1 Aŵakolinto 9

1Kansi nsilikakulucile? Kansi nsili nintanjisi? Kansi nsinalibwene ŵaYesu ŵaSikulu ŵesu? Mweŵo kansi tamuli milimo yanji iyamuli ŵaSikulu? 2Kani nsili nintanjisi kuli ŵambi, naŋgaŵe'fyo kuli mweŵo ninentanjisi icine; pakuti muli ŵaSikulu mweŵo emwekesiŵilo kaŵuntanjisi bwanji. 3Ifyo kulunjika kwanji kuli ŵaŵo awalukuŋgesya.

4Kani cine ati tatukwete uŵukulu bwakulya nekunwa? 5Kani cine ati tatukwete uŵukulu ubwakupinta umukasi uwakucetekela, koti nifyopele'fyo nentanjisi simbi syonse neŵakwaŵo ŵaSikulu naKefasi? 6Neŵo naBanaba kani fweŵo fweŋka tatukwete uŵukulu bwakuleko'kulukucite'milimo?

7Mbaninani ucite'milimo yafita nekulilambula umwine? Mbaninani ulimbe'ŵala lyamifaina nekuwulo'kulya-po ifisepo ifyamomo? Mbaninani uwembele'taŋga lyanama, nekuŵulo'kulya-po ifyamandili akwitaŋga? 8Kani ndukulaŵilile'fyo-fintu koti ŵuntunsi? Kani taalalaŵila fyopele'fyo nemafunde? 9Pakuti mumafunde akwe Mose mulilembelwe ati: Tekukake'ŋombe pakanwa, ili inyanta'masaka. Kani niŋombe isi ŵalama ŵaLesa? 10Kani ŵalukulaŵilile'fyo peŋka pakuti pali fweŵo? Nipakuti pali fweŵo mwalilembelwe; ati ukumwelelwa uyo ulima ukulima ili acetekela, nawoyo naye upuma'masaka ukwelelwa ye ukupuma ili acetekela ati ŋkapoka. 11Kani fweŵo twaliŵyele kuli mweŵo ifyaMupasi, kani ifi fikulu ati tulukuteŵule'fyenu ifyakumunefu? 12Kani ŵambi ŵalukwaŵano'ŵukulu uŵu ubwapali mweŵo, kansi fweŵo tatulaaŵana tanje cine? Naŋgaŵe'fyo tatwacitisye neŵukulu uŵo; sombi ifintu fyonse tulasumina, twiŋgacicila neli pamo leeŵo leiweme icaŵaKlistu.

13Kansi tamwisi ati aŵo aŵalukupyuŋga ifyafintu ifiswetelele, ŵalalya ifyafintu ifyamwitempuli; naŵaŵo aŵapembelela kuconto, ŵalapoka ifyapaconto? 14Fyopele'fyo ŵaSikulu ŵalilaile ati aŵo aŵatulisya Iceŵo leiweme ŋgaŵalukwikala nemyeo kuCeŵo leiweme. 15Sombi neŵo nsiŋgacitisya nefintu ifyo fyonse neli cimo; kaŵili nsilukufilembele'fyo-fintu ati fikacitwe kuli neŵo, tau; pakuti filiŋgwamine neŵo tanje cine ukufwa, ukucila napakuŋgalwila kwalukoso ukutota kwanji umbi umuntu.

16Pakuti naŋkatulisya Iceŵo leiweme, nsikwete icakulitotela-po; pakuti umulandu ulilemene pali neŵo; pakuti ŋga nsilukutulisya Iceŵo leiweme, ŋga ndukusyamo'kwakuti, 17Pakuti kani ndukuficite'fyo koti mutima wanji nemwine, ndi nekulambulwa; sombi kani takuli koti mutima wanji, lomba ŵansisya ŵucilolo. 18Mbasyani lomba ukulambulwa kwanji? Ati, pakutulisya Iceŵo leiweme, ndukucicita ukwakuŵulo' kulambulwa, niiŋgacita neŵukulu bwanji ubwamuCeŵo leiweme. 19Pakuti, naŋgaŵa ati nsinakacilwe kuŵantu ŵonse neli umo, nalilitekele kuli ŵo ŵonse, ati ŋkawe neŵenji aŵakucila. 20Popele kuŵaJuda naliŵele koti muJuda, ati ŋkaŵe neŵaJuda; kuli ŵaŵo aŵakomekelwe kumafunde naliŵele koti ukomekelwe kumafunde, nensikomekelwe kumafunde, ati ŋkawe naŵaŵo aŵakomekelwe kumafunde; 21kuli ŵaŵo aŵakuŵula'mafunde, naliŵele koti wakuŵula'mafunde, nensiŵulile amafunde akuli ŵaLesa, neŋkomekelwe kumafunde aŵaKlistu, ati ŋkaŵe naŵaŵo aŵakuŵula' mafunde. 22Kuŵanacile naliŵele unacile ati ŋkaŵe neŵanacile. Kuŵantu ŵonse ndiŵele fintu fyonse, ati pafintu fyonse ŋkapulusye ŵambi. 23Kaŵili ndukucite'fintu fyonse pakuti paCeŵo leiweme, ati ŋkaawane naŵambi ifyaciko.

24Kansi tamwisi ati aŵo aŵaŵutuka ukwakwesyo'luŵilo, ŵalaŵutuka ŵonse, sombi umo eŋka euŋgapoko'kulambulwa? Fyopele'fyo ŋgamuwutuke, ati mukapoke. 25Lomba aŵantu ŵonse uwesya ifyamakosa alalikanya ifyafintu fyonse. Naŵo lomba ŵalalikanya ati ŵakapoke umuntinya uwisi ukuŵola, sombi fweŵo ati tukapoke utawisi ukuŵola. 26Neŵo lomba ndaŵutuka, sombi koti wakuŵulo'kwisiŵa, teko; ndalwa, sombi koti ulukupama kaŵesya, teko; 27sombi ndalipumawila umuŵili wanji, nekuukomeka; ati neŵo, pakutulisya kuŵantu ŵambi, niiŋgesa-kukanwa nemwine.

Currently Selected:

1 Aŵakolinto 9: AAL59

Highlight

Copy

Compare