Ifyacitilwe 27

1Popele apo, ili ŵatontoŋkenye ati tukaya mubwato kucalo calialya, ŵalimuposele Paulu naŵakaili ŵambi kucilolo cafito'mwanda, icailicilwe ati ni Iulyo, icapeŵumba lyakwe Ogusito. 2Peŋka ili twainjile mubwato ubwakuAdilamuteno, ubwalukufwayo'kuya kumisi iyakumpelo yacalo caAsya, twaliimine ulwendo; naAlisitako naye, umuMakedonya uwakuTesalonike, twali nakwe. 3Ŋgamailo twalisumpile-po lukoso paSidono: naye Julyo alimucitile'ŋkumbu Paulu, nekusumina ati aye kufiŵusa fyakwe mukukatuluka. 4Pakwima-ko'ko, twaliendele mubwato apasiteme paKupilo, pakuti ifipupu fyalukuciliŋgene. 5Sombi, ili twaaŵucile icisiŵa iciŵambakene necalo caCilica necaPamfulya, twalificile kuMula, uwamucalo caLuca. 6Kopele uko, icilolo ico icafito'mwanda caliŵusanjile ubwato ubwakuAlecisandala, ubwalukuya kucalo calialya; naco calitwinjisye mopele umo. 7Popele, ili twaendele bwino bwino insiku isinji, nekufika nefyakukatasya apasiŋkamene paNido, pakuti icipupu calitukenye ukufiko'ko, twaliendele apasiteme paCilete apasiŋkamene napaSalimone. 8Peŋka twalisesesye nefyakukatasya, nekufika kumbi ukwailicilwe ati Myaŵu lweme; apepi nakoko kwali umusi waLasaya.

9Lomba, ili yapitile impindi ikulu, nelwendo nekuŵa lwakulitakata, pakuti impindi yakukano'kulya lomba kale ipitile, Paulu aliŵacenjesye, 10nekulaŵila kuli ŵo ati: Mweŵame, ndukuŵona ati ulwendo ulu lukaŵa nefyakukatasya nekupeŋgo'kwakuti, tekubwato nakufipinto fyeŋka, sombi nakumyeo yesu. 11Sombi icilolo cafito'mwanda caliumfwile ifyakwe kalama wabwato nemwine wabwato, ukucila napafintu ifyo ifyalaŵilwe kuli Paulu. 12Peŋka, pakuti icito tacali cikulu icakwikala-mo pamwela, aŵenji ŵaliŵulansyenye ati: Ŋgatufumeko kuno, tukesye ukufika kuFoinika, nekwikalo' ko pamwela: uko ekucito icakuCilete, icalolele kumutulesuwa, 13Popele, pakupupa bwino bwino icipupu icakufuma kusaufu, ŵalukweŵa ati caisa ici tulukufwaya; nekukakulula nebwato, nekusesya Cilete apepi nemutunta. 14Sombi, ili taiŋgapita impindi ikulu, caliisile ukufuma kumutunta icipupu icikali icailicilwe ati niYulokwilo. 15Popele, pakwikatwa ubwato, nekuŵulo'kwisiŵa ukulolo'ko ukwatulile icipupu, twalicilekele lukoso, lomba nekutwalwa. 16Popele, ili twaendele ukufika apasiteme pansumbu inini iyailicilwe ati niKoda, twaliisiŵile ukukakacisya kabwato, nefyakukatasya. 17Pakukasuntula, ŵalipisisye kunsi ifyakuŵukosya ubwato nekufikaka; peŋka, pakuti pakutina ati twiŋgesa-kuposwa panticili, ŵaliselwisye ifyamilimo yabwato, nekutwalwa. 18Popele, pakuti icipupu calukutukaka nekutukatasyo' kwakuti, ŋgamatio ŵalitaticile ukuposaila ifipinto mumenda; 19ŋgamasosi nekuposaila aŵene nefintu fyamilimo yabwato. 20Popele, pakuŵulo'kutula neli kasuŵa neli tuwaŋgawaŋga insiku isinji, nakaŵili pakulukutukako'kwakuti icipupu, ukucetekela kwesu konse ukwakupuluka fweŵo kwalifumine.

21Pakwikala impindi ikulu neli kulya ŵaŵa, Paulu waliimakene pakati pali ŵo, nekulaŵila ati: Mweŵame, ŋga mwalinumfwile, nekuŵulo'kwimo'lwendo ukufuma kuCilete, ŋga tamuŵele nekukatasya nekupeŋga uku. 22Ŵukumo ndukumucenjesyeni ati mwikalike imitima yenu; pakuti tapakalukuli-po ukuposa umweo pali mweŵo mwense, sombi bwato bweŋka, 23Pakuti uŵusiku ŵuno, yaliimakene pali neŵo iŋkalamba yaŵaLesa aŵo aŵa ndi waŵo, aŵa mpyunjila neŵo kaŵili, 24nekulaŵila ati: Witina Paulu, ukwelelwa weŵo ukwimakana pamenso aŵaKaisa; popele ŵona, ŵaLesa ŵalikupele ŵonse aŵo aŵo ulukwenda naŵo! 25Pakuti pali fyefyo, mweŵame, ikalikeni imitima yenu; pakuti ndukucetekela muli ŵaLesa, ati fikaŵa koti nifyopele'fyo ifi naŵulwa. 26Naŋgawe'fyo ukutwelelwa ati tukaposwe pansumbu imbi.

27Pakufika uŵusiku bwekumi nasine, ili twalukuseŵana pacisiŵa caAdilia, koti nipakati kaŵusiku, aŵoŵesi ŵalieŵele ati tulukupalamina kumutunta kumbi. 28Popele ŵaliesesye pamenda nekuŵona koti mikwamba amakumi aŵili; pantanjile panini ŵaliesesye liŵili nekuŵona koti mikwamba ikumi naisanu. 29Lomba, pakuti pakutina ati twiŋgesa-kuposwa kumutunta kumabwe, ŵalifumisye munuma ifyakwikato'bwato fine, nekupemba'kasuŵa. 30Peŋka aŵoŵesi ŵaliesesye ukufyuka mubwato, nekuselusya kabwato kanini mucisiŵa, ati tukaansike nefyakwikato'bwato kunsaŋga kuntanjile; 31sombi Paulu alilaŵile kucilolo cafito'mwanda nakufita ati: Kani aŵa tesi ŵalukwikele mubwato, tesi mukapuluke mweŵo. 32Popele ifita fyaliputwile imyando yakuli kabwato kanini ati kaye.

33Pakutatiko'kuco'ŵusiku, Paulu aliŵapapatilile ŵonse ati ŵalye, nekulaŵila ati: Kano ekasuŵa kekumi nasine akakupembela mweŵo ukulifina, nekuŵulo' kulya neli kantu. 34Pakuti pali fyefyo, ndukumupapatileni ati mulye; pakuti ifi ekuluŵuka kwenu; pakuti imisisi yenu neli umo taukonaika-po pali mweŵo mwense. 35Ili alaŵile'fyo, nekuŵula siŋkwa, aliŵatotele ŵaLesa pamenso aŵo ŵonse, nekukumala, nekutatiko'kulya. 36Elyo ŵonse ŵaikalicile imitima yaŵo, naŵo aŵene nekulukulya. 37Lomba mubwato fwense twalikumene imyanda iŵili nemakumi asanu naaŵili neŵantu ŵasanu naumo. 38Popele pakwikuta ŵalipufisye ubwato, nekuposa natiligu mucisiŵa.

39Pakuco'ŵusiku, taŵaisiŵile-po kumutunta uko; sombi ŵalibwene ikoŋko lyacisiŵa limbi lili nepakutuntucila; naŵo ŵaliipusyansyenye ati kani tuliisi ukuciŋko'bwato kulya. 40Peŋka'po ŵaliposele nefyakwikato'bwato, nekufisya mucisiŵa, nempindi iyo yopele, nekukakulula nemyando iyapafyakwalulula ubwato; naŵo ŵalipaticile nensalu yakuntanjile kucipupu, nekulukuya kumutunta. 41Sombi pakufika pamakumanino amasiŵa aŵili, ubwato bwalikateme; insaŋga yakuntanjile yaliiketwe, tekwisiŵa ukwitesya; sombi iyakunuma yalitaticile ukukonaika kumakosa amaŋkapa. 42Popele ifita fyalifundene ati ukwelelwa ukwipaya ŵakaili, ŵekasamba ŵambi, ŵafyuke. 43Sombi icilolo cafito'mwanda, pakuti pakufwayo'kumupulusya Paulu, califikenye ukufwaya kwafiko; nekuwawula ati aŵo aŵesi ukusamba ŋgawalipose mucisiŵa, nekutaŋgo'kufika kumutunta, 44neŵasyele-po, ŵambi pamatabwa, ŵambi naŵo pafintu ifyamubwato. Fyopele'fyo paliŵele ati aŵantu ŵonse ŵalipulucile, nekufika nemakosa kumutunta.

Currently Selected:

Ifyacitilwe 27: AAL59

Highlight

Copy

Compare