali likakumane amakubita aŵili nelyeyafu, kaŵili mubwipi likakumane ikubita limo neyafu, nakaŵili muŵutali ubwakufuma pansi likakumane ikubita limo neyafu. 11Popele ukaŵike peulu paciti ponse igolide iliswetele, namukati napesonde ukaliŵike peulu paciti; kaŵili ukasiŋgulusye pali lyo umuntinya wegolide. 12Popele ukaliŵumbile imikoŋko yegolide ine, nekwikaka kumolu aliko onane; kaŵili imikoŋko iŵili ikalukuli kuluŵali lumo, naimbi imikoŋko iŵili ikalukuli kuluŵali lumbi. 13Popele ukacite imitembo yaciti camuŋgasenje, nekuŵike'golide peulu pali yo. 14Popele ukapusye imitembo mumikoŋko iili pambali syebokosi, mukutembe'bokosi kuli yo. 15Imitembo ikalukuli mumikoŋko iyakwibokosi; tesi ikafumiwe kuli lyo. 16Kaŵili ukaŵike mwibokosi ukulayana uko uku ŋkakupela.
17Popele ukacite icifuniko cacifuto icegolide iliswetele: muŵutali cikakumane amakubita aŵili nelyeyafu, kaŵili mubwipi cikakumane ikubita limo neyafu. 18Kaŵili ukaŵumbe ŵakelubi ŵegolide ŵaŵili, ukaŵacite kufyela ifyakupamwa, kumpelo syoŵilo isyakucifuniko cacifuto. 19Ukacite kelubi umo kuluŵali lumo, naumbi kelubi umo kuluŵali lumbi; ukaŵaŵumbile ŵakelubi kumo necifuniko cacifuto pambali syoŵilo syacico. 20Popele ŵakelubi ŵakatambicile peulu amapindo aŵo, ŵakafimbe-po pacifuniko cacifuto kumapindo aŵo, ili ŵalolansyanya nemenso aŵo; amenso aŵakelubi akalukulola kucifuniko cacifuto. 21Popele ukaŵike icifuniko cacifuto peulu pebokosi; kaŵili mwibokosi ukaŵike ukulayana uko uku ŋkakupela. 22Lomba ŋkalukusaŋgana naweŵo popele apo, nekulukwambala naweŵo, ili njikele peulu lyacifuniko cacifuto, pakati pali ŵakelu bi ŵoŵilo aŵali peulu Iyebokosi lyakulayana, ifyafyefyo fyonse ifi ŋkakuwula ifyakuŵafunda aŵaIsilaeli.
23Kaŵili ukacite itebulu lyaciti camuŋgasenje: muŵutali likakumane amakubita aŵili, kaŵili mubwipi likakumane ikubita limo, namuŵutali ubwakwesya peulu namo likakumane ikubita limo neyafu. 24Kaŵili ukaŵike peulu pali lyo igolide iliswetele; nakaŵili ulicitile umuntinya wegolide uwakulisiŋguluka. 25Kaŵili ukalicitile umukombelo uwakulisiŋguluka uwakwesyo'ŵukulu bwacipanta; nakaŵili ukaucitile umukombelo umuntinya wegolide uwaku usiŋguluka. 26Popele ukalicitile imikoŋko yegolide ine, nekwiŵika imikoŋko kumakoŋko onane akumolu aliko onane. 27Imikoŋko ikalukuli apepi napamukombeio, apakupusisya imitembo iyakutembe'tebulu. 28Kaŵili ukacite imitembo kuciti camuŋgasenje, nekuŵike' golide peulu pali yo, ati itebulu likatembwe kuli yo. 29Nakaŵili ukasicite imbale syaliko, nemasupuni aliko, neŋkomeci syaliko, nemabeseni aliko, akwitila-ko; ukaacite kwigolide iliswetele. 30Lomba ukalukuteka petebulu siŋkwa waŵumboni insiku syonse.
31Popele ukaciŵumbe icakuteka-po inyale icegolide iliswetele; icakuteka-po cikacitwe kufyela ifyakupamwa, necapansi caciko, nemusalawo waciko; kaŵili iŋkomeci syaciko, nefipumputu fyaciko, nemaluŵa aciko, fyonse fikaŵumbilwe kumo naco; 32popele mukafume mumbali syaciko imitano isanu naumo; imitano yacakuteka-po inyale itatu ikafume kuluŵali lumo lwaciko, nemitano yacakuteka-po itatu nayo ikafume kuluŵali lumbi lwaciko; 33iŋkomeci sitatu, isiŵumbilwe koti maluŵa asyakedi, sikalukuli pamutano umo, necipumputu neluwa: neŋkomeci sitatu, isiŵumbilwe koti maluŵa asyakedi, nasyo sikalukuli pamutano umbi, necipumputu neluŵa. Kukalukuli koti nifyopele'fyo pamitano yosanu naumo ilukufuma mucakutekapo inyale; 34kaŵili mucakuteka-po mukai ukuli iŋkomeci sine, isiwumbilwe koti maluŵa asyakedi, nefipumputu fyasiko nemaluŵa asiko; 35kaŵili icipumputu cikalukuli pansi pamitano iŵili iŵumbilwe kumo naco, nacimbi icipumputu pansi pamitano iŵili iŵumbilwe kumo naco, nacimbi naco icipumputu pansi pamitano iŵili iŵumbilwe kumo naco, ifyakumitano yosanu naumo ilukufuma mucakuteka-po inyale. 36Ifipumputu fyasiko nemitano yasiko fikalukuŵumbilwe kumo naco; conse cikalukuli ciŵuluŵulu icegolide iliswetele icakupamwa. 37Popele ukacite inyale syaciko sisanu nasiŵili; popele ŵakaambusye inyale syaciko mukutuŵa ponse pali co. 38Kaŵili ifimanto fyakuko nembale isyakuŵika-mo imilale, fyonse fikalukuli fyegolide iliswetele. 39Cikacitwe kwigolide iliswetele ilyakukumana italanto, pamo nefiŋkoloŋkolo ifyo fyonse. 40Lomba cenjela uficite koti mekalilo aya wabwenesiwe palupili.
Currently Selected:
Ifyakufuma 25: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
