Amosi 6
6
1Akasyamo kaŵe kuli ŵaŵo aŵalukusaŋgawuka muSayoni, nakuli ŵaŵo aŵakosele palupili lwaSamalya, ifileme fyamikoka yawantu ikulu, ifyo ilukwisa kuli fyo iŋanda yakuIsilaeli! 2Kamupitila ku Kaline, muŵone; ukufumo' ko kamuya kuAmati umukulu; popele kamuselucila kuGati waŵaFilisiti. Kani ŵo walicilile uŵune napaŵufumu uŵu? Kani umupaka waŵo ulicilile uŵukulu napamupaka wenu? 3Ulu! mwemutesesyo'kutali akasuŵa kakuŵifya, nekupalamisya umupando wawuŋgwa! 4Akasyamo kaŵe kuli ŵaŵo aŵalala pamalo alwino lwansofu, nekutandaŵala pafitanda fyaŵo, nekulya aŵana ŵambelele petaŋga, nemombe pakati pacimpata; 5aŵemba inyimbo syalukoso pakulukulisya manyema; awalileŋgela ifyakulisisya-ko koti niDafidi; 6aŵanwa imfaina mumabeseni, nekulisufya kumafuta amakweŵo; sombi ŵo taŵomfwa-po insoni pakuti pakukululuka kwakwe Josefi.
7Pakuti pali fyefyo ŵakatapwa muli ŵukaili pamo naŵaŵo awakataŋga ukutapwa, peŋka ukwaŋgala kwawawo aŵalukutandaŵala kukapita. 8WaSikulu Yawe ŵalililapile, efilukulaŵila ŵaYawe, Lesa wamaŵumba: Nakanamina uŵune bwakwe Yakobi, nekufitilwa ututanino twakwe; pakuti pali fyefyo ŋkauposa umusi pamo nafyefyo fyonse ifili-mo. 9Lomba pakaŵa ati, kani pasyale aŵalalume ikumi muŋanda muntu mumo, ŵakafwa. 10Popele umukwaŵaŵo, uyo uwakumoca, pakumwimya mukufumya amafupa muŋanda, napakulaŵila ye kuli woyo uli mukati lukoso muŋanda, ati: Kani pacisyele umbi naweŵo? lomba nawoyo nekwasuka ati, Koku; eli aŋgalaŵila ati: Celele, tekuti twanuke isina lyaŵaYawe, fweŵone! 11Pakuti ŵoneni, ŵaYawe ŵalafunda, eli iŋanda ikulu iŋgapamwa nepatoŵekele, nekananda nako nekupamwa nemilala.
12Kani ŵakafwalo ŵaŋgaŵutuka pacandansi? Kani umuntu aŋgalimina'po kuŋombe? pakweŵa'ti mwaalula ukusololola kuŵe nindulwe, nefisepo fyakuluŋgama ati fiŵe muti wawululu: 13mwemusembela mucintu cafinaŋgwa, mwemulaŵila ati: Kansi fweŵo tatulilipokele amaseŋgo kumakosa esu fweŵene? 14Pakuti ŵoneni, ŋkamuŵusisyeni umusyoŵo waŵantu, mwewananda yakuIsilaeli, efilukulaŵila ŵaYawe Lesa wamaŵumba; lomba aŵo-ŵantu ŵakamukululusyeni ukufuma kukwinjilila kwakuAmati ukufika nakukanika akakumpanta.
Currently Selected:
Amosi 6: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
