Ifyacitilwe 25

1Lomba Fesio, ili ainjile muŵupyani, pakupita insiku sitatu, aliile kuJelusalemi ukufuma kuKaisalia. 2Popele aŵapapatilisi aŵakulu neŵantu aŵakulu ŵaŵaJuda ŵalimuŵulile ukumusensa Paulu; nekumukombetela, 3ukulukulombe'ŋkumbu isyakumuŵifisya Paulu, ati mumwite, akese kuJelusalemi; ati ŵakamuŵelamine, mukumwipaila pansila. 4Sombi Fesio aliasucile ati: Paulu alilaminwe kuKaisalia; kaŵili naneŵo nemwine ndukuyo'ko ŵukumo. 5Naye ati: Aŵo aŵali neŵukulu pali mweŵo, ŋgaŵakaye naneŵo; popele kani ali nefisendeme uyo-muntu, ŵakamusinine.

6Ili akokwele pakati pali ŵo simbi iusiku, isitasicilile pali sisanu nasitatu neli likumi, aliile kuKaisalia; lomba ŋgamailo waliikele mucilye, nekuŵaŵula ati muleteni Paulu. 7Popele, ili aisile Paulu, aŵaJuda aŵafumine kuJelusalemi ŵalimusiŋgulucile, nekumusinina nemilandu iinji ilemene, iyo taŵaisiŵile ukulanjisya; 8naPaulu naye, pakulikanina, alilaŵile ati: Nsinaŵifisye-po neli panini kumafunde aŵaJuda neli nikwitempuli, neli nikuli ŵaKaisa!

9Sombi Fesio, pakuti pakufwayo'kutemasiwa kuŵaJuda, alimwasucile Paulu ati: Kani wasumina ukuya kuJelusalemi, nekusololwelo'ko pamenso anji ifyafintu ifi? 10Sombi Paulu ati: Ndiiminine neŵo pacilye caŵaKaisa, epo kuŋgelelwa ukusololwela. KuŵaJuda nsinaŵifisye-po neli panini; ifi namweŵo mulifiisiŵisye. 11Kani ninembifi, iyacitile icintu icelelwe imfwa, nsilukukano kufwa; sombi kani ifyo-fintu ifi ŵalukunsinina aŵa-ŵantu tafili fyacine neli cimo, tapali-po umuntu uwisi ukundoŵela kuli ŵo. Ndukufwaya kuli ŵaKaisa. 12Naye Fesio, ili aambawile neŵeŵuŋgano, aliasucile ati: Wafwaya kuli ŵaKaisa: kuli ŵaKaisa eko ukaya!

13Ili syapitile simbi insiku, Ajilipa imfumu naBanice ŵalificile kuKaisalia, nekumusekela Fesio. 14Popele pakuti ŵaliikele kopele uko insiku isinji, Fesio aliletele umulandu wakwe Paulu kumfumu, nekulaŵila ati:

Epwali umbi umuntu uyu asile Felisi muli ŵukaili. 15Uyo, ili nali kuJelusalemi, aŵapapatilisi aŵakulu neŵakulu ŵaŵaJuda ŵalimbulile ifyakwe, nekulomba ifyakumusinina. 16Aŵo naliŵaasucile ati: Takuli kwisiŵila kwaŵaLoma ukumuposo'muntu neli umo, ili tawaŋgesa pamenso akwe aŵakumusinina, naye umwine nekuŵona indaŵililo iyakulikanina-mo ifyaceŵo ico ici ŵamusinina. 17Pakuti pali fyefyo, ili ŵaŵuŋgene kuno, nsinakokwele, sombi ŋgamailo naliikele pacilye, nekuŵaŵula ati muleteni umuntu uyo. 18Lomba, ili ŵaimakene aŵakumusinina, taŵalaŵile-po umulandu uwafiŵipile'fyo ifi nalukulaŋguluka; 19sombi ŵali nefyeŵo fimbi ifyakumusinina ifyakupupa kwaŵo, nefyakumuntu umbi, Yesu, uwafwile, uyo Paulu ewasimicile ati mumi. 20Popele neŵo, pakukaŋkamikwa ati mbasyani nakwipusisya ifyafintu ifi, nalimwipwisye ati: Kansi ukasumina ukuya kuJelusalemi, nekusololola kopele uko ifyafyeŵo ifi? 21Sombi, ili alaŵile Paulu ati ŋgandaminwe pakusololola kwaŵaOgusito, naliŵaŵulile ati ŋgaalamwe, ili nsiŋgamutuma kuli ŵaKaisa.

22Popele Ajilipa alilaŵile kuli Fesio ati: Naneŵo niŋgafwayo'kumumfwa umuntu uyo nemwine. Kumfwa ati: Mailo mukamumfwa.

23Ŋgamailo, ili aisile Ajilipa pamo naBanice nekutaŋgala ukwakuti, nekwinjila mwilaŵililo, pamo nefilolo ifikulu neŵantu aŵakulu aŵamumusi, lomba ŵalimwinjisye Paulu, pakumfwa ukuŵula kwakwe Fesio. 24Popele Fesio alilaŵile ati:

Mwemfumu Ajilipa, namweŵo mwense mweŵantu muli nafweŵo pano, mwamuŵona uyu-muntu, uyu ŵaletele kuli neŵo aŵaJuda iŵumba lyonse umulandu wakwe, nakuJelusalemi nakukuno konse, nekuŵilicisya ati: Telelwe ukulukwikele nemweo! 25Sombi neŵo nali bwene ati taacitile-po neli kantu akelelwe imfwa. Popele, pakuti ye umwine alifwaile kuli ŵaOgusito, nalitontoŋkenye ati ŋkamutuma. 26Sombi ifyakuli woyo-muntu nsikwete icacine neli cimo icakuŵalembela ŵasikulu ŵanji. Pakuti pali fyefyo, namufumisya ukumuleta pamenso enu, tanje cine pamenso enu, mwemfumu Ajilipa, ati, pakusilo'kumwipusisya, imbe neceŵo icakulemba. 27Pakuti nalandakanya ati tafyelelwe ukumutuma kaili, nekuŵulo'kuŵulisisya ifyamilandu iyakuli ye.

Currently Selected:

Ifyacitilwe 25: AAL59

Highlight

Copy

Compare