1 Aŵakolinto 8

1Lomba ifyafintu ifiipailwe milambu iyakufiŵumbwaŵumbwa, tuliisi ati fwense tuli nekwisiŵa. Ukwisiŵa kulaleŋgelo'kulitota, sombi uŵutemwe ŵuleŵaka. 2Kani umuntu alukulaŋguluka ati ndiisi fimbi, uyo taaŋgesiwa neli kantu ukumwelelwo'kwisiŵa; 3sombi kani umuntu alukutemwa ŵaLesa, uyo aliisiŵilwe kuli ŵo.

4Lomba ifyakulye'fintu ifiipailwe milambu iyakufiŵumbwaŵumbwa, tuliisi ati ifiŵumbwaŵumbwa fyonse neli cimo taciikele icine mucalo capansi; nakaŵili ati tapali-po Lesa umbi, epwali umo eŋka. 5Pakuti naŋgawa ati eko ŵali aŵelicilwe ati niŵalesa, kani nikwiulu, kani nimucalo capansi-icine eko ŵali aŵakuŵe'fyo ŵalesa aŵenji naŵasikulu aŵenji— 6naŋgaŵe'fyo kuli fweŵo eko ŵali ŵaLesa ŵamo ŵeŋka, ŵa Wisifwe, kuli ŵo eko fyafumine ifintu fyonse, pakuti pali ŵo epo twikele nafweŵo; naŵaSikulu ŵamo ŵeŋka, eŵa Yesu Klistu, muli ŵo emo fili ifintu fyonse, nafweŵo muli ŵo emo tuli, 7Sombi amano ayo taali muŵantu ŵonse, tau: sombi ŵambi, pakuti pakuciisiŵa iciŵumbwaŵumbwa ukufika nakuli ŵuŵuno-ŵukumo, ŵalafilya koti fyamilambu iyakuciŵumbwaŵumbwa; peŋka cimaŋga waŵo, pakuti pakunaka, alaŵipa. 8Sombi ifyakulya tesi fikatofwe-ko pamenso aŵaLesa. Kani tatulya-po, tatupeŋga-po; kaŵili kani tulalya-po, tatuŵila-po. 9Sombi cenjeleni bwiŋgesa-kuwa cipale cakuŵatutula aŵanacile uŵukulu bwenu uŵu. 10Pakuti kani umbi akuŵone, weuli nekwisiŵa, ulukusamina ukulukulya mumulenda waciŵumbwaŵumbwa; kansi cimaŋga wawoyo unacile, taukeŵakwa ukukosa ati akalye ifintu ifiipailwe milambu iyakufiŵumbwaŵumbwa? 11Popele, pakuti pakwisiŵa koŵe, uyo unacile alaluŵilila, umukwasu uyu ŵafwile ŵaKlistu. 12Fyopele'fyo, pakuŵifya kuŵakwasu, nekulasa wacimaŋga ŵaŵo aŵanacile, nikuli ŵaKlistu eko muŵifya. 13Pakuti pali fyefyo, kani ifinani filatutula umukwasu, tesi ŋkalye-po umunefu ukufika nakukusila kwampindi, niiŋgesa-kututula umukwasu.

Currently Selected:

1 Aŵakolinto 8: AAL59

Highlight

Copy

Compare