Ifyakufuma 17
17
1Popele apo iŵumba lyonse lyaŵaIsilaeli lyaliendele ukufuma kumpanta iyakuSini panyendo syaŵo, koti kufunda kwaŵaYawe, nekukomena'masema kuLefidimi: sombi uko takwali amenda akunwa aŵantu. 2Pakuti pali fyefyo aŵantu ŵalimupatile Mose, nekulaŵila ati: Tupeleni amenda, tunwe! Kumfwa Mose walilaŵile kuli ŵo ati: Mbanindo mulukumpatila? Mbanindo mulukuŵesesya ŵaYawe? 3Lomba aŵantu ŵalukumfwilo'ko icilaka; kaŵili aŵantu ŵalimutamacile Mose, nekulaŵila ati: Mbanindo mutufumisye mucalo caIjipiti, mukutwipaya fweŵo neŵana ŵesu nenama syesu kucilaka?
4Popele Mose waliŵalilile ŵaYawe, ati: Mbambacite syani aŵa-ŵantu? Ŵati ŵafwaye ukumposa amabwe. 5Naŵo ŵaYawe ŵalilaŵile kuli Mose ati: Wende kuntanjile pamenso aŵantu, ukapinte neŵakulu ŵaŵaIsilaeli; kaŵili upinte muminwe yoŵe akasako koŵe ako wapamine-ko inika, ulukuya. 6Ŵona, nakwimakanina apo pacibwe icakuOlebi pamenso oŵe; popele wakucipame'cibwe, nemenda eli akufuma-mo muli co, ati ŵalukunwa aŵantu. Popele Mose walicitile'fyo pamenso aŵakulu ŵaŵaIsilaeli. 7Popele alipelicile apo ati niMasaci naMeliba, pakuti pakupata kwaŵaIsilaeli, napakuti ŵaliŵesesye ŵaYawe ukweŵa ati: Kani ŵali pakati pali fweŵo ŵaYawe, kani taŵa-po?
8Popele kwaliisile neŵaAmaleci, nekulukulwa neŵaIsilaeli kuLefidimi. 9Popele Mose walilaŵile kuli Josyua ati; Tusalulwile aŵantu, mufume, mukalukulwa newa Amaleci: mailo ŋkalukwimaka na peulu palupili nekasako kaŵaLesa muminwe yanji. 10Popele Josyua walicitile koti nifyefyo ifi alaŵile kuli ye Mose, nekulukulwa neŵaAmaleci. Lomba Mose naAloni naUlu ŵalininine peulu palupili. 11Popele apo, ili asuntwile ukuŵoko Mose, lomba aŵaIsilaeli kaŵacilo'ŵukali; kaŵili pakufikwila munsi ukuŵoko, lomba aŵaAmaleci kaŵacilo'ŵukali. 12Sombi amaŵoko akwe Mose alilemene; lomba ŵaliŵulile ibwe, nekuliŵika munsi muli ye, naye waliikele-po; popele Aloni naUlu ŵalukumusuntula'maŵoko mwiulu ukulukwekatilile, umbi paluŵali lumbi, naumbi naye paluŵali lumbi; popele amaŵoko akwe alikosele ukufika nakumpindi yakuwa akasuŵa. 13Popele Josyua waliŵakatesye aŵaAmaleci kumpoko. 14Popele ŵaYawe ŵalilaŵile kuli Mose ati: Ulembe'fi koti cakwanusya mwibuku, ukafipende apomfwanicile pali Josyua, ati: Ŋkasimaŋganisisya lukoso ukwanuka kwaŵaAmaleci pansi yeulu. 15Popele apo Mose waliŵunjile amabwe aconto, nekuciilika ati niYawe-nisi; 16nekulaŵila ati: ŴaYawe ŵalape'cilapo: ŵaYawe ŵakalukulwa neŵaAmaleci pafitentekwa nefitentekwa.
Currently Selected:
Ifyakufuma 17: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
