1 Aŵakolinto 4

1Aŵantu ŋgaŵalukutweŵa fweŵo ati nifweŵapyunjisi ŵaŵaKlistu, nifweŵakalama ŵafyamfiso fyaŵaLesa. 2Pano pansi kaŵili, palifwailwe pali ŵakalama ati ŵaŵoneke ŵalitekenye. 3Sombi neŵo nsilukufilasa-po ati ndukwebwa kuli mweŵo neli nikukasuŵa kaŵantunsi; icine nsilukulieŵa. 4Pakuti nsifiisi-po neli cimo icakunsinina; naŋgawe'fyo nsilukulunjikwa pakuti pali fyefyo: sombi aŵo awaŋgewa neŵo niŵaSikulu. 5Pakuti pali fyefyo tekufieŵa ifintu ili taiŋgesa impindi, iŵakesa-mo ŵaSikulu, aŵakafisulula ifintu ififisilwe ifyamfinsi, nekubwenesya ifyakwalakanya ifyamumitima; popele impindi iyo ukuŵatota ukwelelwe kukaŵa kuli ŵo ŵonse ukufuma kuli ŵaLesa.

6Ifintu ifyo, mweŵakwasu, nafituntulwila kuli neŵo nemwine nakuli Apolo koti kesiŵilo pakuti pali mweŵo; ati musambile muli fweŵo ifi ati: Tekucila pafintu ifilembelwe, mwiŋgesa mwense kutopansyanya. 7Mbefyo ninani ulukumupusanyeni? Mbacindo ici uli naco, ici topokele? Kansi kani walicipokele, mbanindo ulukulitotela, koti kweŵa ati nsinacipokele?

8Kale mwaikuta; kale mwaŵila; apakuŵula fweŵo mwapyano'ŵufumu. Icine ŋgamuli neŵufumu, ati nafweŵo tulukwikaliko'ŵufumu pamo namweŵo! 9Pakuti ndukulaŋguluka ati ŵaLesa ŵatufumya fweŵo fwentanjisi isipelele-ko, koti ŵantu aŵasininwe kulufu; pakuti tuliŵele ciŵonwaŵonwa kuŵamucalo capansi, nakuŋkalamba syaŵaLesa, nakuŵantunsi. 10Fweŵo tulitumpile pakuti pali ŵaKlistu; sombi mweŵo muli nemano muli ŵaKlistu; fweŵo tulinacile, sombi mweŵo mulikosele; mweŵo ŵalamulemyeni, sombi fweŵo ŵalatupufya. 11Nakumpindi yaŵukumo ŵonse, tulomfwe'nsala necilaka; tuli neŵusakula, nekupamwa; tatukwete apakwikale'cine; 12tulukupyuŋga ukulukucite'milimo neminwe yesu fweŵene; pakutoŋgalwa, tulacindika; pakutukululusya, tulateke'mitima lukoso; 13pakutulaŵisya, tulakombetela lukoso; tuliŵele koti fiŵipile ifyamucalo capansi, koti lipofu ilisumwinwe kufintu fyonse, nakuli ŵuŵuno-ŵukumo.

14Nsilukulembele'fi-fintu mukumuleŋgeleni insoni, sombi ndukumucenjesyeni koti nimweŵana wanji aŵa ntemenwe. 15Pakuti namukekala neŵasambisi amasausande ikumi aŵamuli ŵaKlistu, naŋgaŵe'fyo tamukwete ŵawisinwe aŵenji; pakuti muli ŵaKlistu Yesu nalimufyeleni pakuti paCeŵo Iciweme. 16Pakuti pali fyefyo, ndukumukombeteleni, ati muŵe ŵakuntuntulula. 17Pakuti pali fyefyo namutumineni Timote, umwana wanji uwamuli ŵaSikulu, untemenwe, utekenye, ukalukumulaŋgulusyeni ifyansila syanji isyamuli ŵaKlistu, koti nifyopele'fyo ifi nsambisya ponse mumakelesya onse. 18Sombi ŵambi ŵalukulitota, koti kweŵa ati nsilukwisa kuli mweŵo. 19Sombi ŋkesa bwaŋgu kuli mweŵo, kani ŵaLesa ŵakafwaya; popele ŋkesiwa, tesiwi lyaŵaŵo aŵalukulitota, koku, sombi makosa aŵo eŋkaesiŵa. 20Pakuti uŵufumu bwaŵaLesa taŵuli kwisiwi, sombi ŵuli kumakosa. 21Mbamulukufwaye'ndo? Kani niŋgesa kuli mweŵo nekasako, kani neŵutemwe nemupasi uwakulicefya?

Currently Selected:

1 Aŵakolinto 4: AAL59

Highlight

Copy

Compare