Danyeli 11
11
1Naneŵo kaŵili, pamwaka wakutaŋga wakwe Daliu, umuMadai, naliimakene mukumulunduŵika nekulukumukosya.
2Lomba pano ndukubwenesya ŵucine. Ŵona-ko pakema nasimbi imfumu sitatu muPasai; lomba iyaŵusine ikasicila syo syonse uŵuŵile; popele pakukosa yo pakuti paŵuŵile bwaiyo, ikaŵasuŋgwila ŵonse ukulukulwa neŵufumu bwaŵaEla.
3Popele apo imfumu yamakosa ikema, nekwikalika neŵukulu ubwakuti, nekulukucita koti mutima waiyo. 4Lomba pakwima yo, uŵufumu bwaiyo ŵukakononwa nekwabwa ukuya kufipupu fyamwiulu fyonane; sombi taŵukaya kuli ŵakamufyalwa ŵaiyo, neli nikoti ŵukulu bwaiyo uŵo yalukwikalika naŵo; pakuti uwufumu bwaiyo ŵukanukulwa, ati ŵapoke ŵambi aŵataŵali niŵaŵa.
5Kaŵili imfumu yakusaufu ikalukukosa, nemfumu yaiyo imbi; nayo ikalukukosa ukwicila yo, nekulukuli neŵukulu; uŵukulu bwaiyo ŵukalukuli ŵukulu ubwakuti. 6Popele pakupela kwamyaka sikaŵambakana; lomba umwana umwanakasi wamfumu yakusaufu akesa kumfumu yakunofu mukulayana; sombi ye tekuti akekale nemakosa akuŵoko kwakwe; nayo kaŵili tekuti ikeme, neli kuŵoko kwaiyo; sombi umwanakasi ye akaposwa pamo naŵaŵo aŵamuletele nawoyo uwamufyele nawoyo uwamukosesye impindi isyo.
7Sombi kumutano wakumisyu yakwe pakema umbi pamupunda waiyo, ukafika kwiŵumba lyafita nekwinjila namuŋanda ikosele yamfumu yakunofu, nekuŵacitila nekucila pali ŵo; 8kaŵili naŵalesa ŵaŵo, pamo nefiŵumbwaŵumbwa fyaŵo ifyacela icisuŋgulucile, nefiŋkoloŋkolo fyaŵo ifiweme ifyesilifa nefyegolide, akafitapa fyonse nekufitwala kucalo caIjipiti; popele akaileka imfumu yakunofu imyaka imbi. 9Popele apo ikafika muŵufumu bwamfumu yakusaufu; sombi ikabwelela lukoso kwaŵo kucalo.
10Sombi aŵana ŵaiyo awalalume ŵakatule'ŋkondo, nekuwuŋganya iŵumba lyamakosa akulu, ilikafika nekuputa nekupita-mo; eli likabwela nekulwa ukufika nakunanda yaiyo ikosele. 11Peŋka imfumu yakusaufu ikalukukalipa, nekufuma, nekulwa nayo, enemfumu yakunofu; nayo ikatuma iŵumba ilikulu; lomba iŵumba likapelwa namuminwe yaiyo. 12Popele pakupokwa iŵumba, lomba umutima waiyo ukasuntulwa; nayo ikawisya imyanda namyanda, sombi tekuti icililile, tau. 13Pakuti imfumu yakunofu ikabwela nekutuma iŵumba ilyakucilo'bwinji napalyakutaŋga: popele ikafika pakusila kwampindi syamyaka, pamo neŵumba lyafita ilikulu nemaŵoni aenji. 14Popele pampindi isyo aŵenji ŵakaimina imfumu yakusaufu; kaŵili aŵana ŵaŵoŋgwa pakati paŵantu ŵenu ŵakalisuntula mukwikalika ukuŵoneka; sombi ŵo ŵakawa. 15Fyopele'fyo imfumu yakunofu ikesa, nekuwuŋga umupili, nekupoka umusi weliŋga ilikosele; lomba aŵamata ŵakusaufu tekuti ŵacicile, neli ŵantu ŵakwe aŵasalulwilwe, kaŵili tapakaŵa-po neli makosa akucicila. 16Sombi uyo ulukwisa mukumwimina akacita koti kufwaya kwakwe umwine, tapali-po ukemakana pamenso akwe; lomba akema pacalo caŵuleme, kaŵili muminwe yakwe mukalukuli ukonala. 17Popele akalandakanya ukwisa nemakosa aŵufumu bwakwe ŵonse, pamo newaluŋgeme kaŵili; naye akaficita; popele akamupela umwana wamwanakasi, mukumuŵifya; sombi tesi akemakane uyo-mwanakasi, neli kulukuli kuli ye. 18Pakusile'fyo akalola kunsumbu, nekupoke'sinji; sombi imfumu ikapesya ukutoŋgala kwakwe, nakaŵili ikaalula ukutoŋgala kwakwe ati kubwelele pali ye umwine. 19Popele apo akalola kumananda akosele amucalo cakwe umwine; sombi akalitutula nekuwa; tesi akaŵoneke liŵili.
20Popele pakema pamupunda wakwe uwakupanjila ifyamusoŋko monse muŵuleme bwaŵufumu; sombi pakupita insiku isice akonalwa, kukufitwa teko, neli nikuŋkondo yo.
21Kaŵili pamupunda wawoyo napo pakema umuŋgwa, utaŵapele uŵuleme bwaŵufumu; sombi akesa pampindi yaŵutende, nekuŵupoka uŵufumu kukutemasya. 22Popele kumaŵoko aŵuloŵe ŵakaputwa pamenso akwe nekukonoka; icine, pamo nemfumu yakulayana. 23Peŋka pakucitwa ukulayana nakwe, akalukutumpaika; pakuti akema nekuŵa nemakosa ili acili neŵantu aŵace. 24Pampindi yaŵutende akesila napantu apanonene pakalo; naye akacite' fyo ifi taŵacitile ŵawisi naŵawisiŵo kaŵili; akaposaila pakati pali ŵo ifyakutapa nefyakupokolola nemaŵoni; icine akalaŋguluka ifyakufundana fyakwe mukuwisya apakosele impindi imbi. 25Akaŵusya amakosa akwe nelupata lwakwe mukulwa nemfumu yakusaufu neŵumba lyafita ilikulu; popele imfumu yakusaufu ikalwa muŋkondo neŵumba lyafita ilikulu ukwakuti ilyamakosa: sombi tekuti ikeme, pakuti ŵakafundana ifyakuyalicila. 26Icine, aŵo aŵalukulya kufyakulya fyaiyo eŵakayonala; iŵumba lyafita fyaiyo nalyo likaputa; aŵenji ŵakawila pansi aŵepailwe. 27Lomba imfumu isyo syoŵilo, imitima yasiko ikafwaya ukuŵifya; ŵakalukuŵepa kwitebulu lintu limo; sombi ifyo tekuti fikasyuke, pakuti ukupela kukalukuli pampindi iyansicilwe. 28Popele akabwelela kucalo cakwaŵo nemaŵoni aenji; umutima wakwe ukakwalucila ukulayana ukuswetelele; naye akalukucita, nekubwelela nakucalo cakwaŵo.
29Pampindi iyansicilwe akabwela nekwisa kusaufu; sombi tapakaŵa-po pampindi yakupela-ko koti nipampindi yakutaŋga. 30Pakuti amato akuCitimi akamwisila; pakuti pali fyefyo akaŵa nensoni, nekubwelela munuma, nekukukalipila ukulayana ukuswetelele, nekucita-ko; icine akabwela, nekuwalaŋguluka aŵo aŵalukuleka ukulayana ukuswetelele, 31Kaŵili aŵamata ŵakalukumofwa-ko, nekupusyanya umupunda uswetelele, enanda ikosele, nekufumya umulambu wansiku syonse, nekwimika icakukoŵesya icakonala. 32Lomba aŵo aŵalukuŵifya kukulayana akaŵaŵeyeka kukutemasya; sombi aŵantu aŵakuŵesiŵa ŵaLesa ŵaŵo, ŵo ŵakalukukosa nekulukucita-ko, 33Kaŵili aŵamano paŵantu ŵakasambisya aŵenji; naŋgawa nifyefyo ŵakawa kumpoko nakumulilo nakuli ŵukaili nakukutapwainsiku isinji. 34Pakuwa ŵo, ŵakapoka ukofwa-ko kunini; sombi aŵenji ŵakekatilila kuli ŵo nekutemasya. 35Kaŵili aŵo aŵamano ŵambi ŵakawa, mukuŵawaminisya, nekuŵaswesya, nekuŵatufya, ukufika nakumpindi yakupela-ko; pakuti nipampindi iyansicilwe.
36Lomba imfumu ikacita koti kufwaya kwaiyo, nekulisuntula, nekulikusya ukucila napali ŵalesa ŵonse, nekulaŵila ifyakukaŋkamana ukuŵasalula ŵaLesa ŵaŵalesa; nayo ikasyuka ili takuŋgakonsiwa ukufitwa; pakuti ifyo ifyansicilwe fikacitwa. 37Kaŵili tekuti ikalaŋguluke ŵalesa ŵaŵawisiŵo, neli kufwaya kwaŵanakasi, neli kulaŋguluka ŵalesa ŵonse; pakuti ikalikusya ukuŵacila ŵonse. 38Sombi pamupunda wakwe ikalemya lesa wamata: kaŵili lesa utaŵaisiŵile ŵawisiŵo, yo ikamulemya kwigolide nakwisilifa nakumabwe amakweŵo apatali nakufintu ifyakutemwesya. 39Kaŵili ikalwa nemananda akosele lukoso ili ayofwa-ko lesa umwensu; aŵantu ŵonse aŵalukwisumina ikaŵakusya kuŵuleme, nekuwaleŋgesya ati ŵaŵekalike aŵenji; kaŵili ikaaŵa icalo pakuti pelambulo.
40Popele pampindi yakupela-ko imfumu yakusaufu ikalwa nayo; lomba imfumu yakunofu ikaisila koti kapupulwa, neŋgolofwana, neŵapali ŵakafwalo, nemato aenji; nayo ikenjila mufyalo, nekuputa-po nekupita. 41Kaŵili ikenjila namucalo caŵuleme, ifyalo nafyo ifinji fikawisiwa; sombi pakapulusiwa muminwe yaiyo Edomi naMoabi neŵakulu ŵaŵana ŵakwe Amono. 42Kaŵili ikatambicila pafyalo ukuŵoko kwaiyo; lomba icalo caIjipiti tekuti cipuluke, 43Sombi ikalukuli nemakosa pamaŵoni egolide nesilifa napafyamakweŵo apatali fyonse ifyakuIjipiti; kaŵili aŵaLibya neŵaEtiopia ŵakalukulonda pamakasa aiyo. 44Sombi ifyeŵo ifyakufuma kumutulesuŵa nakunofu fikaikatasya; lomba ikema neŵukali uŵukulu mukwipayala nekonala aŵenji. 45Nayo ikemika amasema ananda yaiyo iyaŵufumu pakati pacisiŵa nelupili uluswetelele ulwaŵuleme; naŋgawe'fyo ikafika kukupela-ko kwaiyo, lomba tapakalukuli uwakuyofwa-ko.
Currently Selected:
Danyeli 11: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
