Ifyakufuma 12
12
1Popele apo ŵaYawe ŵalilaŵile kuli Mose naAloni mucalo caIjipiti ati: 2Uno-mwensi ukaŵe kuli mweŵo wakutatike'myensi; ukaŵe kuli mweŵo mwensi wakutaŋga pamwaka.
3Kamulaŵila kwiŵumba lyonse lyaŵaIsilaeli ati: Pakukumana insiku ikumi pamwensi uno ŵonse wakawule-wule aŵana ŵambelele, koti mananda aŵawisiŵo, uyu muŋanda yakwe umwana wambelele umo, nawuyu naye umwana wambelele umo. 4Popele kani aŵamuŋanda ŵace, taŵakumene ukuŵulo' mwana wambelele, lombo'yo-muntu nemuŵyakwe uwamuŋanda iŵambakene neyakwe ŵakaŵulile pamo umwana wambelele umo, koti kupenda kwaŵantu; koti kulya kwaŵantu ŵonse mukaŵapende pakuti pamwana wambelele. 5Umwana wambelele wenu ukalukuli wakuwule'fisemba, umwalalume utaaŋgalala pano pesonde ukucila pamwako'mo; mukamuŵule pambelele kani nipambusi; 6popele mukamukulicile ukufika pansiku yekumi nasine pamwensi uyu wopele; popele iŵumba lyonse lyewuŋgano lyaŵaIsilaeli likepaye iciŋgule. 7Popele ŵakaŵule'milopa, ŵaisiŋge pafiti ifyakumbali syowilo isyakumilyaŋgo napeulu pamilyaŋgo iyamumananda aŵakalila-mo umwana wambelele. 8Kaŵili uŵo-ŵusiku ŵakalye ifinani, ifyakoca mumulilo; ŵakafilye pamo nefimpwampwa ifyakuŵulo'musuŋga neŵucisa uŵusasile. 9Mwikafilya ifiŵisi, neli nipakwipika mumenda, sombi mukafilye ifyakoca mumulilo, nemutwi wakwe pamo nemolu nemala onse. 10Popele tesi mukasye-po neli kantu ukufiko'lucelo; sombi ifyakusyala-po ukufiko'lucelo mukafyoce mumulilo, fikalale. 11Mukalye'fi: neŋguŵo syenu isipimpilwe limo, neŋkwaŵilo syenu pamakasa, nendondo muminwe; mukalye ukwakumanama; pakuti ifyo muciluko waŵaYawe.
12Pakuti ŋkapitana pacalo caIjipiti uŵo-ŵusiku; ŋkawepaya aŵana ŵonse aŵaŵele mucalo caIjipiti, neŵantu nenama; kaŵili ŋkawawusisye'milandu ŵalesa ŵonse aŵamucalo caIjipiti: neŵo nineŵaYawe. 13Popele imilopa ikalukuli kesiŵilo kuli mweŵo pamananda umuli mweŵo; popele, pakuŵone'milopa, ŋkamucilukeni, lombe'cincinsya tesi cikese pali mweŵo mukumonaleni, ili ŋkapame'calo caIjipiti.
14Popele akasuŵa ako kakalukuli kakumwanusyeni; lomba imyaka yonse mukalukukalaŋguluka ukuwuŋganina-po icitenje icakuli ŵaYawe; pafitentekwa fyenu fyonse mukalukuwuŋgane'citenje pakasuwa ako, ati kuŵe lifunde ilyamuyayaya. 15Insiku sisanu nasiŵili mukalukulya ifimpwampwa ifyakuŵulo'musuŋga; icine pakasuŵa kakutaŋga mukafumye-mo mumananda enu umusuŋga: pakuti aŵantu ŵonse, uyo uwakulya siŋkwa uli nemusuŋga ukufuma pakasuŵa kakutaŋga ukufika napakasuŵa kaŵusisanu nasiŵili, uyo-muntu akapi nikwa ukumufumya muIsilaeli. 16Popele pakasuŵa kakutaŋga pakalukuli kuli mweŵo iwuŋgano iliswetelele, napakasuŵa kaŵusisanu nasiŵili napo pakalukuli iwuŋgano iliswetelele; imilimo yonse lukoso tesi ikacitwe pansiku isyo, sombi muŋgacite'fyo fveŋka ifi waŋgalya aŵantu ŵonse. 17Popele mukalukulame'citenje cafimpwampwa ifyakuwulo'musuŋga; pakuti nipakasuŵa ako kopele nafumisye amaŵumba enu mucalo caIjipiti: pakuti pali fyefyo mukalukulama'kasuŵa ako pafitentekwa fyenu fyonse, ati kuŵe lifunde ilyamuyayaya. 18Pamwensi wakutaŋga, pakasuŵa kekumi nasine akamwensi uyo iciŋgulo, mukalukulye'fimpwampwa ifyakuwulo'musuŋga ukufika napakasuŵa kamakumi aŵili naka mo akamwe nsi uyo iciŋgulo. 19Insiku sisanu nasiŵili tekuti pakaŵoneke mumananda enu umusuŋga neli panini; pakuti aŵantu ŵonse uyo uwakulye'fyamusuŋga, uyo-muntu akapi nikwa ukumufumya mwiŵumba lyakuIsilaeli, naŋgaŵa ati ye mwensu lukoso, naŋgawa ati ye waku fyalwa mucalo. 20Tekuti mukalye-po neli kantu akali nemusuŋga: monse mumananda enu mukalukulye'fimpwampwa Ifyakuwulo'musuŋga.
21Popele apo Mose waliŵetile aŵakulu ŵonse ŵaŵaIsilaeli, nekulaŵila kuli ŵo ati: Kamuyeni, musalulule mwense aŵana ŵambelele, koti kupenda kwaŵantu awamumananda enu, mukepaye umuciluko. 22Popele mukaŵule icinsokela caesobi, mukacisumpule mumilopa iyili mwi beseni, eli mukasanse imilopa iyili mwibeseni peulu pamilyaŋgo napafiti ifyakumbali syoŵilo; lomba pali mweŵo tesi pakafume mumulyaŋgo muŋanda yakwe neli muntu umo ili taŵuŋgaca, 23Pakuti ŵaYawe ŵakapitana monse mukwipaya aŵaIjipiti; popele ili ŵakaŵone'milopa peulu pamilyaŋgo na, pafiti ifyakumbali syoŵilo, eli ŵakaciluka ŵaYawe pamilyaŋgo iyo, taŵakasumina ati enjile mumananda enu uwakonala mukumwipayeni. 24Popele mukalukulame'fyo ati fiŵe lifunde kuli mweŵo nakuŵana ŵenu insiku syonse isyamuyayaya. 25Popele apo lomba, ili mukafika kucalo ico ŵakamupeleni ŵaYawe, koti nifyefyo ifi ŵalayene, eli mukalukulame'milimo iyi. 26Popele apo lomba, pakumwipusyeni aŵana ŵenu ati; Mbayando imilimo iyi mulukucita? 27Eli mukalaŵile ati: Mulambu uwakwipaya, uwamuciluko waŵaYawe, awacilucile pamananda aŵaIsilaeli mucalo caIjipiti, ili ŵapamine aŵaIjipiti, nekupulusya awamumananda esu. Popele aŵantu ŵaliinamisye nekucindika.
28Popele aŵaIsilaeli ŵaliile nekucita koti nifyopele'fyo; ifyo ifi ŵaŵafundile Mose naAloni ŵaYawe, koti nifyopele'fyo kaŵacita.
29Popele apo lomba pakati kaŵusiku, ŵaYawe ŵaUipeye aŵana aŵaŵele ŵonse aŵamucalo caIjipiti, ukutatika pamwana umuŵele uwaŵaFalo aŵaikele peteŵe lyaŵo, ukufika nakumwana umuŵele uwakwe kaili uwali mwikati; pamo neŵana ŵanama aŵaŵele. 30Popele Falo waliŵucile uŵusiku uŵo, ye neŵapyunjisi ŵakwe pamo, neŵaIjipiti ŵonse; popele paliŵele umusowa ukulu mucalo caIjipiti; pakuti tapali-po iŋanda iyakuwula-mo ulufu.
31Naye Falo waliŵetile Mose naAloni uŵusiku, nekulaŵila ati: Imeni, mulukufuma-mo muŵantu ŵanji, mweŵo neŵaIsilaeli pamo; kamuyeni, mukaŵapyunjile ŵaYawe, koti nifyefyo ifi mwalaŵile. 32Pinteni nemataŋga enu ambelele neaŋombe, koti nifyefyo ifi mwalaŵile, mulukuya; kaŵili munsyucisye neŵo. 33Kaŵili aŵaIjipiti ŵalikakatisye aŵantu mukuŵafumyo'luŵilo mucalo; pakuti ŵo ati: Fwense twafwa! 34Popele aŵaIsilaeli ŵaliŵulile ifimpwampwa ifiŵisi lomba tafiŋgawa nemusuŋga, pakuti amaŋkuwala aŵo akukasila-mo alikacilwe muŋguwo syaŵo pafifusi fyaŵo. 35Naŵo aŵaIsilaeli walicitile koti lisiwi lyakwe Mose; nekulomba kuŵaIjipiti amataŋgalo esilifa nemataŋgalo egolide, nefyakufwala; 36kaŵili ŵaYawe ŵaliŵapele aŵantu uluse pamenso aŵaIjipiti, naŵo aŵaIjipiti ŵaliŵapele fyonse'fyo ifi ŵalombele. Naŵo ŵaliŵatapile aŵaIjipiti.
37Popele aŵaIsilaeli ŵaliendele ukufuma kuLamese nekufika kuSukoti, ukuŵapenda aŵalalume aŵaendele pansi, apakuŵulo'kupenda aŵanice, ŵalikumene amasausande imyanda isanu naumo. 38Kaŵili neŵumba lyaŵantu aŵamikoka namikoka ŵaliile naŵo pamo; nemataŋga ambelele neaŋombe, icine inama isinji ŵaliile nasyo. 39Popele ŵaliocele ifimpwampwa ifyakuwulo'musuŋga ifyafyefyo ifiŵisi ifi ŵafumisye mucalo caIjipiti, pakuti tafyali nemusuŋga: pakuti ŵalisindicilwe ukuŵafumya mucalo ca Ijipiti, taŵaisiŵile ukukokola, kaŵili taŵalitekele-po ifyakulya.
40Lombo'kwikalekala kwaŵaIsilaeli, uko ŵaikele mucalo caIjipiti, kwalikumene imyaka imyanda ine nemakumi atatu. 41Popele apo, pakupela-ko imyaka imyanda ine nemakumi atatu, pakasuŵa ako kopele, lomba amaŵumba aŵaYawe onse alifumine mucalo caIjipiti. 42Uŵusiku uŵo bwakutondwo'kwakuti ubwakuli ŵaYawe, pakuti pakuŵafumya mucalo caIjipiti; uŵo eŵusiku bwaŵaYawe uwuŋgatondwa kuŵaIsilaeli ŵonse pafitentekwa fyaŵo fyonse.
43Popele ŵaYawe ŵalilaŵile kuli Mose naAloni ati: Ili lifunde lyaMuciluko: awe na fyalo tesi ŵakalye-ko neli umo; 44sombi ŵakalume ŵaŵantu ŵonse aŵakuula indalama, pakuŵakopole'cisilamu mweŵo, eli waŋgalya-ko. 45Aŵakwikalekala lukoso neŵapyunjisi aŵalambulwa tesi ŵakalye-ko. 46Munanda intu imo emo ikaliwe; tesi mukatwale pesonde ifyanama neli panini, ukufifumya muŋanda, tau; kaŵili tesi mukakonone ifupa lyaiyo. 47Iŵumba lyonse lyaŵaIsilaeli likalukucite'fyo. 48Kaŵili, pakwikala naweŵo awensu, pakufwaya ŵo ukulamina ŵaYawe umuciluko, aŵalalume ŵaŵo ŵonse ŋgawakakopolwe icisilamu, eli ŵaŋgapalamina nekuulama; popele ŵakalukuli koti muntu uwafyalilwe mucalo; sombi aŵantu aŵakuŵulo'kukopolwe'cisilamu tesi ŵakai ye-ko neli umo. 49Ifunde limo lyeŋka likalukuli nakuli woyu ufyalilwe mucalo, nakumwensu uwakwikalekala pakati pali mweŵo.
50Popele aŵaIsilaeli ŵalicitile'fyo; fyopele'fyo ifi ŵaŵafundile Mose naAloni ŵaYawe, koti nifyopele'fyo kaŵacita.
51Popele apo, akasuŵa ako kopele, ŵaliŵafumisye ŵaYawe aŵaIsilaeli mucalo caIjipiti koti maŵumba aŵo.
Currently Selected:
Ifyakufuma 12: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
