Amosi 8
8
1ŴaSikulu Yawe ŵalimbwenesye'fi: lomba kuŵona nikukatundu kafisepo fyalusuŵa. 2Kumfwa ŵo ati: Amosi, ulukuŵone'ndo? Naneŵo ati: Katundu kafisepo fyalusuŵa. Popele ŵaYawe ŵalilaŵile kuli neŵo ati: Ukupela-ko kwaŵaficila aŵantu ŵanji aŵaIsilaeli; tekuti ŋkapite-po pali ŵo liŵili. 3Lomba inyimbo isyamwitempuli sikalukuli misowa ako-kasuŵa, efilukulaŵila ŵaSikulu Yawe; ifitumbi fikaŵa finji; pantu ponse ŵakafiposa ili ŵakutumene.
4Kamumfwe'fi, mwemuŋgawamina awapeŋgele, mwemuŋgawonala aŵakaŵi aŵapacalo, 5ili mulawila ati, Ukafuma lisa umwensi wamaseŋgo, ati tuŋgolisya amasaka? Akafuma lisa sabata, ati tuŋgateka tiligu? ili tucefya efa, nekukusya syekeli, nekutumpaika nefyakwesya pamasikelo ifyaŵutumpaisi; 6ati tuŋgaŵola aŵakaŵi pakupose'silifa, neŵapeŋgele pakupose'nsapato, nekuulisya ifinaŋgwa ifyakusyala-po pali tiligu. 7ŴaYawe ŵalilapile kukuwama kwakwe Yakobi, ati: Icinenene tesi ŋkaluŵa-ko ukucita kwaŵo konse lukoso! 8Kani icalo tacikatutuma pakuti pali fyefyo, naŵo ŵonse aŵalukwikala-mo kansi taŵakalila nemisowa? Icine, conse cikasuntuka koti niNika, nekuŵilaka, nekubwela liŵili koti niNika yakuIjipiti. 9Popele pakaŵa pakasuŵa ako, efilukulaŵila ŵaSikulu Yawe, ati ŋkawisya akasuŵa ili kali pakati keulu, nekufitisya icalo pakasuŵa akawaŋgele, 10Kaŵili ŋkafyalula ifitenje fyenu ati kulila, nenyimbo syenu syonse ati misowa; kaŵili ŋkafisya ifikundulu pamunda syonse, nemapala pamitwi yonse; lomba ŋkaficita koti kulila ukwakumulilila umwana uli eŋka: ukupela-ko kukalukuli koti kasuŵa akalulile.
11Ŵoneni, insiku sikesa, efilukulaŵila ŵaSikulu Yawe, lomba ŋkatuma akawumbo pacalo; akawumbo akakufwaye' fyakulya, teko; icilaka icakufwaya'menda, teko; sombi akawumbo akakufwayo'kumfwa amasiwi aŵaYawe. 12Lomba ŵakalukwenda-enda ukufuma kucisiŵa cimo ukulukuya kuli cimbi, nekufuma kunofu ukulukuya nakumutulesuŵa; kaŵili ŵakulukuŵutuka-ŵutuka mukufwaya-fwaya isiwi lyaŵaYawe, sombi ŵo ukuliŵona, ŵaŵa. 13Pakasuŵa ako ŵamoye aŵaweme newasaŋkwa ŵakalesuka pakuti pacilaka. 14Aŵo aŵalapa kukuŵifya ukwakuSamalya ati, Koti nifyefyo ifi ŵali nemweo ŵaLesa ŵoŵe, weDani; nakaŵili ati, Koti mekalilo amweo wakuBeyasyeba; aŵo kaŵili ŵakawa, tekuti ŵakaŵuke liŵili.
Currently Selected:
Amosi 8: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
