1 Aŵakolinto 10

1Pakuti, mweŵakwasu, nsilukufwaya ati muŵule ukwisiŵa ati ŵawisifwe ŵonse ŵalisesemucilwe kwikumbi, nekupita ŵonse mucisiŵa; 2nekuŵatisiwa ŵonse mwikumbi namucisiŵa ukuŵa ŵakwe Mose; 3nekulukulya ŵonse ifyakulya fyopele ifyakuMupasi; 4nekulukunwa ŵonse ifyakunwa fyopele ifyakuMupasi; pakuti ŵalinwine ifyakucibwe icakuMupasi, icaŵalondele; lomba icibwe'co cali niŵaKlistu. 5Sombi aŵo aŵenji aŵakucila ŵaLesa taŵaŵatotele, pakuti ŵalionawilwe mumpaŋga lukoso. 6Popele ifintu ifyo fyaliŵele twisiŵilo twesu, twiŋgesa-kuwa ŵakukumbwe'fiŵipile, koti nifyopele'fyo ifi ŵakumbilwe naŵaŵo. 7Kaŵili mweŵo tekuŵa ŵakupupe'fiŵumbwaŵumbwa, koti nifyopele'fyo ifi ŵaŵele aŵo ŵambi, koku; koti nifyefyo ifilembelwe ati: Aŵantu ŵaliikele mukulukulya nekulukunwa, nekwima mukusyana. 8Nakaŵili tekucito'ŵucencemesi fweŵo, koti nifyopele'fyo ifi ŵacitile ŵambi, nekufwa pakasuŵa kamo aŵantu amasausande amakumi aŵili naatatu, koku. 9Nakaŵili fweŵo tekuŵesya ŵaSikulu, koti nifyopele'fyo ifi ŵaesesye ŵambi, nekufwa kunsoka, tau. 10Nakaŵili tekuliŋwiŋwisya mweŵo, koti nifyopele'fyo ifi ŵalinwinwisisye ŵambi nekufwa kuwakonala. 11Lomba ifintu ifyo fyonse fyaliciticilwe kuli ŵo koti twisiŵilo; kaŵili fyalilembelwe mukutucenjesya fweŵo, fwekwisile-po ukupela kwampindi. 12Pakuti pali fyefyo uyo ulukulaŋguluka ati ndiimakene, ŋgaacenjele eŋgawa!

13Ifyakwesya tafiŋgamwikateni, ifi taŵesi aŵantunsi ukupinta; sombi ŵaLesa ŵalitekenye; taŵakasumina ati mukesiwe ukucila napamakosa enu; sombi pamo necakwesya ŵakaleŋga nemwakupulucila, ati mukesiŵe ukucipinta.

14Pakuti pali fyefyo, mweŵantemenwe, ŵutukeni ukupuluka kukupupe'fiŵumbwaŵumbwa. 15Ndukulaŵila koti nikuŵamano; kamweŵa mweŵo ifi ndukulaŵila. 16Iŋkomeci iyakucindama, iyi tucindika, kansi taili yakwaŵanako fweŵo imilopa yaŵaKlistu? Siŋkwa uyu tukumuna, kansi tauli wakwaŵana fweŵo umuŵili waŵaKlistu? 17Pakuti fweŵo, fweŵenji, tuli nisiŋkwa umo, muŵili umo; pakuti fwense tulaaŵana siŋkwa uyo umo. 18Ŵoneni Isilaeli uwakumunefu: aŵo aŵalya ifyamilambu kansi taŵalaaŵana paconto? 19Ndukulaŵile'ndo lomba? Kani ati umulambu uwakufiŵumbwaŵumbwa wacine, kani ati iciŵumbwaŵumbwa cacine? 20Sombi ndukulaŵila ati ifintu ifyo, ifi ŵepaya aŵenafyalo ati milambu, ŵalafiipaila ifiŵanda, ukuŵepaila ŵaLesa, ŵaŵa; popele nsilukufwaya ati mukaŵe ŵakwaŵana nefiŵanda. 21Tamwisi ukunwa kuŋkomeci yaŵaSikulu nakuŋkomeci yafiŵanda. Tamwisi ukwaŵana petebulu lyaŵaSikulu napetebulu lyafiŵanda. 22Kani tulukuŵaleŋgeta ŵaSikulu uŵukwa? Kani tuli nemakosa akucila pali ŵo?

23Ifintu fyonse filisumininwe, sombi fimbi tafyelelwe, fyefi. Ifintu fyonse filisumininwe, sombi fimbi tafiiŵaka-po, fyefi. 24Aŵantu ŵonse tekulifwaile'fiweme neli umo, sombi ŋgaamufwatie umuŵyakwe. 25Ifintu fyonse ifi ŵalukuulisya apakuulila ifinani, mulye; tekwipusya pakuti pafyakulitutula muli cimaŋga; 26pakuti icalo caŵaSikulu, nafyo fyonse ifili-mo fyaŵo. 27Kani umbi utaacetekela kuli ŵaKlistu amwitileni, namweŵo nekufwayo'kuya; fyonse ifi ŵamutekeleni, mukalye; tekwipusya pakuti pali cimaŋga. 28Sombi kani umbi umuntu akalaŵile kuli mweŵo ati: Ici mulambu uwakwipaya! tekulya-po, pakuti pali woyo uwacifisulwile, napakuti pali cimaŋga. 29Ndukulaŵila ati cimaŋgo'yo tewoŵe, sombi wawoyo umbi; pakuti ubwana-bwaŵene bwanji mbanindo ŵulukwebwa kuli cimaŋga wamuntu umbi? 30Kani ndukwaŵana nekutota, mbanindo niŋgatoŋgalwa pakuti pali fyefyo ifi ndukutotela? 31Pakuti pali fyefyo kani mulukulya, kani mulukunwa, kani mulukucita fimbi, ŋgamulukucita fyonse mukuŵapela ŵaLesa uŵuleme. 32Muŵe ŵakuŵulo'kututwisya'ŵaJuda neli ŵaEla neli likelesya lyaŵaLesa; 33koti nifyopele'fyo ifi mbatemwesya naneŵo aŵantu ŵonse mufintu fyonse, apakuŵulo'kufifwaya ifyelelwe neŵo nemwine, sombi ukufifwaye'fyelelwe aŵo aŵenji, ati ŵakapuluke.

Currently Selected:

1 Aŵakolinto 10: AAL59

Highlight

Copy

Compare