Ifyakufuma 14
14
1Popele ŵaYawe ŵalilaŵile kuli Mose ati: 2Ulaŵile kuŵaIsilaeli ati, Alukeni, mukome amasema pamenso paPikaciloti, pakati paMijidolo nesiŵa, pamenso paBala-sefoni; apasiŋkamene apo epo mwakukomena'masema pambali vesiwa. 3Popele Falo eli akalaŵila ifyaŵaIsilaeli ati: Ŵalifuluŋgene mucalo, impanta yaŵacicila. 4Naneŵo eli ŋkakosyo'mutima wakwe Falo, naye akalukuŵalonda; popele ŋkawa neŵuleme pali Falo napeŵumba lyakwe lyonse; kaŵili neŵaIjipiti ŵakesiŵa ati neŵo nineŵaYawe. Naŵo aŵaIsilaeli ŵalicitile'fyo.
5Popele apo ŵaliiŵulile imfumu yaŵaIjipiti ati ŵalikumbulucile aŵantu; popele umutima wakwe Falo ne mitima yaŵapyunjisi ŵakwe yaliwawelele fimbi aŵantu, naŵo ati: Mbefi findo ifi twacita, pakuti twasumina ati ŵaye aŵaIsilaeli, ŵaleke ukutupyunjila? 6Naye Falo waliansicile iŋgolofwana yakwe, nekuya neŵantu ŵakwe; 7kaŵili walipintile iŋgolofwana isisalulwilwe imyanda isanu na umo, pamo neŋgolofwana syonse isyamucalo caIjipiti, nefilolo ifyapali syo syonse. 8Popele ŵaYawe ŵalikosesye umutima wakwe Falo imfumu iyamucalo caIjipiti, naye aliŵalondelele aŵaIsilaeli; pakuti aŵaIsilaeli ŵalifumine nelupata. 9Popele aŵaIjipiti ŵaliŵalondelele, naŵakafwalo ŵonse neŋgolofwana syakwe Falo, neŵantu ŵakwe aŵapali ŵakafwalo, nefita fyakwe, nekukumana naŵo ili waikele pambali yesiŵa, apepi napaPikaciloti, pamenso paBala-sefoni.
10Popele, pakupalamina Falo, aŵaIsilaeli ŵaliceŵucile, lomba kuŵona nikuŵaIjipiti ŵalukutulonda; naŵo kaŵatino'kwakuti; peŋka aŵaIsilaeli kaŵaŵalilila ŵaYawe. 11Naŵo ŵalilaŵile kuli Mose ati: Kani nipakuti tapali ifilende mucalo ca Ijipiti, epo mwatufumya ati tukafwile mumpaŋga? Mbanindo mwatucitile'fi, ukutufumya mucalo caIjipiti? 12Kansi talili isiwi ilyo twalaŵile kuli mweŵo mucalo caIjipiti, ati; Tulekeni, ŋgatulukuŵapyunjila aŵaIjipiti? Pakuti ukuŵapyunjila aŵaIjipiti kulitwelelwe ukucila napakufwila mumpaŋga.
13Kumfwa Mose walaŵila kuŵantu ati: Mwitina, mwi maka ne, mukaŵone ukupulusya kwaŵaYawe, uko ŵakumucitileni lelo; pakuti aŵaIjipiti ifi muŵabwene lelo, tesi mukaŵaŵone liŵili insiku syonse lukoso. 14ŴaYawe ŵalukumulwileni; mweŵo mwakulukwikele lukoso celele.
15Popele ŵaYawe ŵalilaŵile kuli Mose ati: Mbanindo ulukundilila neŵo? Ulaŵile kuŵaIsilaeli ati ŵaye kuntanjile. 16Lomba ukasuntule akasako koŵe, utambike ukuŵoko koŵe peulu pesiŵa, ulilekanye paŵili; popele aŵaIsilaeli wakenjila pakati pesiŵa apomine. 17Lomba neŵo, ŵona, ŋkakosye'mitima yaŵaIjipiti; naŵo ŵakenjila ukuŵalonda aŵaIsilaeli; popele ŋkawa neŵuleme pali Falo, napeŵumba lyakwe lyonse, napaŋgolofwana syakwe, napaŵantu ŵakwe aŵapali ŵakafwalo. 18Kaŵili aŵaIjipiti ŵakesiŵa ati neŵo nineŵaYawe, pakuŵa neŵuleme neŵo pali Falo, napaŋgolofwana syakwe, napaŵantu ŵakwe aŵapali ŵakafwalo.
19Popele apo iŋkalamba yaŵaLesa, iyalukutanjilila aŵaIsilaeli, yalifuminepo nekuya kunuma yaŵo; kaŵili nekumbi nalyo lyalifumine-po pantanjile pali ŵo, nekwimakana kunuma yaŵo; 20nalyo lyalificile pakati pamasema aŵaIjipiti nemasema aŵaIsilaeli; lomba lyali likumbi nemfinsi kuŵaIjipiti, sombi lyaliŵapele aŵaIsilaeli ukutuŵo'ŵusiku; popele aŵaIjipiti taŵapalamine kuŵaIsilaeli uŵusiku ŵonse.
21Popele apo Mose walitambicile ukuŵoko kwakwe peulu pesiŵa; popele ŵaYawe ŵalitesesye amenda kucipupu icikulu icakumutulesuŵa uŵusiku ŵonse, nekwalule'siŵa ati mutunta uumine; lomba amenda alilekene paŵili. 22Popele aŵaIsilaeli ŵaliinjile pakati pesiŵa apomine; lomba amenda aliŵaŵelele miciliko kuŵili napalwine napacipiko.
23Popele aŵaIjipiti ŵalilondelele, nekwinjila ukuŵalonda mukati mwisiŵa, naŵakafwalo ŵakwe Falo ŵonse neŋgolofwana syakwe, neŵantu ŵakwe aŵapali ŵakafwalo. 24Popele apo lomba, kumaca, ŵaYawe ŵalilitontomekele iŵumba lyaŵaIjipiti mumulilo namwikumbi, nekulikatasye'ŵumba lyaŵaIjipiti. 25Naŵo ŵalifumisye imikoŋko yaŋgolofwana syaŵo, ati ŵalukusyensya nekukatasya; fyopele'fyo aŵaIjipiti kaŵalaŵila ati ŋgatuwutuke tufume pamenso paŵaIsilaeli; pakuti ŵaYawe ŵalukuŵalwila ukulwa neŵaIjipiti.
26Popele ŵaYawe ŵalilaŵile kuli Mose ati: Tambiko'kuŵoko koŵe peulu pesiŵa, ati abwele amenda, ese peulu paŵaIjipiti napaŋgolofwana syaŵo napaŵantu ŵaŵo aŵapali ŵakafwalo. 27Peŋka Mose kaatambiko'kuŵoko kwakwe peulu pesiŵa, nesiŵa lomba kalibwela nemakosa aliko pakuco'lucelo; popele aŵaIjipiti kaŵaŵutuka-ko; sombi ŵaYawe ŵaliŵawisisye aŵaIjipiti pakati pesiŵa. 28Amenda alibwelele nekwiŵisya iŋgolotwana, neŵantu aŵapali ŵakafwalo, neŵumba lyonse lyafita fyakwe Falo, ilyainjile pesiŵa ukuŵalonda aŵaIsilaeli; peŵumbe'lyo tapasyele neli muntu umo. 29Sombi aŵaIsilaeli ŵaliendele pamutunta apomine pakati pesiwa: kaŵili amenda aliŵaŵelele miciliko kuŵili palwine napacipiko.
30Fyopele'fyo ŵaYawe ŵalipulwisye Isilaeli muminwe yaŵaIjipiti ako-kasuŵa; popele aŵaIsilaeli ŵaliŵabwene aŵaIjipiti aŵafwile pambali yesiŵa. 31Kaŵili aŵaIsilaeli walibwene imilimo iyo ikulu iyacitile ŵaYawe paŵaIjipiti; naŵo aŵantu ŵalitondele ŵa Yawe; popele ŵalicetekele muli ŵaYawe namuli Mose umuntu wakwe.
Currently Selected:
Ifyakufuma 14: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
