Amosi 2
2
1ŴaYawe ŵalukulaŵile'fi, ati: Pakuti pakusilulula kwakuMoabi kutatu, ekune, tekuti ŋkaalule umulandu wakuko; pakuti aliocele amafupa amfumu yakuEdomi ati aŵe mutoto; 2sombi ŋkatuma umulilo paMoabi, lomba ukatulya ututanino twakuCilyoti; peŋka Moabi akafwa necipupa neŋgwele nekulila kwalupeŋga; 3kaŵili ŋkapinika umusololwesi pakati pali ko, nekufiipaya ifileme fyakuko fyonse pamo nakwe, efilukulaŵila ŵaYawe.
4ŴaYawe ŵalukulaŵile'fi, ati: Pakuti pakusilulula kwakuJuda kutatu, ekune, tekuti ŋkaalule umulandu wakuko; pakuti ŵalikene ifunde lyaŵaYawe, nekuŵulo'kulama amafunde aŵo, nefyakuŵepa fyaŵo nafyo nekuwaleŋgesyo'kufuluŋganya, ifyo ŵaendele ŵawisiŵo koti nifyo; 5sombi ŋkatuma umulilo paJuda; lomba ukatulya ututanino twakuJelusalemi.
6ŴaYawe ŵalukulaŵile'fi, ati: Pakuti pakusilulula kwakuIsilaeli kutatu, ekune, tekuti ŋkaalule umulandu wakuko; pakuti ŵaliŵolisye awaluŋgeme mukupoka isilifa, newapeŋgele mukupoka insapato; 7napakuti ŵalafwaisyo'kuŵona ifukutu pamutwi wamukaŵi, nekupasusya insila yawakutekanya mumutima; lomba umwalalume naŵawisi ŵoŵilo ŵaŋgenjila kumwanakasi muntu umo, mukupusyanya isina lyanji iliswetelele; 8kaŵili ŵaŋgalala pansi mufyeni fyafyonto fyonse pafyakufwala ifipokelwe ati fyakulayana; nakawili muŋanda yaŵaLesa ŵaŵo ŵaŋganwa imfaina yamilandu yaŵantu, 9Naŋgawe'fyo nalimonawile pamenso aŵo umuAmoli, uyo uŵutali bwakwe bwalipalene neŵutali bwaŵayelesi, uwakumene ukukosa nemyeloni; naŋgaŵe'fyo nalionawile ifisepo fyakwe peulu nemisyu yakwe pansi. 10Kaŵili nalimuninicileni ukumufumyeni mucalo caIjipiti, nekulukumutanjilileni imyaka amakumi ane pampanta ati muŵe necalo caŵaAmoli. 11Lomba naliŵusisye aŵapaŵana ŵenu aŵalalume ati ŵaŵe ŵakusimika, newapawasaŋkwa ŵenu ati ŵaŵe ŵaNasali. Kansi ifyo tefyo kaŵili, mweŵana ŵakwe Isilaeli? efilukulaŵila ŵaYawe. 12Sombi mweŵo mwaliŵapele aŵaNasali imfaina ati ŵanwe, nekuŵafunda aŵakusimika ati, Tekusimika! 13Ŵoneni, ŋkamusindaileni pantu penu, koti nifyefyo ifi isindaila iŋgolofwana iiswile imipo. 14Popele ukuŵutuka kukafwila-mo muwaluŵilo, naye ukosele teti akakosye Iŋkosa yakwe, newamakosa naye teti akalipulusye; 15kaŵili uyo uwikete kuŵuta tekuti akemakane; nawoyo naye uli neluŵilo lwamakasa tekuti akalipulusye; nawoyo kaŵili upapwa kuli kafwalo tekuti akalipulusye; 16nawoyo, uli nelupata pakati paŵamakosa, ye kaŵili akaŵundumuka matako lukoso pakasuŵa ako, efilukulaŵila ŵaYawe.
Currently Selected:
Amosi 2: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
