1 Aŵakolinto 7

1Popele ifyafyefyo ifi mwandembele. Fiweme ati umuntu aŵule ukupoko' mwanakasi. 2Sombi, pakuti paŵucencemesi, aŵalalume ŵonse umo umo ŋgaawe nemukasi wakwe, neŵanakasi ŵonse naŵo umo umo ŋgaawe nemulume wakwe. 3Umulume ŋgaamupele umukasi wakwe ifyelelwe; nemukasi naye fyopele'fyo ŋgaamupele umulume. 4Umukasi taakwete-makosa pamuŵili wakwe umwine, sombi mulume euli nemakosa pamuŵili wamukasi wakwe; fyopele'fyo kaŵili umulume taakwete-makosa pamuŵili wakwe umwine, sombi mukasi euli nemakosa pamuŵili wamulume wakwe. 5Tekukanyansyanya apakuŵulo'kusuminansyanya impindi, ukutembela bwino nemuŋkonsya: popele nekukumaŋkana liŵili, eŋgesa Satana kumwesyeni pakuti pakukumbwa kwenu. 6Sombi ndukulaŵile'fyo ukumusumineni, nsilukumupanjileni, koku. 7Sombi aŵantu ŵonse ŋga ŵali fyopele' fyo ifi ndi, ŋga natemwa. Naŋgawe'fyo aŵantu ŵonse' ŵalipokele kuli ŵaLesa impese syaluse isyaŵo aŵene, umbi yakuŵe'fi, umbi naye yakuŵe'fyo.

8Sombi ndukulaŵila kuŵasice nakuli ŵamukamfwilwe, ati: Filiweme ŋgaŵekale koti nifyopele'fyo ifi ndi. 9Sombi kani ŵalukukumbwa, ŋgawopwe: pakuti filiweme ukuupwa ukucila napakufwata. 10Sombi ŵamukakuupwa ndukuŵafunda, teneŵo sombi niŵaSikulu aŵaŋgafunda, ati: Umukasi tekulekana nemulume wakwe; 11sombi kani alekane nakwe, ŋgaekale uŵusice, neli ŋgaalamwinwe ukubwelela kumulume wakwe; nakaŵili ati: Umulume tekukano'mukasi wakwe.

12Sombi kuli ŵambi naŵo ndukulaŵila, neŵo, teŵaSikulu koku, ati: Kani umukwasu umbi ali nemukasi utaacetekela muli ŵaKlistu, sombi ulukusumino' kwikala nakwe, emukana. 13Kaŵili kani umwanakasi ali nemulume utaacetekela muli ŵaKlistu, sombi ulukusumino'kwikala nakwe, elekana nemulume wakwe. 14Pakuti umulume utaacetekela alaswesiwa mumukasi wakwe; nemukasi naye utaacetekela alaswesiwa mumukwasu uyo umuupile; pakuti ŋga tafili Jfyo, neŵana ŵenu ŋga taŵaswetele; sombi ŵukumo ŵaliswetolele. 15Sombi kani uyo utaacetekela alukufwaya ati tulekane, ŋgaŵalekane; umukwasu neli niŋkasi yesu taikacilwe pafyeŵo ifyakuŵe'fyo; sombi ŵaLesa ŵalitwitile ati tulukwikele neŵutende. 16Pakuti uliisi syani, wemwanakasi, kani wakupulusya umulume woŵe? Neli uliisi syani, wemwalalume, kani wakupulusya umukasi woŵe?

17Sombi koti nifyopele'fyo ifi ŵaŵaaŵenye ŵaSikulu aŵantu ŵonse, nekuŵeta ŵonse ŵaLesa, fyopele'fyo ŋgawalukwenda ŵonse. Ifyo fyopele efi ndukufunda kuŵantu aŵamumakelesya onse. 18Kani umbi ali wakopwelwe pakwitwa, esimaŋganya ukukopolwa kwakwe! Kani umbi taakopwelwe pakwitwa, ekopolwa! 19Ukukopolwa kwalukoso; ukuŵulo'kukopolwa nako kwalukoso; sombi kulama'mafunde aŵaLesa ekwacine. 20Aŵantu ŵonse ŋgawalukwikala mukwitwo'ko uku ŵaitilwe. 21Kani weŵo wali nikalume pakwitwa, tekuwamba mumutima pakuti pali fyefyo. Sombi kani ukesiŵo'kukakuluka, tanje ucicite. 22Pakuti uyo-kalume uwaitilwe muli ŵaSikulu aliŵele mwanawaŵene waŵaSikulu: fyopele'fyo kaŵili uyo-mwana-waŵene uwaitilwe aliŵele nikalume waŵaKlistu. 23Mwaliulilwe umuulo; tekuŵa nimweŵakalume ŵaŵantu. 24Mweŵakwasu, aŵantu ŵonse umo umu ŵaitilwe, mopele umo ŋgawekale naŵaLesa.

25Sombi ifyaŵanakasi aŵasice aŵatawaŋgalala neŵalalume ŵonse, ifunde ilyakufuma kuli ŵaSikulu nsikwete; sombi ndukumuŵuleni ukulaŋguluka kwanji, nenapokele iŋkumbu kuli ŵaSikulu mukwikala wakucetekelwa. 26Ndukulaŋguluka lomba pakuti pakupeŋga ukuli apepi ati ifiweme umuntu ukwikala fyopele'fyo ifi ali. 27Kani ulikacilwe kumukasi, tekufwayo'kukakuluka. Kani tokacilwe kumukasi, tekufwayo'mukasi. 28Sombi naŋgawa ati uupe, tawaŵifisye; kaŵili naŋgaŵa ati umwanakasi umusice opwe, taaŵifisye. Sombi aŵakuŵe'fyo ŵakaŵa nefyakukatasya ifyakumunefu; sombi neŵo ati mupulusyeni. 29Sombi ifi ndukulaŵila, mweŵakwasu, ati impindi yacepa; ati naŵaŵo aŵali neŵakasi ŵaŵo ŵaŵe koti ŵakuŵula'ŵakasi; 30naŵaŵo naŵo aŵalukulila koti ŵakuŵulo'kulila; naŵaŵo awalukusaŋgalala koti wakuwulo'kusaŋgalala: naŵaŵo aŵalukuula-ula koti ŵakuŵula'maŵoni; 31naŵaŵo naŵo aŵalukucita-po necalo capansi, koti ŵakuŵulo'kwambala naco; pakuti amekalilo acalo cino alukupitilila. 32Sombi ndukufwaya ati mulukwikala ŵakuŵulo'kuŵamba mumitima. Umusice alalaŋguluke'fintu fyaŵaSikulu, ifi aŋgesiŵo'kuŵatemwesya ŵaSikulu: 33sombi uyo uupile alalaŋguluke'fintu ifyamucalo capansi, ifi aŋgesiwo'kumutemwesyo'mukasi wakwe. 34Neŵanakasi naŵo ŵalilekene, ŵamukakuupwa neŵasice. Uyo-mwanakasi umusice alalaŋguluke'fintu fyaŵaSikulu ati ekale uswetelele mumuŵili namumupasi; sombi uyo-mukakuupwa alalaŋguluke'finto ifyamucalo capansi, ifi aŋgesiwo'kumutemwesyo'mulume wakwe. 35Kaŵili ndukulaŵile'fyo mukumofweni-ko mweŵene; nsilukufilaŵila mukumuteyeleni umwando, sombi ati mukelelwe, mukaŵapembelele ŵaSikulu, mweŵakuŵulo'kuŵamba mumitima ifyafyeŵo fimbi.

36Sombi kani umuntu umbi alukulaŋguluka ati nsilukumucitila bwino umwana wanji umwanakasi umusice; kani alikulile kale uyo-mwana, necewo kani eko cili, ŋgaacite umuntu uyo koti kufwaya kwakwe; taalukuŵifya-po; ŋgaopwe kuciŵusa cakwe. 37Sombi uyo ukosele mumutima wakwe, utaakwete iceŵo icakumupanjila, sombi uli neŵukulu pakufwaya kwakwe umwine, nekulandakanye'fi mumutima wakwe, ati alame umwana wakwe umusice, uyoye alukucita bwino. 38Popele uyo umuufya umwana wakwe umusice alukucita bwino, nawoyo naye utaamuufya akacita bwino ukucila. 39Umukasi alikacilwe ili alukwikala nemweo umulume wakwe. Sombi kani umulume alifwile, umukasi alikakulucile, aliisi ukuupwa kuli woyo wopele uyu alukufwaya; sombi nimuli ŵaSikulu mweŋka, 40Sombi alukusyuka ukwakucila, kani alukwikala fyopele'fyo ifi ali; ifyo ndukulaŋguluka neŵo: kaŵili ndukulaŋguluka ati naneŵo ndi neMupasi waŵaLesa.

Currently Selected:

1 Aŵakolinto 7: AAL59

Highlight

Copy

Compare