1 Aŵakolinto 3

1Popele naneŵo, mweŵakwasu, nsinaisiŵile ukulaŵila kuli mweŵo koti nikuŵaMupasi, sombi ndukulaŵila koti nikuŵamunefu, koti nikuncece isyamuli ŵaKlistu. 2Nalimulisisyeni amandili, tefinani, koku: pakuti tamwakosele; icine naŵukumo ŵonse tamuŋgakosa; 3pakuti mucili ŵamunefu. Pakati pali mweŵo pali icikani neluŵo, pakuti pali fyefyo kansi tamuli ŵamunefu, nekulukwenda koti kwisiŵila kwaŵantunsi? 4Pakuti, pakulaŵila umbi ati: Neŵo ndi wakwe Paulu; naumbi naye ati: Neŵo ndi wakwe Apolo; kansi tamuli ŵantunsi? 5Mbaninani lomba Apolo? Mbaninani Paulu? Ŵapyunjisi aŵo pakuti pali ŵo epo mwacetekele; sombi fwense koti nifyopele'fyo ifi ŵatupele amakosa ŵaSikulu. 6Neŵo naliŵyele; Apolo ewaitile-po amenda; sombi niŵaLesa eŵasifusisye. 7Peŋka uyo uŵyala walukoso, nawoyo naye uwitila-po amenda fyopele'fyo; sombi niŵaLesa aŵasifusya eŵacine. 8Lomba uyo uŵyala nawoyo uwitila-po amenda ŵali ŵamo; sombi ŵoŵilo ŵakapoka ukulambulwa kwaŵo umo umo koti milimo yaŵo.

9Pakuti fweŵo tulukucite'milimo pamo naŵaLesa; mweŵo muli liŵala lyaŵaLesa, ecakwiŵakwa kuli ŵaLesa. 10Koti luse lwaŵaLesa ulwapelwe kuli neŵo, koti mwine wakwiŵaka uwamano, naliiŵeke ifyapansi; naye umbi alukwiŵacila-po. Sombi aŵantu ŵonse ŋgawacenjele ifyafyefyo ifi ŵalukwiŵacila-po palya. 11Pakuti aŵantu taŵesi ukwiŵaka ifyapansi nafimbi ifitafili nifyefyo ifyaiŵacilwe limo, eŵaYesu Klistu. 12Pakuti aŵantu ŵonse uwakwiŵacila pafyapansi igolide, neli lisilifa, neli mabwe amakweŵo apatali, neli fiti, neli cani, neli fisiŋga fyacani; 13imilimo yaŵantu aŵo ŵonse ikaŵoneka; pakuti akasuŵa ako kakaibwenesya, pakuti ilafisuluka mumulilo; popele umulilo uwine ukesya amekalilo amilimo yaŵantu aŵo ŵonse. 14Peŋka imilimo iyo iyi aiŵacile-po palya umuntu umbi, kani ikalukwikele, uyo-muntu eukapoka ukulambulwa. 15Kani imilimo yamuntu umbi ikapye, akapeŋga: sombi umwine eukapuluka; sombi ifyo koti nimumulilo.

16Tamwisi ati mweŵo litempuli lyaŵaLesa, nakaŵili ati Umupasi waŵaLesa cilukwikala muli mweŵo? 17Kani umbi umuntu akalionale itempuli lyaŵaLesa, ŵaLesa ŵakamonala uyo; pakuti itempuli lyaŵaLesa liliswetelele, lyopele emweŵo.

18Aŵantu ŵonse tekulukulitumpaika neli umo. Kani umbi umuntu alukulieŵa ati ndi nemano pakati pali mweŵo pampindi Ino, ŋgaaŵe utumpile ati akaŵe nemano. 19Pakuti amano amucalo cino icapansi, pamenso aŵaLesa kutumpa. Pakuti palilembelwe ati: Aŵo aŵaŵekata aŵamano kukucenjela kwaŵo aŵene: 20nakaŵili ati: WaSikulu ŵaliisi ukwalakanya kwaŵamano ati kwalukoso, 21Pakuti pali fyefyo aŵantu ŵonse neli umo ŵelitotela muŵantunsi. Pakuti ifintu fyonse fyenu; 22kani niPaulu, kani niApolo, kani niKefasi, kani calo capansi, kani mweo, kani nimfwa, kani fintu fyaŵukumo, kani fintu ifikesa; fyonse fyenu; 23namweŵo muli ŵaŵaKlistu; naŵaKlistu naŵo ŵaŵaLesa.

Currently Selected:

1 Aŵakolinto 3: AAL59

Highlight

Copy

Compare