Ifyakufuma 18
18
1Lomba ŵaYitilo, umupapatilisi uŵakuMidyani, wawisi-fyala Mose, ŵaliumfwile fyonse'fyo ifi ŵamucitile Mose ŵaLesa, nefiŵaŵacitile aŵaIsilaeli aŵantu ŵaŵo, ifyo ŵaŵafumisye mucalo caIjipiti aŵaIsilaeli ŵaYawe. 2Popele ŵaYitilo, ŵawisi-fyala Mose, ŵalipintile Sipola, umukasi wakwe Mose, ili atuminwe kuli Mose, 3pamo neŵana ŵakwe aŵalalume ŵoŵilo. Lombe'sina lyakwe umbi lyali niGesyomi, pakuti Mose walilaŵile ati: Nalukwikalekala mucalo cabwensu. 4Kaŵili ne sina lyakwe umbi naye lyali niElyesa, pakuti ye ati: ŴaLesa ŵaŵatata waliŋgofwele-ko, nekumpulusya kumpoko yakwe Falo. 5Popele ŵaYitilo, ŵawisi-fyala Mose, ŵaliisile, pamo neŵana ŵakwe aŵalalume nemukasi wakwe, kuli Mose kumpanta apo aikele kulupili lwaŵaLesa; 6naŵo ŵalilaŵile kuli Mose ati; Neŵo neYitilo, newiso-fyala, ndiisile kuli weŵo, nemukasi woŵe neŵana ŵakwe aŵalalume ŵoŵilo pamo nakwe. 7Popele Mose walifumine mukuŵacinsya ŵawisi-fyala, nekuŵenamisya, nekuŵafyonta-po; naŵo ŵoŵilo kaŵalukwipusyansyanya ifyakwikala kwaŵo kani kuweme; naŵo kaŵenjila namwisema.
8Popele Mose waliŵaŵulile ŵawisifyala fyonse'fyo ifi wamucitile Falo ŵaYawe nekuŵacitila aŵaIjipiti pakuti paŵaIsilaeli, nefyakukatasya fyonse'fyo ifyaisile pali ŵo pansila, nefiŵaŵapulwisye ŵaYawe. 9Popele ŵaYitilo ŵalisembele pakuti pakuwamo'ko konse ukwaŵacitile aŵaIsilaeli ŵaYawe, pakuŵapulusya muminwe yaŵaIjipiti. 10Peŋka ŵaYitilo ati: Ŵalicindeme ŵaYawe, aŵamupulwisyeni muminwe yaŵaIjipiti, namuminwe yakwe Falo; aŵaŵapulwisye aŵantu ukuŵafumya munsi muminwe yaŵaIjipiti. 11Pano ndiisiŵile ati ŵaYawe ŵalicilile uŵukulu napali ŵalesa ŵonse; icine paceŵo ico ici ŵaŵemine nekulitota. 12Popele ŵaYitilo, ŵawisi-fyala Mose, ŵaliŵaŵulile ŵaLesa umulambu uwakoca neyakwipaya; popele nekwisa Aloni neŵakulu ŵaŵaIsilaeli ŵonse, nekulye'fyakulya pamo naŵawisi-fyala Mose pamenso aŵaLesa. 13Popele apo ŋgamailo lomba Mose waliikele mukusololola neŵantu; lomba aŵantu ŵaliimakene ukumusiŋguluka Mose ukutatiko'lucelo ukufika napaciŋgulo. 14Popele ŵawisi-fyala Mose, ili ŵabwene fyonse'fyo ifi aŵacitile aŵantu, ŵalilaŵile ati: Mbafindo ifi ulukuŵacitila aŵantu? Mbanindo ulukwikalila weŋka, neŵantu ŵonse nekulukwimakana ukukusiŋguluka ukutatiko'lucelo ukufika napaciŋgulo? 15Popele Mose walilaŵile kuli ŵawisi-fyala ati: Nipakuti aŵantu ŵalesa kuli neŵo mukwipusya kuli ŵaLesa; 16kani ŵali neceŵo, ŵalesa kuli neŵo; lomba neŵo ndasololola iceŵo camuntu nemuŵyakwe, nekuŵesiŵisya ukulaya kwaŵaLesa nemafunde aŵo.
17Popele ŵawisi-fyala Mose ŵalilaŵile kuli ye ati: Ifi ulukucita tafiwemepo. 18Icine ukalemuka, naweŵo neŵantu aŵa uli naŵo; pakuti ici-ceŵo cililemesye ukwakuti pali weŵo; tawisi ukucicita weŋka. 19Pano umfwe'siwi lyanji, nakukuŵula bwino, lomba ŵaLesa ŋgawakulukwikala naweŵo: uŵaŵele aŵantu pali ŵaLesa, ukalete imilandu kuli ŵaLesa: 20kaŵili wakulukuŵasambisya ukulaya nemafunde, nekuŵalanjisye'nsila iyo iyi ŵaŋgenda-mo, nemilimo iyo iyi waŋgacita. 21Nakaŵili paŵantu ŵonse wakusalulula aŵantu ŵamano, aŵalukutonda ŵaLesa, aŵantu ŵaŵucine, aŵakufitilwa uŵunonsi ubwakutumpaika; wakwikalika pali ŵo aŵakuŵe'fyo, mukwikalika aŵantu pamaŵumba amyanda ikumi, neamwanda, neamakumi asanu, neekumi; 22popele ŋgaŵalukusololola neŵantu pampindi syonse; popele lomba ifyeŵo fyonse ifikulu makosa ŵakalukuleta kuli weŵo; sombi ifyeŵo fyonse finini ŵakalukusololola aŵene; fyopele'fyo pakulukupuŵa pali weŵo, lomba naŵo ŵakulukupintaŋkana naweŵo. 23Kani wakucite'fyo, naŵaLesa naŵo kani ŵakufunde fyopele'fyo, eli wakwisiŵo'kwikala nemakosa; neŵantu aŵa ŵonse naŵo ŵakalukuya kwawo neŵutende.
24Popele Mose waliumfwilisye isiwi lyaŵawisi-fyala, nekucita fyonse'fyo ifi ŵalaŵile. 25Peŋka Mose kaasalulula paŵaIsilaeli ŵonse aŵantu ŵamano, nekuŵekalika ŵufilolo paŵantu, mukwikalika aŵantu pamaŵumba amyanda ikumi, neamwanda, neamakumi asanu, neekumi. 26Naŵo lomba ŵalukusololola neŵantu pampindi syonse; ifyeŵo ifikatesye kaŵalukufileta kuli Mose, sombi ifyeŵo fyonse finini kaŵalukufisololola aŵene. 27Popele apo Mose walisumine ati ŵaye ŵawisi-fyala; naŵo ŵaliile kwaŵo aŵene.
Currently Selected:
Ifyakufuma 18: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
