Danyeli 1
1
1Pamwaka waŵuitatu uwaŵufumu bwakwe Jeyoyacimu, imfumu yaŵaJuda, lomba Nebukadinesa, imfumu yakuBabiloni, yaliisile kuJelusalemi, nekusiŋguluko'musi. 2Peŋka ŵaYawe ŵalimuposele Jeyoyacimu, imfumu yaŵaJuda, muminwe yakwe, pamo nafimbi ifiŋkoloŋkolo ifyamuŋanda yaŵaLesa; naye nekufipintila kucalo caSina kuŋanda yakwe lesa wakwe: kaŵili nekufiinjisya ifiŋkoloŋkolo namuŋanda yaŵuŵoni bwakwe lesa wakwe.
3Popele imfumu yalilaŵile kuli Asipenasi, icilolo cantuŋgu syaiyo ati, Winjisye ŵambi aŵaIsilaeli aŵo aŵamumukoka waŵufumu newaŵupemba; 4aŵasaŋkwa aŵataŵali nefyakuŵaŵifya neli cimo, aŵantu ŵaŵulombe, aŵakwisiŵisya amano onse, aŵacenjele mukwisiŵa, aŵakwisiŵa uŵusambisi ubwapatali, naŵaŵo aŵesiŵile ukwimakana muŋanda ikulu iyamfumu; lomba ukalukuŵasambisya ifyaŵusambisi nemulaka waŵaKalidaya. 5Kaŵili imfumu yalifundile ati ŵapoke ifyakulekanya ifyelelwe insiku syonse pafyakulya fyamfumu, napamfaina isi yalukunwa; nekulukuŵalisya bwino imyaka itatu; popele pakusila impindi iyo ŵakesiŵe ukwimakana pamenso amfumu. 6Lomba peŵumba lyaŵaŵo epo ŵali aŵaJuda aŵa, Danyeii naYananaya naMisyaeli naAsaliya. 7Popele icilolo cantuŋgu caliŵapele amasina; calimwilicile Danyeli ati niBelitesyasa, naYananaya ati niSyadilaci, naMisyaeli ati niMesyaci, naAsaliya naye ati niAbedinego.
8Sombi Danyeli walilifundile mumutima wakwe ati, Tesi ndukuliŵifya-po nefyakulya fyamfumu neli nimfaina isi ilukunwa-po; pakuti pali fyefyo walilombele kucilolo cantuŋgu ati mbule ukulukuliŵifya. 9Kaŵili ŵaLesa ŵalimu lanjisye ifyaŵupaŋga neŋkumbu pamenso acilolo cantuŋgu. 10Naco icilolo cantuŋgu nekulaŵila kuli Danyeli ati, Ndukuŵatina ŵasikulu ŵanji, imfumu, aŵafundile ifyafyakulya nefyakunwa fyenu; pakuti mbanindo ŵaŋgabwena pamenso enu paŵipile apakucila napa ŵasaŋkwa aŵamyaka yenu? Fyopelefyo muŋgaŋkulika umutwi nemfumu.
11Kumfwa Danyeli walaŵila kumpemba iyo iyi icilolo cantuŋgu caikalicile peulu pali Danyeli naYananaya naMisyaeli naAsaliya, ati, 12Ndukumulombeni ati, Twesyeni fweŵapyunjisi ŵenu insiku ikumi, musumine ati ŵakalukutupela inyaŋgu syakulya nemenda akunwa. 13Popele apo napamenso pesu pakaŵonwe kuli mweŵo, napamenso paŵasaŋkwa aŵo aŵalukulya pafyakulya fyamfumu; lomba koti nifyefyo ifi mukaŵona, efyo mukacite kuli fweŵo fweŵantu ŵenu. 14Fyopele'fyo aliŵomfwile ifyafyefyo, nekuŵesya insiku ikumi. 15Lomba pakupita insiku ikumi napamenso paŵo palibwenekele apaweme apakucila, naŵo ŵaliinine ukwakucila napaŵasaŋkwa aŵo ŵonse aŵalukulya pafyakulya fyamfumu. 16Pakuti pali fyefyo impemba yalifumisye ifyakulya fyaŵo nemfaina isyo ŵaŋganwa, nekuŵapela nenyaŋgu.
17Kaŵili aŵasaŋkwa aŵo ŵonane, ŵaLesa ŵaliŵapele ukwisiŵa nemilaŋgwe yaŵusambisi ŵonse nemano onse: naye Danyeli wali nekalaŋgo akakuŵulisisya ukuŵona konse nefiloto fyonse.
18Popele, ili syapelele-ko insiku isyo isyansicilwe kumfumu ati ŵaŵenjisye, lomba icilolo cantuŋgu caliŵenjisye pamenso akwe Nebukadinesa. 19Nayo imfumu nekwambala naŵo; lomba peŵumba lyaŵo ŵonse tapabwenekele neli umo uwakupalana nakwe Danyeli naYananaya naMisyaeli naAsaliya; pakuti pali fyefyo ŵo ŵalukwimakana pamenso amfumu. 20Kaŵili mufyeŵo fyonse ifyamano nekalaŋgo, ifyafyefyo imfumu yalukuwepusya, yalibwene ati ŵalukucila impindi ikumi napawabwaŋga neŵalaye ŵonse aŵalukwikala muŵufumu bwakweŵonse.
21Lomba Danyeli nekulukwikala ukufika nakumwaka wakutaŋga uwamfumu Kolesi.
Currently Selected:
Danyeli 1: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
