Ifyakufuma 16
16
1Popele apo ŵaliimine ulwendo lwaŵo ukufuma kuElimi; popele iŵumba lyonse ilyaŵaIsilaeli lyalificile kumpanta iyakuSini, iyili pakati paElimi naSinai, pakasuŵa kekumi nasisanu akamwensi waŵuiŵili ukufuma kumpindi iyo ŵafumine mucalo caIjipiti. 2Lomba iŵumba lyaŵaIsilaeli lyonse kalilukuŵatamacila Mose naAloni mumpaŋga; 3popele aŵaIsilaeli ŵalilaŵile kuli ŵo ati: Ŋgati ŋgatwafwa kukuŵoko kwaŵaYawe mucalo caIjipiti, ili tuciikele panoŋgo syafinani, ili tucilya ifyakulya nekwikuta; pakuti mweŵo mulitufumisye nekutuleta mumpante'yi, mukwipaye'ŵumbe'li lyonse kunsala.
4Popele ŵaYawe ŵalilaŵile kuli Mose ati: Ŵona, nakumulokesesyeni ifyakulya ifyakufuma kwi ulu; popele insiku syonse aŵantu ŵakalukufuma nekola ifyakukumana akasuŵa kamo; ati ŋkawesye kani ŵakalukwenda koti lifunde lyanji, kani ŵaŵa. 5Popele lomba pakasuwa kakukoŵeka-mo ŵakaansike'fyo ifi ŵakenjisya, nafyo fikakumana ukwesya kuŵili ukwafyefyo ifi ŵole'nsiku.
6Popele apo Mose naAloni ŵalilaŵile kuŵaIsilaeli ŵonse ati: Iciŋgulo eli mwakwisiŵa ati ŵaYawe eŵamufumisyeni mucalo caIjipiti: 7kaŵili ulucelo eli mukaŵono'ŵuleme bwaŵaYawe; pakuti ŵalukumfwo'kutamaka kwenu ukwakuli ŵaYawe: sombi fweŵo nifweŵani mulukututamacila? 8Popele Mose ati: Fikaŵa pakumupeleni ŵaYawe iciŋgulo ifinani ifyakulya, nekumupeleni ulucelo ifyakulya ifyakukumana; pakuti ŵaYawe ŵalukumfwo'kutamaka kwenu uku muŵatamacila: mbafweŵo nifweŵani? tamulukututamacila fweŵo, sombi niŵaYawe mulukuŵatamacila. 9Popele Mose walilaŵile kuli Aloni ati: Ulaŵile kwiŵumba lyawa Isilaeli ati: Palamineni pamenso aŵaYawe, pakuti ŵaumfwo'kutamaka kwenu.
10Popele apo, ili acilaŵila Aloni kwiŵumba lyonse lyaŵaIsilaeli, ŵalitontomekele kumpanta, lomba kuwena, uŵuleme bwaŵaYawe bwalibwenekele mwikumbi. 11Peŋka ŵaYawe kaŵalaŵila kuli Mose ati: Ndiumfwile ukutamaka kwaŵaIsilaeli; 12ulaŵile kuli ŵo ati: Iciŋgulo mwakulye'finani, lombo'lucelo mukekute'fyakulya; popele mukesiŵa ati neŵo eneŵaYawe Lesa wenu.
13Popele apo iciŋgulo lomba netuundu nekwisa nekunyemucila pacisasa; kaŵili ulucelo icime lomba caliikete kopa ponse apasiŋgulucile pacisasa. 14Popele ili cafumine icime icaikete, kuŵona ponse pampanta niku tuntu utuwuluŋgene tunini tunini koti candwa pansi. 15Lomba pakuŵone'fyo aŵaIsilaeli, ŵalukuŵulansyanya ati: Mbafindo ifi? pakuti taŵafiisiŵile. Popele Mose walilaŵile kuli ŵo ati: Ifi fyakulya ifi ŵamupeleni ŵaYawe ati mulukulya. 16ŴaYawe wafunde'fi ati: Mufyole mwense fikumane koti kulya kwenu, umuntu umo icakwesya icakukumana omeli umo; koti kupenda kwaŵantu mwakufyola, mwense mwakuŵatolela awamumasema enu. 17Popele aŵaIsilaeli ŵalicitile'fyo, ŵambi kaŵola ifinji, ŵambi naŵo ifice. 18Popele pakufyesya pamo naomeli, uyo uwaolele ifinji taali nefyakucila-po neli panini; kaŵili nawoyo uwaolele ifice taali nefyakucepa-po, tau; aŵantu ŵonse ŵalukola koti kulya kwaŵo. 19Popele Mose walilaŵile kuli ŵo ati: Awantu ŵonse tekusya-po fimbi ukufiko'lucelo. 20Sombi naŋgawe'fyo taŵamukuticile Mose; sombi ŵambi ŵalisile-po fimbi ukufiko'lucelo; lomba fyaliŵele nematila, nekulukunuŋka; peŋka Mose kaaŵakalipila. 21Popele ŵalukufyola incelo syonse, aŵantu ŵonse koti kulya kwaŵo; lomba pakukalipa akasuŵa fyalukusuŋguluka.
22Popele apo, pakasuŵa kakukoŵekamo ŵaliolele ifyakulya ifyakukumana ukwesya kuŵili, ŵaomeli ŵaŵili umuntu umo; popele aŵekalicisi ŵonse aŵeŵumba ŵaliisile nekumuŵula Mose. 23Naye walilaŵile kuli ŵo ati: Ifi efyefyo ifi ŵalaŵile ŵaYawe: Mailo ekutusya ukwakutonda, esabata uswetelele uwakuli ŵaYawe; kamoce'fyo ifi mulukufwayo'koca, kamwipike'fyo ifi mulukufwayo'kwipika; lomba fyonse ifyakusyala-po kamuliŵicila, mwakufilama ukufiko'lucelo. 24Popele ŵalifiŵicile ukufiko'lucelo, koti nifyefyo ifi afundile Mose; lomba tafyanuncile, kaŵili tamwali-mo neli litila. 25Popele Mose ati: Kamulye'fi lelo; pakuti lelo nisabata uwakuli ŵaYawe: Ielo tesi mufisaŋge mumpaŋga. 26Insiku sisanu nakamo mukalukufyola; sombi pakasuŵa kaŵusisanu nasiŵili pali nisabata, pali kakokasuŵa tapakalukuli-po neli panini. 27Popele apo pakasuŵa kaŵusisanu nasiŵili, lomba kwalifumine ŵambi aŵantu mukola, sombi taŵabwene-po neli panini. 28Popele apo ŵaYawe ŵalilaŵile kuli Mose ati: Mbamukaleka lisa ukukano' kulama'masiwi anji nemafunde anji? 29Woneni, pakuti ŵaYawe ŵamupeleni sabata, pakuti pali fyefyo ŵalukumupeleni pakasuŵa kakukoŵeka-mo ifyakulya ifyakukumana insiku siŵili; mŵeŵantu mwense kamulukwikala pantu penu, aŵantu ŵonse tekufuma-po pantu pakwe pakasuŵa kaŵusisanu nasiŵili. 30Fyopele'fyo aŵantu ŵalukutusya pakasuwa kaŵusisanu nasiŵili. 31Popele icikoto caŵaIsilaeli califiilicile isi na lyafifyo ati niMana; kaŵili fyalipalene nensaŋgu syagadi, fyalituŵile; nakaŵili ukufyumfwa palumini fyalipalene nefimbala ifili newuci.
32Kaŵili Mose ati: Ifi ŵafundile ŵaYawe nififi: Icakwesya icakukumana omeli umo ŋgacilukulaminwa ifitentekwa fyaŵana ŵenu; ati ŋgaŵakaŵone ifyakulye'fyo ifi namuteŵeteleni mumpaŋga, ili namufumisyeni mucalo caIjipiti. 33Popele Mose walilaŵile kuli Aloni ati: Uŵule inoŋgo, uŵike-mo mana uwakwesya omeli umo, ukaiŵike pamenso aŵaYawe, mukulaminwa ifitentekwa fyaŵana ŵenu. 34Koti nifyefyo ifi ŵamufundile Mose ŵaYawe, koti nifyopele'fyo efi afiŵicile Aloni pamenso akulayana, mukulamwa. 35Popele apo aŵaIsilaeli ŵalukulya mana imyaka amakumi ane, ili tawaŋgafika kucalo icali-mo neŵantu; ŵalukulya mana, ili tawaŋgafika mumipaka iyakucalo caKanani. 36Lomba ŵaomeli ikumi ŵalikumene ukwesya efa umo.
Currently Selected:
Ifyakufuma 16: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
