1 Aŵakolinto 5

1Palitulicile icine ati muli mweŵo muli uŵucencemesi; icine uŵucencemesi ubwamekalilo ataali muŵenafyalo, ati umbi aliupile umukasi waŵawisi. 2Namweŵo mulalitota; tamwaŵombomene tanje cine, ati ŋgaafumiwe muli mweŵo uyo uwacitile'co. 3Pakuti neŵo, lomba tau-ko umuŵili, sombi umupasi euli-ko, namusinina'kale uyo uwacitile'co filya, koti kweŵa ati nali-ko. 4Naeŵa, mwisina lyaŵaSikulu ŵesu Yesu, ati, pakuŵuŋgana mweŵo nemupasi wanji pamo nemakosa aŵaSikulu ŵesu Yesu, 5ŋkamuposa uwakuŵe'fyo kuli Satana, mukonalo'munefu, ati umupasi ukapuluke pakasuŵa kaŵaSikulu.

6Ukulilemya kwenu takuweme-po, Kansi tamwisi ati umusuŋga unini ulaŵisya siŋkwa wonse? 7Kamukutulamo umusuŋga wakale, ati mukaŵe nisiŋkwa waŵukumo, koti nifyopele'fyo ifi muli insiku ŵakuŵulo'musuŋga. Pakuti Umuciluko wesu, ŵaKlistu, nawo waliipailwe. 8Pakuti pali fyefyo ŋgatulame icitenje, kumusuŋga wakale teko, neli nikumusuŋga waŵupate naŵumbifi, sombi tucite kuli siŋkwa uwakuŵulo'musuŋga uwamutima wacine.

9Nalilembele kuli mweŵo paŋkalata ati tekwambala neŵacencemesi; 10nsinaeŵele ati tekwambala neli panini neŵacencemesi aŵamucalo cino icapansi, neli ŵaluŋkumbwa, neli ŵakukakatisya ukwakwiŵa, neli ŵakupupe'fiŵumbwaŵumbwa; pakuti ŋga nifyefyo, ŋga muŋgafuma mucalo capansi. 11Sombi pano ndukumulembeleni ati tekulukwambala nemuntu uwilicilwe ati mukwasu, kani uyo mucencemesi, kani waluŋkumbwa, kani upupe'fiŵumbwaŵumbwa, kani walwefyo, kani upendwa, kani ukakatisya ukwakwiŵa; neli kulila pamo nemuntu wakuŵe'fyo, koku. 12Pakuti mbasyani kuli mulandu wanji ukuŵeŵa aŵali posonde? Kani mweŵo tamuŵeŵa aŵo aŵali mukati? 13Sombi aŵo aŵali posonde ŵaLesa eŵaŵeŵa. Ifumyeni imbifi muli mweŵo mweŵene.

Currently Selected:

1 Aŵakolinto 5: AAL59

Highlight

Copy

Compare