Ifyacitilwe 26

1Peŋka Ajilipa alilaŵile kuli Paulu ati: Uliisi ukulilaŵilila. Naye Paulu walicilicile kukuŵoko kwakwe, nekulilaŵilila ati:

2Ndukulieŵa ati ndisyucile, mwemfumu Ajilipa, pakuti nakulilaŵilila pamenso enu lelo, ifyafintu ifyo fyonse ifi nsininwe kuŵaJuda; 3tanje cine pakuti mweŵo muli ŵamilaŋgwe iyamukwisiŵila namufyeŵo fyonse ifyaŵaJuda; pakuti pali fyefyo ndukumupapatileni ati munumtwe umutimanteka.

4Ukufuma kuwusaŋkwa bwanji, amekalilo amweo wanji, uwali muŵantu ŵamukoka wanji nakujelusalemi pakutaŋga, aŵaJuda ŵonse ŵaliesi; 5pakuti ŵaliisiŵile ifyakuli neŵo napakutaŋga, ŋga ŵasumino'kusimika, ati koti cikoto iciluŋgeme icakucila icakupupa kwesu, naliikele muFalisi. 6Lomba ŵukumo ndiimakene pano mukunsololwela, pakuti pakucetekela kwakulayana uko uku ŵalaile ŵaLesa kuli ŵawisifwe; 7nekulayana uko, imikoka yesu ikumi naiŵili ilukuŵapyunjila ŵaLesa nemuŋkonsya akasuŵa neŵusiku, ili icetekela ati tukafika-ko. Ifyakucetekela uko emulandu unsininwe kuŵaJuda, mwemfumu! 8Mbanindo mulukufyeŵela ati kaŋkalwa, kani ŵaLesa ŵalaŵusya'ŵafwile? 9Neŵo icine nalukulaŋguluka ati ukuŋgelelwa ukucite'fintu ifinji ifyakulileŋgulula isina lyaŵaYesu ŵakuNasaleti. 10Ifyo efi nacitile namuJelusalemi; kaŵili nalukuŵakaka aŵenji awaluŋgeme mumaka ti, ili napokele uŵukulu kuŵapapatilisi aŵakulu; lomba, pakuŵepaya, naneŵo nalukusumina. 11Nakaŵili, pakuŵacite'milandu liŵili liŵili mumasunagoge onse, nalukwesya ukuwaleŋgesya ukucoŵola; peŋka, pakuŵasilucila, naliŵakululwisye nakumisi yaŵenafyalo. 12Popele, pakulukwenda ukuya kuDamasiko neŵukulu nemafunde aŵapapatilisi aŵakulu; 13akasuŵa pakati, mwemfumu, nalibwene pansila ukutuŵa ukwafumine kwiulu, ukwakucila napakutuŵa kwakasuŵa, kwalituŵyatile naŵaŵo, aŵo nalukwenda naŵo. 14Peŋka, ili twawilile pansi fwense, naliumfwile isiwi lilukulaŵila kuli neŵo mumulaka waŵaEbeya ati: Saulu, Saulu, mbanindo ulukuŋkululusisya? Ukusaŵula iciŵambala weŵo kufyakusosala kulikatesye! 15Kumfwa neŵo ati: Mbanimweŵanani mweŵaSikulu? Naŵo ŵaSikulu ati: NineŵaYesu aŵa ulukupensya! 16Sombi ima, wimakane! pakuti pali fifi naŵoneka kuli weŵo, mukukusalulula mupyunjisi nemboni yafintu ifyo muli fyefyo emo wambona, neyafyefyo nafyo emo ŋkawoneka kuli weŵo; 17ukukupulusya kuŵantu, nakuŵenafyalo, aŵo ŋkakutuma-ko, 18mukuŵasiŵula mumenso, ati ŵakaalucile kukutuŵa ukufuma kumfinsi, nakuli ŵaLesa ukufuma kuŵukulu bwakwe Satana, ati ŵakapoke ukulekelele'fyakuŵifya neŵupyani pakati pali ŵaŵo aŵaswesiwe pakuti pakupema-mo muli neŵo. 19Pakuti pali fyefyo, mwemfumu Ajilipa, nsinaleŋgulwile-po ukuŵono'ko ukwakwiulu; 20sombi nalitulisye tanje kuŵakuDamasiko, popele nakuJelusalemi, namonse mucalo caŵena-Juda, nakuŵenafyalo naŵo, ati: Ukumwelelweni ukulapila nekwalulucila kuli ŵaLesa, ili muciteʼmilimo ielelwe ukusasa. 21Pakuti pali fyefyo, aŵaJuda ŵalinjikete mwitempuli, nekwesya ukunjipaya. 22Popele, pakuti nalipokele ukuŋgafwa-ko ukwafumine kuli ŵaLesa, ekuku njiminine ukufika nakuli lelo, ili nsimika kuŵacete nakumfumu, nekulukulaŵila fyeŋke'fyo ifi ŵalaŵile aŵakusimika naMose ati fikesa; 23ati ukuŵelelwa ŵaKlistu ukusomenwa, nakaŵili ati, pakuti pakuŵuka kwaŵafwile, ŵo nekutaŋgo'kutulisya ukutuŵa kuŵantu nakuŵenafyalo.

24Lomba, pakulilaŵilile'fyo, Fesio alilaŵile nesiwi'likulu ati: Paulu, wafunta; ukusambila koŵe ukwinji kulukukufuntisya! 25Sombi Paulu ati: Nsifuntile, mweŵaFesio, mweŵaweme; sombi ndukutulisya amasiwi acine, aŵuntunsi. 26Pakuti imfumu iliisi ifyafyefyo, nakaŵili ndukulaŵilila apaswetele kuli yo; pakuti ndiisi ati ifyo-fintu papa neli cimo icifiseme kuli yo; pakuti icintu ico tacacitilwe kumpelo, koku. 27Mwemfumu Ajilipa, mulukucetekela aŵakusimika? Ndiisi ati mulukuŵacetekela. 28Kumfwa Ajilipa alaŵila kuli Paulu ati: Nekutekenesya kunini ulukufwayo'kuŋgalula mwina-Klistu. 29Naye Paulu ati: Ndukufwaya kuli ŵaLesa ati nelikunini, neli kukulu, tamuli nimweŵo mweŋka sombi naŵo ŵonse awalukunumtwa lelo, muŵe koti ninewo; sombi ukukakwa uku koku!

30Popele yaliimine imfumu nempemba naBanice naŵaŵo aŵo ŵaikele naŵo. 31Lomba, ili ŵaile kumpelo, ŵalukuŵulana ati: Uyu-muntu taacitile-po neli kantu akelelwe imfwa neli fyakukaka. 32Naye Ajilipa alilaŵile kuli Fesio ati: Uyu-muntu, ŋga taafwaile kuli ŵaKaisa, ŋga aŋgakakululwa!

Currently Selected:

Ifyacitilwe 26: AAL59

Highlight

Copy

Compare