Amosi 5
5
1Kamumfwa ili-isiwi ili ndukulaŵila ilyakumulilileni, mwewananda yakuIsilaeli.
2Umwana umwanakasi uswetele wakuIsilaeli aliwile; tekuti akaŵuke liŵili; aliwilile pacalo cakwe; tapali-po neli umo uwakumuŵusya. 3Pakuti ŵaSikulu Yawe ŵalukulaŵile'fi ati: Umusi, uwalukufuma-mo aŵantu imyanda ikumi, ukaŵa neŵakusyala-po umwanda umo lukoso; nawoyo nawo uwalukufuma-mo awantu umwanda umo, ukaŵa neŵakusyala-po pananda yakuIsilaeli ikumi lukoso.
4Pakuti ŵaYawe ŵalukulaŵile'fi kuwananda yakuIsilaeli ati: Mfwayafwayeni neŵo, eli mukekala nemweo; 5sombi tekufwaila kuBeteli, neli kwinjila muGiligali, neli kupitila kuBeyasyeba; pakuti icine Giligali akaya muli ŵukaili, naBeteli naye nekuŵa walukoso. 6Kamuŵafwaya-fwaya ŵaYawe, eli mukekala nemweo; weŋgesa mukwambuka koti mulilo muŋanda yakwe Josefi, lomba wo nekulya, nekuŵula-po nemuntu wakuusimya muBeteli.
7Mweŵo mwemwalula ukusololola ati nilunda, mwemuposa pansi pacalo ukuluŋgama, 8muŵafwaya-fwaye aŵo aŵaleŋga utuwaŋgawaŋga tosanu natuŵili naKesili; aŵaalula icinto camfwa ati ciŵe lucelo, nekuleŋgesya akasuŵa ati kafite koti ŵusiku; aŵeta amenda amucisiŵa, nekwetulwila pamenso pacalo. Isina lyaŵo niŵaYawe, 9aŵafisya paŵamakosa ukonala ukwakupulumucilwa, fyopele'fyo nekonalwa nekuficila iŋanda ikosele.
10Ŵalamufitilwa uyo ucenjesya mumusiko, nekumukanamina uyo ulaŵila ukuluŋgeme. 11Pakuti pali fyefyo, ifyo muŵanyanta aŵaka ŵi nekuŵapanjilo'kupela tiligu; lomba mwaliiŵeke amananda amabwe akuŵasa, sombi tekuti mukekale-mo; mwalilimbile amaŵala amifaina aweme, sombi tekuti mukanwe-po ulufaina. 12Pakuti ndiisi ubwinji bwakusilulula kwenu, neŵukulu bwafyakuŵifya fvenu, mwemupensya awaluŋgeme nekupoka isiŋkakanwa, mwemupasusya awapeŋgele mumusiko.
13Pakuti pali fyefyo uwakalaŋgo akalukwikele celele pampindi yakuŵe'fyo; pakuti nimpindi iŵipile. 14Kamufwaya-fwaya ukuwama, ukuŵifya teko, ati mukekale nemweo; fyopele'fyo ŵaYawe, Lesa wamaŵumba, ŵakalukuli nenu, koti nifyefyo ifi mwalaŵila. 15Kamufitilwa ukuŵifya, mulukutemwa ukuwama, mwikalike ukusololola pamusiko; cipale ŵaYawe, Lesa wamaŵumba, ŵakaŵa neluse kuŵakusyala-po aŵakwe Josefi. 16Pakuti pali fyefyo ŵa Yawe Lesa wamaŵumba, ŵaSikulu, ŵalukulaŵile'fi ati: Umusowa ukalukuli pamikwakwa yonse; lomba ŵakalukulaŵila pamiseŵo yonse ati, Mama e! Mama e! Peŋka ŵakaŵeta aŵalimi ati ŵalile, naŵaŵo aŵesi bwino ukusowakana ati ŵapame-mo nemisowa. 17Kaŵili monse mumaŵala amifaina mukalukuli nemisowa; pakuti ŋkapita-mo mukati muli weŵo, efilukulaŵila ŵaYawe.
18Akasyamo kaŵe kuli mweŵo, mwemulukufwaya akasuŵa kaŵaYawe! Mbanindo niŋgawela nekasuŵa kaŵaYawe? Nimfinsi, ukutuŵa teko! 19Fili koti nifyefyo ifi umuntu aŋgafyuka kuŋkalamu, lomba nabeya nekukumana nakwe; neli nifyefyo ifi aŋgenjila muŋanda nekweyamika ukuŵoko kwakwe kuciŵumba, lomba nensoka nekumusuma. 20Kansi akasuŵa kaŵaYawe takakalukuli-po kufita, ukutuŵa teko? Ekufita bwii, ukwakuwulokuwaŋgala konse?
21Ndukufitilwa nekupufya ifitenje fyenu; tekuti nsembele-mo mumaŵuŋgano enu ansoni. 22Icine, naŋgawa'ti mulukuntambicila imilambu yenu iyakoca nemilambu yawuŋga, teti njipoke; kaŵili teti njeŵe imilambu yaŵutende iyasinoneni syenu. 23Fumya-ko kuli neŵo icipupa canyimbo syoŵe; pakuti nakano'kumfwa ifyakwimba fyapaŵamanyema ŵoŵe. 24Sombi ukusololola ŋgakukuŋkuluke koti menda, nekuluŋgama koti muloŋga wamakosa.
25Kani mwalindetele neŵo ifyakwipaya nemilambu pampaŋga imyaka amakumi ane, mwewananda yakuIsilaeli? 26leine, mwalukupinta umutanda wakwe Moleci wenu naCiyunu, ifiŵumbwaŵumbwa fyenu, akawaŋgawaŋga kakwe lesa wenu, ako mwaliŵumbile. 27Pakuti pali fyefyo ŋkamufisyeni muli ŵukaili pesilya lyaDamasiko, efilukulaŵila ŵaYawe, isina lyaŵo niŵaLesa ŵamaŵumba.
Currently Selected:
Amosi 5: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
