1 Aŵakolinto 6

1Pali mweŵo, kani umbi ali neceŵo pamuŵyakwe, ali nemutima uwakutwalo'mulandu kwisolololo kuŵasendeme, nekuŵulo'kutwala kuwaluŋgeme ŵaŵaLesa? 2Kani tamwisi ati aŵaluŋgeme eŵakasololola imilandu yaŵantunsi ŵonse? Popele kani imilandu yaŵantunsi ŵonse ikasolololwa kuli mweŵo, kansi tamulielelwe ukusololole'fyeŵo ificepele lukoso? 3Kansi tamwisi ati tukasololola neŋkalamba syakwiulu? Tanje cine lomba tuŋgasololola ifyeŵo ifyakumweo uno! 4Popele kani muŋgelelwa mweŵo ukusololola ifyeŵo ifyakumweo uno, kansi muŋgawekalika ŵakusololola aŵo aŵapufiwe mwikelesya? 5Ndukulaŵile'fyo ati muleŋgeleni insoni. Kani fyacine ati pali mweŵo tapali uwamano neli umo, uwakwisiŵa ukusololola nemukwaŵo; 6sombi umuntu alatwalo' mukwaŵo kwisolololo, ifyo nakuŵantu nako aŵakuŵulo'kucetekela muli ŵaKlistu? 7Cine kale cakupelela lukoso muli mweŵo, ati mulapindansyanya imilandu. Mbanindo tanje cine tekusumino'kuŵipa? Mbanindo tekwiŵilwa tanje cine? 8Sombi mweŵo mweŵene mulaŵifya, nekwiŵa, ifyo nakuŵakwaŵenu nako.

9Kani tamwisi ati aŵasendeme taŵakapyana Uŵufumu bwaŵaLesa? Tekutumpaikwa: neli ŵacencemesi, neli ŵakupupe'fiŵumbwaŵumbwa, neli ŵaŵucende, neli ŵakuliŵifya, neli ŵalalume aŵakuŵifyansyanya neŵalalume aŵaŵyaŵo, 10neli niŵasilumfundi, neli ŵakulukuli neluŋkumbwa, neli ŵakupendwa, neli wakutoŋgala, neli ŵakukakatisya ukwakwiŵa, ŵonse aŵo taŵakapyano'Ŵufumu bwaŵaLesa. 11Lomba mweŵo mweŵambi mwali ŵakuŵe' fyo; sombi mwalifisamfisye-ko, sombi mwaliswesesiwe, sombi mwalilunjicilwe mwisina lyaŵaSikulu Yesu Klistu, namuMupasi waŵaLesa ŵesu.

12Ifintu fyonse filisumininwe kuli neŵo; sombi fimbi tafyelelwe, fyefi. Ifintu fyonse filisumininwe kuli neŵo; sombi nsikasumina ukukomekwa kuli cimbi neli cimo. 13Ifyakulya cifulu, icifulu naco fyakulya; sombi ŵaLesa ŵakacalula calukoso, nefyakulya nafyo ŵakafyalula fyalukoso. Sombi umuŵili tawikala-po pakuti paŵucencemesi, sombi nipakuti pali ŵaSikulu epo wikala; kaŵili ŵaSikulu ŵalekala pakuti pamuŵili. 14Nakaŵili ŵaLesa ŵaliŵaŵusisye ŵaSikulu; popele ŵakatuŵusya nafweŵo kumakosa aŵo. 15Kansi tamwisi ati imiŵili yenu filewa ifyamuŵili waŵaKlistu? Kani mpokolole lomba ifilewa ifyamuŵili waŵaKlistu, mfyalule filewa ifyamuŵili wamwanakasi umucencemesi? Ifyo tefyo! 16Kani tamwisi ati uyo ulundene nemwanakasi umucencemesi aliŵele muŵili umo nakwe? Pakuti ŵaLesa ŵalilaŵile ati: Ŵoŵilo ŵakaŵa munefu umo. 17Sombi uyo ulundene naŵaSikulu aliŵele mupasi umo. 18Kamuŵutuka ukupuluka kuŵucencemesi. Ukuŵifya konse uku acito'muntu kuli pesonde lyamuŵili; sombi uyo ucito'ŵucencemesi alaŵifisya umuŵili wakwe umwine. 19Kani tamwisi ati umuŵili wenu litempuli lyaMupasi Uswetelele uli muli mweŵo, uyu muli nawo ukufuma kuli ŵaLesa? Tamuli ŵana-ŵaŵene. 20Pakuti mwaliulilwe umuulo; kamulemya ŵaLesa lomba mumiŵili yenu, namumupasi wenu, uli waŵaLesa.

Currently Selected:

1 Aŵakolinto 6: AAL59

Highlight

Copy

Compare