Ifyacitilwe 28

1Ili twapulucile, eli twaisiŵile ati insumbu iyo yaliilicilwe ati niMelita. 2Popele injikale syalitubwenesye neŋkumbu isyakamo nakamo; pakuti syalikuncile umulilo, nekutupokelela fwense, pakuti imfula yalukuloka, napakuti pampepo. 3Sombi, ili atolele umupo waŋkuni Paulu, nekusilasa pamulilo, lomba namakata alifumine-mo pakuti paciŵe, nekumwikata pakuŵoko. 4Nasyo injikale, ili syabwene icilwani cilukupela kukuŵoko kwakwe, syaliŵulansyenye ati: Cine uyu-muntu kapondo; naŋgaŵa ati apuluka kucisiŵa, Icakulunjika tacisumine ati ekale nemweo! 5Naŋgaŵe'fyo alicikuntile icilwani mumulilo, nekuŵulo'kusomenwa. 6Sombi syo syalukucetekela ati akufimba neli kupulilila ukuwila pansi ufwile. Sombi, ili syalukufipembelela ifyo impindi itali, nekuŵona ati ifiŵipile neli cimo tafiisile kuli ye, syalialulwile imitima yasiko, nekweŵa ati ve nilesa umbi.

7Lomba mumi tala yakoko emwali nemaŵala amfumu yansumbu iyo, isina lyaiyo niPopulyo; iyo yali tupokelele, nekututeŵeta nemucinsi insiku sitatu, 8Kansi ŵawisi Populyo ŵalukutendo'muŵili nekanyemba; muli ŵo Paulu aliinjile, nekutembela, nekutintila-po neminwe yakwe pali ŵo, nekuŵaŵusya. 9Popele, ili fyacitilwe'fyo, ŵambi ŵonse aŵasyele-po pansumbu aŵali nemalwele ŵaliisile nekuŵusiwa. 10Nakaŵili naŵo ŵalitucindicile neŵuleme ubwinji; popele pakwimo'lwendo fweŵo, ŵaliinjisye mubwato ifintu fyonse ifi twapeŋgele.

11Pakupita imyensi itatu, twaliimine ulwendo mubwato bwakuAlecisandala, ubwaikele pansumbu umwela, akesiŵilo kaŵuŵo niŴampundu Aŵalalume. 12Pakufika kuSulakusa, twalilinsisye kopele uko insiku sitatu. 13Ukufumo' ko twalipopolokele, nekufika nakuLeja; popele, pakupita akasuŵa kamo, icipupu icakusaufu caliŵucile; naŋgamailo twalificile kuPotyolu; 14kopele uko eko twasanjile aŵakwasu, nekukombetelwa ati tulinsye naŵo insiku sisanu nasiŵili. Fyopele'fyo twalificile nakuLoma.

15Lomba aŵakwasu aŵafumine kulya, ili ŵafyumfwile ifyesu, ŵalitucinsisye, nekufika nakuluŵansa lwakuulila-po ulwakwe Apyo, nakuŋanda Syaŵensu Sitatu. Naye Paulu, ili aŵabwene, aliŵatotele ŵaLesa, nekukosyo'mutima wakwe.

16Ili twainjile muLoma, icilolo cafito' mwanda caliposele ŵakaili kucilolo caŵakalama; sombi calimusumine Paulu ati alukwikala eŋka nemusilikani uwakumulama.

17Lomba, pakupita insiku sitatu, Paulu aliŵetile aŵakulu ŵaŵaJuda; popele, ili wawuŋgene, alilaŵile kuli ŵo ati: Mweŵakwasu, neŵo, naŋgawa ati nsinaŵacitile neli kantu aŵantu, neli kucita' kantu kukwisiŵila kwaŵawisifwe, naŋgawe'fyo, muJelusalemi ŵalimposele ŵukaili muminwe yaŵaLoma. 18Aŵo, pakunjipusisya, ŵalukufwayo'kuŋkakulu la, pakuti muli neŵo tamwali iceŵo icakunjipaila-mo. 19Sombi, ili waleŋgulwile aŵaJuda, nalikakatile ukufwaya kuli ŵaKaisa; tepakuti paceŵo cimbi icakusinina umukoka wanji, tau. 20Pakuti pali fyefyo nalimukombeteleni ati mumbone, mulaŵile naneŵo; pakuti ndikacilwe muminyololo iyi pakuti pakucetekela ukwaŵaIsilaeli. 21Naŵo ŵalilaŵile kuli ye ati: Tatwapokele-po iŋkalata isyakufuma kucalo caŵena-Juda isyakuli weŵo, koku; nakaŵili aŵakwaŵesu neli umo taŵaisile kuno mukusimika, neli kukulaŵisya wewo neli panini. 22Sombi tulukufwayo'kumfwa kuli weŵo ifyo ifi ulukulaŋguluka: pakuti ifyacikoto ici, tuliisi ati konse konse cilipatilwe.

23Popele, ili ŵalayene nakwe ifyakasuŵa, ŵaliisile kuli ye kunanda yakwe aŵenji; kuli ŵo eko aŵulisisye, nekusimika ifyaŴufumu bwaŵaLesa, ili aŵatekenesya ifyakuli ŵaYesu, mumafunde akwe Mose, namufyaŵakusimika, ulucelo ukufika nakuciŋgulo. 24Naŵo ŵambi ŵalicetekele ifintu ifyo ifyalaŵilwe; sombi ŵambi naŵo ŵalileŋgulwile. 25Pakuŵulo'kusuminansyanya, ŵalikumbulucile, pakulaŵila Paulu amasiwi aya ati:

Umupasi Uswetelele walilaŵile bwino kuli ŵawisinwe mukanwa kakwe Yisaya uwakusimika, ati:

26Koya kuŵantu aŵa, ukalaŵile ati:

Ukumfwa mukomfwa, sombi tamukomfwisya neli panini;

Kaŵili ukuŵona mukaŵona, sombi tamukabwenesya neli panini.

27Pakuti imitima yaŵantu aŵa ilikosele,

Nematwi aŵo nao alisincile,

Nemenso aŵo nao ŵaliasiŵaticile;

Ŵeŋgesa-kuŵona kumenso aŵo,

Nekumfwa nakumatwi aŵo,

Nekwisiŵa nakumitima yaŵo,

Popele nekwaluluka,

Naneŵo nekuŵaŵusya!

28Pakuti pali fyefyo, isiŵeni mweŵo, ati ukupulusya kwaŵaLesa uku kulituminwe kuŵenafyalo; aŵo ŵakumfwa. 29Popele, ili alaŵile amasiwi ayo, aŵaJuda ŵalifumine-po, nekulukupicisyo' kwakuti.

30Popele Paulu aliikele imyaka iŵili iŵuluŵulu muŋanda yakwe iyakuula umwine, nekulukuŵapokelela ŵonse aŵalukwinjila muli ye, 31nekulukuŵulisisya Uŵufumu bwaŵaLesa, nekulukusambisya ifintu ifyakuli ŵaSikulu Yesu Klistu nemutima ukosele; tapali-po neli umo uwamukenye.

Currently Selected:

Ifyacitilwe 28: AAL59

Highlight

Copy

Compare